Ka Lapa Pe Hi Ni Uti Hë La Eni a Mesinare

Hna hnaho ni lo 1951 e Vienne (Autriche) ngöne la ketre fami ka katolik. Ngacama ka lapa pe hi ni, ngo ka mejiune ni koi Akötresie me thithi lapa koi Nyidrë. Ame lo eni a 9 lao macatre, hnei kaka hna nyiqane ini Tus memine la itre Temoë Iehova, nge hnei nenë hna ixötrethenge e thupen.

Tha qea ju kö, nge eahuni fe hë a sine la ekalesia ne Döbling e Vienne. Hnei eahun fami hna majemine ce e me ini Tusi Hmitrötr, me sine la itre icasikeu, me saen troa huliwa ngöne la itre ekalesia. Qane lo eni a nekönatr, hnei kaka hna aciane e kuhu hning la ihnim koi Iehova. Hnei kaka hna thithi lapa matre tro ni me trejin me ni a pionie. Ngo tha mekunang pala kö.

ENI A XOM LA HULIWA NE PIONIE

Hna bapataiso ni lo 1965, lo eni a 14 lao macatre. Ngo jole koi ni troa ithanata memine la itre atr ngöne la hna cainöj. Ketre, eni a wangaconyi ni. Nge pi tro catre ni a ce elo me itre xaa jeune. Thupene la eni a bapataiso, hnenge hna nyiqane ce tro memine la itre xaa jeune ka tha nyihlue i Iehova kö. Pi tro catre ni a ce tro me angatr, ngo kola huliwa la mekuthetheung. Nge, pëkö trengecatreng troa saze. Nemene la ka xatua ni?

Ame ngöne la ijine cili, hnene la ketre neköjajinyi ka 16 lao macatre hna traqa ngöne la ekalesia i eahun, Dorothée la ëjen. Eni a haine la aqane catre angeic cainöj ngöne la itre hnalapa trootro. Nango tru kö ni hui angeic, ngo tha ka cainöj lapa kö ni. Öning: ‘Ka Temoë Iehova la kemeng me thineng, ngo ame kö Dorothée, angeice cas ngöne la nyipici. Ketre, ngacama angeic a thupëne la thine i angeic ka wezipo, ngo ka cainöj pala hi angeic!’ Hnene la tulu i angeic hna uku ni troa huliwa catr koi Iehova. Tha qea ju kö, nge nyio ha ce pionie. Hnei nyio hna pane xom la huliwa ne pionie ka ixatua, maine pionie ngöne la ijine vakas tune lo aqane qaja ekö. Nge e thupen, hnei nyio hna xom la huliwa ne pionie lapa. Ka ixötrekeu la madrine i Dorothée. Hnei angeic hna xatua ni troa nyiqane la pane ini Tusing. Nge e thupen, hmaloi hë koi ni troa cainöj kowe la itre atr ngöne la itre hnalapa trootro, me e cahu hna tro.

Tha ca macatre ju kö ne eni a pionie, nge hna traqa ngöne la ekalesia hun hnene la ketre trejin trahmanyi qa Autriche, hna hën ka hape, Heinz. Hnei angeic hna atre la nyipici e Canada, lo angeic a tro troa wang la trejin me angeic ka Temoë. Hna upi angeic troa pionie hut ngöne la ekalesia hun. Eni a nango goeë angeic, ngazo pe, aja i angeic troa mesinare, nge tha ajange kö. Matre tha ase kö ni fe la hning koi angeic. Ngo e thupen, hnei nyio hna nyiqane iatre, me faipoipo, me ce pionie e Autriche.

AJANGE HË TROA XOM LA HULIWA NE MESINARE

Heinz pala hi a qaja la aja i nyidrë troa mesinare. Tha ase kö nyidrë musinë ni, ngo nyidrëti pe a ithuecatr koi ni troa hetrenyi la aja cili. Nyidrëti a xatua ni me hnying ka hape, “Pëkö nekö i nyiso, matre tune kaa la tro nyiso a huliwa catre koi Iehova?” Ka lapa pe hi ni, matre xounge fe troa xom la huliwa ne mesinare. Nyipici laka, eni a pionie, ngo kösë tha ijijinge kö troa hane mesinare. Ngo hnei Heinz pala hi hna thel troa akökötrene la aja cili theng. Nge hnei nyidrëti hna ithuecatre koi ni troa mekun catrën la ixatua hnenge hna troa hamën koi itre xan, hune la itre ewekë ka ajolë ni. Itre eamo lai ka xatua ni.

