Kola Sa Hnei Tusi Hmitrötr
Nemene la enyipiewekëne la mec i Iesu koi së?
Ame la Akötresieti a xupe la atr, hnei Nyidrë hna xupi angeice matre tro angeic a mele epine palua e celë fene hnengödrai, nge pëkö mec, maine sine meci pena. Ngazo pe, tha hnene kö la pane atr, ene Adamu, hna drei Akötresie, ene pe luzi pi lo mele ka tha ase palua kö. Nge pine laka, easë la itre matra i Adamu, haawe, edrö së fe hë la mec. (Roma 5:8, 12; 6:23) Ngo hnene la nyipi Akötresie, ene Iehova, hna upi Iesu Nekö i Nyidrë kowe la fen, matre troa meci me itöne hmaca lo ewekë hna aluzine hnei Adamu.—E jë la Ioane 3:16.
Hnei Iesu hna mec matre tro hmaca kö së a hetrenyi la mele ka tha ase palua kö. Nemene pengöne la mele ka tha ase palua kö elany e celë fene hnengödrai?
Hnene la mec i Iesu hna aijijëne troa sengetrije la itre ngazo së, nge ijije fe tro sa hetrenyi hmaca la mele ka tha ase palua kö. Tusi Hmitrötr a qaja koi së la pengöne la mele elany e pë hmaca kö qatr, me wezipo, me mec.—E jë la Isaia 25:8; 33:24; Hna Amamane 21:4, 5.
Nemene la aqane tro sa mekune hmaca la mec i Iesu?
Ame ngöne lo hej qëmekene tro Iesu a mec, hnei nyidrëti hna upe la itretre drei nyidrë, troa kuca hi la ketre hnepe huliwa ka co hi. Maine aqane kuca hi së lai e nöjei macatre göi troa atrune la ijine mec i nyidrë, haawe, tro hë sa atrehmekune la etrune la ihnim i Iesu me Iehova kowe la nöjei atr.—E jë la Luka 22:19, 20; 1 Ioane 4:9, 10.
Ame ngöne la macatre ce, kola troa mekune hmaca la drai ne mec i Iesu e Thupenehmi 14 Eiperem, thupene la kola lö la jö. Hane pi fe traqa troa sine la huliwa cili memine la Itretre Anyipici Iehova ne la nöje i nyipunie.—E jë la Roma 1:11, 12.