Tha Ajane Kö La Atr Troa Mec

Ketre ithupëjia ka ngazo catre la mec. Celë hi kepine matre, easa thele jëne troa isi memin. Nge ame hë la kola mec hnene la ketre sinee hne së hna hnim, tre hace koi së troa kapa la ewekë cili. Nge ame pena la easa thöth, nge tru la trenge catre së, ngacama tha eje kö, ngo easa mekune laka, tha tro kö a hane lepi së hnene la mec.

Ame la itre Farao ekö, tre ka xeci hnyawa koi angatr ka hape, ijije tro angatr a hane mele palua. Ame ngöne la mele i angatre ka pexej, tre tru ju kö la hnei angatr hna huliwa catr, me upe la itre hlue i angatr troa huliwa mec, göi troa ngaane la mec. Kola jele nyipicine lai hnene la itre piramid hna xup; nge itre piramide cili mina fe la ka amamane ka hape, catrecatre ju kö la mec hui angatr.

Itre joxu ne la itre cinoa mina fe la ka mejiune ka hape, ijije hi troa trianyi angatr hnene la mec; ngo hetre ketre pengöne nyin kö hnei angatr hna thel. Hnei Qin Shi Huang, ketre joxu ne Chine, hna up la itretre kuci drösinöe i nyidrë troa thele la drösinöe ka troa aijijë nyidrë troa mele aqeany. Ngazo pe, tru catre la itre drösinöe hna ithuenyiköne memine lo hna hape, mercure qene Wiwi, nge xönë hi tro nyidrëti a mec hnene la ketre drösinöe.

Ame pena Juan Ponce de León qa Espagne, ketre atre alamekëne la itre nöj, tre hnei nyidrëti hna ti he a tro kowe lo nöje hna hape Antilles ngöne lo macatre 1513 M.K.a, ke nyidrëti a thele lo timi ne mel. Ame hë la nyidrëti a traqa e Floride, e Amerika, tha hmitre ju kö nge nyidrëti ha mec thupene la hna isi memine la itre atr ne Amerika. Nge pëkö timi ne mele hnei angatr hna öhn.

Asesë hi la itre Farao, me itre joxu, me itre atre alamekë nöj thele jëne troa ngaane la mec. Ngacama tha pi tro fe kö së a hane tui angatr, ngo drei e easë la ka tha ajane kö troa hane mel aqeany? Nga easë asë hi la, a ajane troa mel.

IJIJE FE KÖ TROA NGAAN LA MEC?

Pine nemene matre tha pi tro kö sa mec? Tusi Hmitrötr a sa koi së. Kola qaja göne la Atre Xupi së, ene Iehova Akötresie,b ka hape: “Lolo asë la nöjei ewekë hnei nyidëti hna kuca ngöne la ite ijin’ it’ ej ; kete hnei nyidëti hna amë la mekune kowe la fene [troa mele epine palua] e kuhu hni angat.” (Ate Cainöj 3:11) Aja së asë hi troa mele madrine e celë fene hnengödrai, uti hë epine palua, ngo tha koi 80 hmekuje kö lao macatre. (Salamo 90:10) Aja lai ka ej e kuhu hni së.

Pine nemene matre amë jë Akötresie e kuhu hni së, la ‘mekune troa mele epine palua’? Hapeu, Nyidrëti hi a ajane troa akötrë së? Ohea. Hnei Akötresieti pe hna qaja koi së ka hape, easenyi hë la ijine troa ngaane la mec. Nyimutre la itre xötr ne la Tusi Hmitrötr ka qaja ka hape, tro ha apatrene la mec, nge tro pe la itre atr a mele epine palua.—Wange ju la itre mekune hna eköhagen hna hape, “Tro Ha Ngaane La Mec.”

Hnei Iesu Keriso lo hna qaja ka hape: “Dei lola la mele ka tha ase palua kö, laka tro angat’ a ate hmekua cilie la nyipi Akötesieti ka cas, me Iesu Keriso la hnei cilieti hna upengëtin.” (Ioane 17:3) Haawe, kolo lai a hape, ijije hi troa ngaane la mec. Ngo ame pe, hnei Iesu hna qaja ka hape, Akötresie hmekuje hi la ka atreine ngaane la mec.