Kola kökötre trootro la ajang troa mesinare, matre hnei nyio hna nyialiene la pepa nyine sine la Ini Gileada. Ngo, hnene la ketre atrene la filial hna upi ni troa pane inine hnyawane la qene Papale. Thupene la köni macatre, hna upi nyio kowe la ketre ekalesia ka qene serbo-croate e Salzbourg (Autriche). Ame ngöne la 7 lao macatre, hnei nyio hna cainöj kowe la itre atr ka qaja la qene hlapa cili. Nge ca macatre ne xome nyio la huliwa ne sirkoskripsio. Ka jole catr la qene hlapa cili, ngo ka tiqa hnei atr hnei nyio hna ini Tusi memin.

Ame lo 1979, hna upi nyio troa “vakas” e Bulgarie. Hna wathebone la huliwa ne cainöj e cili. Matre tha hnei nyio kö hna cainöj. Ngo hnei nyio hna traqa fë juetrëne la itre neköi tusi së ka co kowe la 5 lao trejin föe ka mel e cili e Sofia. Tru la xoung, ngo hnei Iehova hna xatua ni ngöne la hnëqa i nyio. Ngacama ijije hi troa akalabusine la 5 lao trejin föe, ngo angatr pala hi a catr me madrin. Celë hi ka acatrene la ajang troa catre huliwa i Iehova me eatrëne la itre hnëqa hna ahnith koi nyio hnene la organizasio.

Hnei nyio hmaca hna sipone troa sine la Ini Gileada, nge hna kapa la aja i nyio. Nyio pe kö a mekun ka hape, tro nyio a sine la ini cili qene Papale e Etazini. Ngo ame lo Nofeba 1981, hna fe la ketre ini Gileada ngöne la Bethela ne Allemagne e Wiesbaden. Matre hnei nyio hna sine la itre ini cili qene Allemand, nge hmaloi hi koi ni troa trotrohnin. Ekaa la hna troa upi nyio?

NYIO A MESINARE NGÖNE LA KETRE NÖJ GAA ISI

Hna upi nyio a tro Kenya! Ngo hnene la Bethela ne Kenya hna sipo nyio troa tro Ouganda, ketre nöj ezin. Ame lo 10 lao macatre qëmeken, hna akein la musi Ouganda hnei général Idi Amin. Ame ngöne la itre macatre ne musi nyidrë, itre thauzane la itre atr ka mec, nge itre milio lao atr ka hleuhleu. Nge ame lo macatre 1979, hna thapa hmaca la musi Ouganda. Tha nyine qaja kö la xou ka eje theng la kola upi nyio kowe la nöje cili gaa isi ekö. Ngo hnei nyio hna inin e Gileada la enyipiewekën troa amë la mejiune së koi Iehova. Matre hnei nyio hna kapa la sipo i angatr.

Ka jole catr la mel e Ouganda. Öni Heinz ngöne la Annuaire 2010: “Pëhë tim, nge tha ijiji eahuni hë troa ihë. Ame ngöne la jidr, kola ikuqany me atrekënö. Itre atr a isa lapa hnalapan me sipo Akötresie matre tha tro kö a lö menu la ketre atr ngöne la hnalapa i angatr.” Ngacama ka jole catr, ngo ka catre pala hi la lapaune la itre trejin!

Ame lo 1982, hnenge me Heinz hna traqa e Kampala, traon ka tru e Ouganda. Hnei nyio hna lapa thei Sam me Christina Waiswa koi 5 lao treu. Traqa koi 5 lao nekö i nyidro, nge 4 lao sinee ka ce lapa me angatr. Aca xeni hi angatr ngöne la drai. Matre nyine haine la aqane ikep i angatr. Tru la itre ini hnei nyio hna kapa la nyio a ce mel me angatr, lo nyio a mesinare. Hnei nyio hna inine troa huliwane hnyawan la tim, me xome hi la ka ijij troa si, me xom la tim hna huliwane hë koi kabine. Ame hë lo 1983, hnei nyio hna öhne la ketre uma ngöne la ketre kartie ka nango loi e Kampala.

