‘Nyipiewekëne Ju La Itre Ka Tune Lai’

QAANE lo 1992, hnene la Lapa Ne Xomi Meköt hna acile la itre qatre thup ka maca troa xatuane la itre komite ne ej troa isa eatrëne la itre huliwa i angatr.a (Wange ju la ithuemacany.) Itre ka ixatua angatr, itre atrene la “ite xa mamoe,” angatr a xatuane la Lapa Ne Xomi Meköt. (Ioane 10:16) Angatr a hane sine la icasikeu ne la komite hnei angatr hna huliwa ngön e nöjei wiik. Ame la huliwa i angatr, tre ene la troa hamëne la itre ithuemacany ka ijij, me hane hamë mekun nyine ixatua. Lapa Ne Xomi Meköt la ka axeciëne la itre mekun, nge qa ne la itre ka ixatua troa thupën matre troa eatrëne la itre mekune cili. Hetre aja ne la itre trejine cili troa kuca asë la hnei angatre hna atreine troa eatrëne la huliwa hna athipi koi angatr. Ame ngöne la itre ijine asabele ka ketrepengön, me asabele koi itre nöje ka nyimutre, tre, angatr a ce tro memine lai ketre atrene la Lapa Ne Xomi Meköt. Hna hane upi angatre fe troa hane wange la itre xa filial.

Önine la ketre trejine ka ixatua qaane lo 1992, “E tro ni a kuca hnyawane la hnëqa hna athipi koi eni, kolo hi lai a aijijëne la Lapa Ne Xomi Meköt troa nue asë la mele i angatr kowe la itre ewekë i Akötresie.” Hnene la ketre trejin ka ixatua koi 20 lao macatre hna qaja ka hape, “Ketre manathithi ka tru koi ni, nge tha ase pi kö ni mekune troa hane melën.”

Tru la itre hnëqa hna nue hnene la Lapa Ne Xomi Meköt kowe la itre ka ixatua, nge kola kapa madrine la aqane catre huliwa ne la itre trejine cili. Haawe, ‘nyipiewekëne ju la itre ka tune lai.’—Filipi 2:29.