MEKENE 50
Ketre Fami Ka Madrin—Götrane 2
Ame la itre nekönatr ke, itre ahnahna qaathei Iehova. Aja i Iehova tro la itre kem me thine a thupë nyudren. Nyidrëti a hamëne la itre eamo nyine xatua angatr. Nyidrëti mina fe a qaja kowe la itre nekönatr la nyine tro nyudren a kuca, matre madrine la fami.
1. Nemene la itre ini hnei Iehova hna hamëne kowe la itre kem me thin?
Aja i Iehova tro la itre kem me thine a hnim la itre nekö i angatr, me xomi traem koi nyudren. Aja i Nyidrëti fe tro angatr a thupëne la itre nekö i angatr, me ini nyudren la itre trepene meköt ne la Tusi Hmitrötr. (Ite Edomë 1:8) Öni Nyidrë koi itre kem: “Hia nyudreni [itre nekö i epun] jë pe ngöne la . . . itre ini qaathei Iehova.” (E jë la Efeso 6:4.) Iehova a madrine e tro la itre kem me thine a xötrethenge la trepene meköte celë, nge tha tro kö angatr a nue koi itre xan troa inine la itre nekö i angatr.
2. Nemene la itre ini hnei Iehova hna hamëne kowe la itre nekönatr?
Öni Iehova kowe la itre nekönatr: “Drengethenge ju la itre kem me thine i nyipunie.” (E jë la Kolose 3:20.) Ame la itre nekönatr ka metrötrëne la itre kem me thin, nge ka idrengethenge, ke nyudrene lai a amadrinë Iehova me itre kem me thin. (Ite Edomë 23:22-25) Ame lo Iesu a nekönatr, hnei nyidrëti hna amamai tulu. Ngacama ka pexeje nyidrë, ngo hnei nyidrëti palahi hna drengethenge la kem me thine i nyidrë, me metrötrë nyidro.—Luka 2:51, 52.
3. Tune kaa la aqane tro la fami epun a easenyi koi Akötresie?
Itre kem me thin, ame la aja i epun ke, tro la itre nekö i epuni a hnimi Iehova catr. Tro epuni a xatua nyudreni tune kaa? Hane hi la hna qaja hnei Tusi Hmitrötr: “Tro eö a inin’ it’ eje [itre trengewekë i Iehova] kowe la ite nekö i ’ö, me ithanatan’ it’ eje e lapa eö hnine la uma i ’ö, me tro e kuhu gojeny.” (Deuteronomi 6:7) Ame lai hna hape, troa “inin,” ke tro palahi a qaja lapan. Nge atre hi epuni lai laka, e tro epuni a qaja lapane la ketre ewekë ke, tha tro kö lai a thëthëhmin hnene la itre nekö i epun. Matre kola amamane hnene la xötre celë ka hape, tro palahi epuni a qeje Iehova kowe la itre nekö i epun. Nge loi e troa ami ijin, matre tro la fami a inine la Tusi Hmitrötr. Nge ketre tune fe, e pëkö nekö i epun. Loi e tro epuni e cili a ami ijin, matre ini Tusi Hmitrötr memine la föi epun.
TROA CE ITHANATAN
Tro sa ce wange la nyine troa kuca hnene la itre atrene la fami, matre mele madrine me tingeting.
4. Inine jë la itre nekö i epun cememine la ihnim
Tha ka hmaloi kö troa inine la itre nekönatr. Tro la Tusi Hmitrötr a xatua epun tune kaa? E jë la Iakobo 1:19, 20, nge ce ithanatane jë cahu itre hnying:
Tro la itre kem me thine a amamane tune kaa la ihnimi angatr kowe la itre nekö i angatr, la angatr a ithanata me nyudren?
Pine nemene matre tha tro kö a hajine la nekönatr cememine la elëhni?a
5. Thupëne hnyawa ju la itre nekö i epun
Ngacama tha ka hmaloi kö troa ithanatane la ce meköle trefën memine la itre nekö i epun, ngo canga ithanatane jë me nyudren. Goeëne jë la VIDEO, nge ce ithanatane jë cahu itre hnying:
Pine nemene matre jole koi itre xaa kem me thin troa ithanatane la ce meköle trefën me itre nekö i angatr?
Nemene la aqane kuca hnene la itre xaa kem me thin?
Tune la hna perofetane hë, kolo palahi a ngazo catr la fene i Satana. E jë la 2 Timoteo 3:1, 13, nge ce ithanatane jë cahu hnying:
Ame la itre atr ka thiina ka ngazo hna qaja ngöne lai xötre 13, ke kolo fe a qaja la itre atr ka thele troa angazone la itre nekönatr. Pine nemene matre tro la itre kem me thin a canga qejepengöne la ce meköle trefëne kowe la itre nekö i angatr, me aqane troa kötrene la itre ka troa angazo angatr?