Ka tru catr koi nyio la huliwa ne cainöj. Ame lo ketre treu, hnei nyio hna hamën la 4 000 lao zonal! Ngo ame la ka ketri nyio, ke ene la itre atr. Hetre metrötre i angatr koi Akötresie, nge madrine catr angatr troa qeje Tusi Hmitrötr. Traqa koi 10 maine 15 lao atr hnenge me Heinz hna ini Tus memin. Tru catr la itre ini hnei nyio hna kapa qaathene la itre ka ini Tus me nyio. Hna ketri nyio ke, ka madrine pala hi angatr. Ame e nöjei wiik, angatr a trongë ihnadro troa icasikeu. Tha angatr fe kö a eetr, nge ka madrine pala hi angatr.

Ame lo 1985 me 1986, hna traqa la lue isi e Ouganda. Itre nekönatr la ka cile fë kuqa ngöne la itre barrages. Ame ngöne la ijine cili, eahun a catr thith matre atreine waiewekë, me hni ka menyik la eahuni a thel la itre atr ka pi atre la nyipici ngöne la teritoar. Nge hnei Iehova hna sa la itre thithi hun. Ame la eahun a öhne la ketre atr ka kapa la maca ne la Baselaia, ke kola lapakötr la xou the hun.

Aja i nyio fe troa cainöj kowe la itre trenyiwa. Hnei nyio hna ini Tus koi Mourat me Dilbar Ibatoulline, lue trefën ka traqa qa Tatarstan (ketre traon e Russie). Ka droketre Mourat. Hnei angeic me föi angeic hna kapa la nyipici, nge lue ka nyihlue i Iehova pala hi nyidro enehila. Thupene lai, hnenge hna iöhnyi me Tatjana Vileyska, ketre föe qa Ukraine ka pi hnöjua. Thupene la angeic a xomi bapataiso, hnei angeic hna bëeke hmaca a tro Ukraine me huliwa ngöne la hnë ujë qene hlapa.a

KOLA UPI NYIO KOI KETRE NÖJ

Ame lo 1991, nyio a vakas e Autriche, nge hna thuemacanyi nyio hnene la Bethela ne Autriche laka, nyio a troa fek kowe la ketre nöj. Hna upi nyio a tro Bulgarie. Thupene la hna kei la musi communiste e Europe de l’Est, hna nue hmaca la itre huliwa ne la itre Temoë Iehova ngöne la nöje cili. Tune lo hnenge hna qaja ekula, hnei nyio hna alöne juetrëne la itre itusi së lo kolo petre kö a wathebone la hmi së. Ngo ame enehila, kola upi nyio troa cainöj e cili.

Hnei angatr hna qaja koi nyio troa tro meköt a tro Bulgarie, matre tha bëeke ju kö nyio kowe la hnalapa ne mesinare e Ouganda. Tha sa trengetreng ju kö nyio, me iahni memine la itre sinee i nyio. Hnei nyio hna tro kowe la Bethela e Allemagne troa xomi loto me nyinyape a tro Bulgarie. Hna upi nyio kowe la ketre nekö i gurup e Sofia, nge ala 20 hi lao ka cainöj.

Ngo tru la itre jol hnei nyio hna troa cile kow. Ame la pane jol, ke thatreine kö nyio qene Bulgare. Hnaaluen, ame hi la itre itusi hna ujëne ngöne la qene hlapa cili, ke kolo itus La vérité qui conduit à la vie éternelle me Trenge Edromë Qa Hnin La Tusi Hmitrötr. Ame la hnaakönin, ke jole koi nyio troa öhne la itre atr ka pi ini Tusi Hmitrötr. Ngacama kola traqa la itre jole cili, ka catre cainöj la neköi gurup i eahun. Nge hna öhne lai hnene la hmi orthodoxe, matre kolo ha traqa la itre jole ka tru.

