MEKENE 60
The Cile Kö Troa Akökötrene La Ihnimi Epun Koi Iehova
Jëne la ini Tusi epun, tru hë la itre ewekë hnei epuni hna atre göi Iehova. Nge pine laka, tru la ihnimi epuni koi Nyidrë, hnei epuni hna nue la mele i epun, me bapataiso. Maine jë tha traqa palakö epun e cili. Ngo e ka bapataiso hë epun, loi e tro palahi epuni a acatrene la lapaune i epun me easenyi catre koi Iehova. Troa tune kaa?
1. Hnauëne laka tro palahi epuni a acatrene la imelekeu i epuni me Iehova?
Loi e tro palahi sa acatrene la imelekeu së me Iehova. Hnauën? “Wanga nanyi pi së qa ngöne la lapaun.” (Heberu 2:1) Nemene la ka troa xatua së troa mele nyipici koi Iehova? Ene la tro sa catre cainöjëne la maca ka loi, me thele troa kuca la itre xaa huliwa koi Nyidrë. (E jë la Filipi 3:16.) Ame la troa nyihlue i Iehova ke, celë hi mele ka sisitria!—Salamo 84:10.
2. Nemene la itre xaa nyine tro palakö epuni a kuca?
Ase hë la ini Tusi epun! Ame pe, epuni petre hi lai a nyiqane atre Akötresie. Öni Tusi Hmitrötr ka hape, loi e tro palahi epuni a “heetrëne la thiina ka hnyipixe.” (Efeso 4:23, 24) Jëne la hnei epuni hna inin ajuine la Tusi Hmitrötr, me sine la itre icasikeu, tro epuni lai a atre la itre xaa pengöi Iehova, memine la itre xaa thiina i Nyidrë. Thele jë la aqane tro epuni a nyitipu Nyidrë. Nge saze pi la aqane mele i epun, matre amadrinë Iehova.
3. Tune kaa la aqane tro Iehova a xatua epun matre kökötre trootro la lapaune i epun?
Öni Tusi Hmitrötr: Tro Akötresie “a sipu apexejene la ini i nyipunie . . . Tro nyidrëti a acatrenyi nyipunie, tro nyidrëti a aegöcatrenyi nyipunie, nge tro nyidrëti a acile huti nyipunie.” (1 Peteru 5:10) Nyipici, hna tupathi së asë hi. Ame pe, Iehova a hamëne la trengecatre koi së, matre atreine së cil kowe la itre itupath. (Salamo 139:23, 24) Hnei Nyidrëti lo hna qaja ka hape, tro kö Nyidrëti a hamë së la aja, me trengecatr, matre tro palahi sa nyihlue i Nyidrë.—E jë la Filipi 2:13.
TROA CE ITHANATAN
Tro sa ce wang la aqane tro epuni a akökötrene la lapaune i epun, memine la aqane tro Iehova a amanathithi epun.
4. Ithanata lapa jë me Iehova Akötresie
Jëne la thith me ini Tus, ijiji epuni hë troa ithanata me Iehova, sinee i epun. Tune kaa la aqane tro la lue ewekë cili, a xatua epun troa easenyi catre koi Iehova?
E jë la Salamo 62:8, nge ce ithanatane jë cahu hnying:
Ame la epuni a thith, tro epuni a amamane tune kaa la ecatrene la imelekeu i epuni me Iehova?
E jë la Salamo 1:2, nge ce ithanatane jë cahu hnying:
Tune kaa la aqane tro epuni a amamane ngöne la epuni a e Tusi Hmitrötr ka hape, ka catre la imelekeu i epuni me Iehova?
Nemene jë la aqane tro epuni a ini Tusi Hmitrötre cas? Hane hi cahu itre xaa aqane kuca. Goeëne jë la VIDEO, nge ce ithanatane jë cahu itre hnying:
Nemene la aqane tro epuni a trongëne la hna amamane ngöne la video?
Nemene la itre tane mekune hnei epuni hna ajane troa inin?
5. Loi e troa hetre huliwa hnei epuni hna ajane troa kuca
Maine troa hetre huliwa hnei epuni hna mekune troa kuca, tro hë lai a acatrene la lapaune i epun. Goeëne jë la VIDEO, nge ce ithanatane jë cahu hnying:
Nemene la itre manathith hnei Cameron hna kapa, jëne la hnei angeic hna canga mekun la itre huliwa nyine kuca koi Iehova?
Tha ijiji easë asë kö troa tro kowe la itre xaa nöje troa cainöj. Ngo ijije hi tro sa kuca la itre xaa huliwa. E jë la Ite Edomë 21:5, nge pane lapa mekune jë la itre xaa huliwa nyine troa kuca . . .
e hnine la ekalesia.
ngöne la huliwa ne cainöj.
Tune kaa la aqane tro lai xötr a xatua epun troa eatrëne la itre huliwa hnei epuni hna mekun?
Tune kaa e tro epuni a . . .
Thithi hnyawa koi Iehova?
E asë la Tusi Hmitrötr?
Atre asë la itre atrene la ekalesia?
Nyiqane ini Tusi Hmitrötr me ketre atr?
Pionie ka ixatua maine pionie lapa?
Hane xome la hnëqa ne atre ixatua, e ketre trejin trahmanyi epun?
6. Trongëne jë la gojenyi kowe la nyipi mel uti hë epine palua!
E jë la Salamo 22:26, nge ce ithanatane jë cahu hnying:
Nemene la nyine tro epuni a kuca, matre hetrenyi la mel ka mingöming qane enehila nge uti hë epine palua?
HANE HI LA HNE SË HNA CE WANG
Loi e tro palahi a acatrene la imelekeu i epuni me Iehova, me hetre itre huliwa nyine troa eatrëne ngöne la organizasio i Nyidrë. Aqane tro hi epuni lai a hetrenyi la nyipi mel, uti hë epine palua!
Nyine Amekunën
Hnauëne laka, ka xecie hnyawa koi epun ka hape, tro kö Iehova a xatua epun troa nyihlue i Nyidrë?
Tro epuni a acatrene tune kaa la imelekeu i epun me Iehova?
Pine nemene matre, ame la itre huliwa hnei epuni hna mekun troa kuca koi Iehova, ke jëne tro hi lai a akökötrene la lapaune i epun koi Nyidrë?
ITRE XAA NYINE WANG
Nemene la ka sisitria koi Iehova, itre huliwa hne së hna kuca, maine troa mele nyipici koi Nyidrë uti hë la pun?
Ijije hi troa patre la madrin ne la ketre hlue i Iehova. Nemene la nyine troa kuca matre tro hmaca angeic a madrin?
Nemene la itre huliwa hne së hna mekune troa kuca koi Akötresie? Nge tro sa eatrëne tune kaa?
“Glorifiez votre Créateur en vous fixant des objectifs spirituels” (Ita Ne Thup 15 Julai 2004)
Nyipiewekë tro la keresiano a macaj. Nemene la nyine tro angeic a kuca?
“Saqe Jë Troa Macaj Ke ‘Calemi Hë La Drai Atraqatre i Iehova’” (Ita Ne Thup 15 Mei 2009)