Atre fe hi epun?
Tru la itre jia ne huliwa hna kuca hnene la itre Temoë Iehova, nyine hnëkëne la itre kem me thin göi troa ithanatan la ce meköle trefëne me itre nekö i angatr, me aqane troa thupë nyudren göne la itre atr ka iangazo. Hane hi la itre xaa hna hnëkën:
“Parler de sexualité à son enfant” (Hmeke Jë! Na. 5 2016)
6. Metrötrëne ju la kem me thine i epun
Itre nekönatr a amamane qa ngöne la aqane ithanata i angatr ka hape, angatr a metrötrëne la kem me thine i angatr. Goeëne jë la VIDEO, nge ce ithanatane jë cahu itre hnying:
Pine nemene matre tro la nekönatr a hetre metrötr, la angeic a ithanata kowe la keme me thine i angeic?
Tro angeic a amamane tune kaa la angeic a ithanata ka hape, angeic a wangatrune la kem me thine i angeic?
E jë la Ite Edomë 1:8, nge ce ithanatane jë cahu hnying:
Tune kaa la aqane tro angeic a ujë, e kola haji angeic hnei kem me thin?
7. Loi e tro la fami a ce hmi ngöne la hnalapa
Itre fami Temoë Iehova a xomi ijine ngöne la wiik, matre troa kuca la hmi ne la fami. Nemene la aqane kuca i angatr? Goeëne jë la VIDEO, nge ce ithanatane jë cahu itre hnying:
Tune kaa la aqane isine hnene la fami celë, matre tro palahi angatr a eatrëne la hmi ne la fami?
Nemene la hna troa kuca hnene la kem maine thin, matre tro palahi a hetre madrin ngöne la hmi ne la fami angatr?—Goeëne jë la pane iatr e caha hun.
Nemene la ka ajolë epun, troa kuca la hmi ne la fami i epun?
Ame la aja i Iehova ke, tro palahi la angetre Isaraela a ithanatane la Trengewekë i Nyidrë. E jë la Deuteronomi 6:6, 7, nge ce ithanatane jë cahu hnying:
Tro epuni a trongëne tune kaa la trepene meköti celë?
Itre mekune koi hmi ne la fami:
Hnëkëne jë la itre icasikeu.
E jë la ketre hna melëne ngöne la Tusi Hmitrötr, nge hna ajane hnene la fami epun, nge ce ithanatane jë.
Maine hetre nekö i epun ka co, télécharger jë maine imprimer ju la ketre huliwa ngöne jw.org nyine tro la itre nekönatr a kuca.
Maine ka tru hë la itre nekö i epun, ithanatane jë me angatr la ketre itus ka ihmeku me angatr ngöne jw.org.
Elone jë la ketre hna melëne ngöne la Tusi Hmitrötr.
Goeëne jë la ketre video ngöne jw.org, nge ce ithanatane jë.
HNE SË HNA MAJEMINE DRENG: “Tha trotrohnine kö la itre nekönatr la Tusi Hmitrötr.”
Tro epuni a sa tune kaa?
HANE HI LA HNE SË HNA CE WANG
Aja i Iehova tro la itre kem me thin a hnim, me inin, me thupëne la itre nekö i angatr. Nge tro la itre nekönatr a metrötrëne la kem me thin, me drengethenge angatr. Nge tro la itre fami a ce hmi koi Nyidrë.
Nyine Amekunën
Tro la itre kem me thin a inine me thupëne tune kaa la itre nekö i angatr?
Tune kaa la aqane tro la itre nekönatr a wangatrune la kem me thine i angatr?
Nemene la itre eloine e tro la fami a kuca la hmi ne la fami e nöjei wiik?
ITRE XAA NYINE WANG
Troa hnëkëne tune kaa la nekönatr, matre tro loi la mele i nyën elany?
Itre ixatua qa ngöne la Tusi Hmitrötr kowe la itre ka thupëne la itre kem me thin ka qatre hë.
“Prendre soin de ses parents âgés : qu’en dit la Bible ?” (Itus jw.org)
Ketre kem ka mekune ka hape, thatreine kö angeic hiane la itre nekö i angeic, ngo e thupen, hnei angeic hë hna eatrëne hnyawa la hnëqa i angeic.
Troa acatrene tune kaa hnene la kem, la imelekeu i angeic memine la nekö i angeic trahmany?
“Comment un père peut-il rester proche de son fils ?” (Ita Ne Thup 1 Nofeba 2011)
a Ame la aqane qejepengöne la “ihaji” hnei Tusi Hmitrötr ke, ene la troa inin, me köjan, me amekötin. Kolo lai a hape, tha tro kö a axösisine la nekönatr.—Ite Edomë 4:1.