Ame lo 1994, hna wathebone hmaca la hmi së e Bulgarie. Ame koi angatr, ke ketre secte. Hna othe la itre trejin trahmany. Nge kola sili trengathoi së ngöne tele me radio. Angatr a qaja ka hape, easa nue la itre nekö së troa mec, maine ukune la itre sine hmi së troa hnöjua. Matre jole koi ni me Heinz troa cainöj. Tru catre la itre atr ka xele ma wai hun. Angatr a sue me hë polis la eahun a cainöj, goi lothi huni fe. Tha ijiji kö troa lö fë la itre itusi së ngöne la nöj. Nge jole troa louer la itre uma nyine icasikeu. Ame la ketre drai, hnei polis hna thupatëne la ketre asabele hun. Tha majemine kö ni me Heinz mel ngöne la imethinë. Isapengöne catr memine lo teritoare i nyio e Ouganda laka, tru catr la itre atr ka kapa la nyipici, nge ka lolo catr la itre thiina i angatr! Nemen la ka xatua nyio matre tha tro kö nyio a dekurag?

Nyio a madrin la nyio a ce lapa memine la itre trejin. Madrine catre angatr, ke hnei angatr hna atre la nyipici, nge madrine fe angatr kowe la ixatua i nyio. Eahuni a cas me itö ixatua. Ame la hnei nyio hna melën, ke kola ini nyio laka, ijiji hi tro sa madrin e tro sa xatua itre xan, ngacama upi së ju hë ngöne la itre xaa götran.

Ngo e thupen, kolo hmaca a lolo trootro. Hna nue hmaca la itre huliwa së lo macatre 1998, nge nyimu itusi së hna ujëne ngöne la qene Bulgare. Ame lo 2004, hna fe la ketre Bethela ka hnyipixe. Ame enehila, traqa koi 57 lao ekalesia e Bulgarie, nge 2 953 lao ka cainöj. Ame lo 2024, 6 475 lao atr ka sine la Drai Ne Amekunën. Ame ekö, 5 hi lao trejin föe e Sofia, ngo ame enehila, 9 hë lao ekalesia! Hnei nyio hnyawa hna öhne laka, “tro hë la ala xalaith a ala nyimu.”​—Isa. 60:22.

NYIO A CILE KOWE LA ITRE XAA JOL

Hna traqa itrai la itre meci koi ni. Ame ngöne la itre macatre, nyimu tumeur ka mama theng, goi ketre fe la heng. Hnenge hna radiothérapie, nge e thupen, hna xöji ni e Inde, traqa koi 12 lao hawa. Hnene la droketre hna huletrij la ketre igötranene ka tru ne la tumeur. Hnenge hna pane mano ngöne la Bethela e Inde, me bëeke hmaca e Bulgarie.

Hna öhne fe thei Heinz la ketre mec hna hën ka hape, Huntington, ketre meci fami. Thatreine hnyawa kö nyidrëti tro me ithanata me xomehnöth la aqane ujë i nyidrë. Ngazo catr la meci nyidrë matre eni ha thupë nyidrëti e nöjei drai. Jole pala ha itre xaa ijin, matre eni a ketre hnying ka hape, tro kö ni a atreine thupë nyidrë. Eloine pe, hnene la ketre trejin trahmany, Bobi la ëjen, hna lapa ce tro me nyidrë troa cainöj. Ngacama jole koi Heinz troa ithanata me enij, ngo tha hmahma fe Bobi troa ce tro me nyidrë. E tha ijijing kö troa thupë Heinz, ke Bobi kö la. Hnenge me Heinz hna iën troa tha hetre nekönatr ngöne la fen celë, ngo kösë hnei Iehova hna hamë nekö i nyio nekötrahmany!​—Mar. 10:​29, 30.

Hna tithi nyidrëti fe hnei cancer. Nge meci hë nyidrë lo 2015. Tha mekune pi kö ni ka hape, tro nyidrëti a tro, matre jole catre ni e thupen. Ame koi ni, ka mele pala kö nyidrë! (Luka 20:38) Eni pala hi a mekune lo itre trengewekë i nyidrëti ka lolo, me itre eamo hnei nyidrëti hna hamë ni. Eni a olene koi Iehova la hna aijijë nyio troa ce huliwa koi Nyidrë ngöne la itre macatre.

ENI A OLEN KOWE LA IXATUA I IEHOVA

Eje hi, hnei Iehova hna xatua ni ngöne la nöjei itupath. Hnei Nyidrëti fe hna xatua ni, matre tha tro kö ni a lapa thaup, me troa ketre mesinare ka hnime la itre xan. (2 Tim. 1:7) Jëne la ixatua i Nyidrë, eni memine la jining a huliwa i Nyidrë drai ka pexej. Ame enehila, angeic me föi angeic a huliwa ngöne la sirkoskripsio. Nyidroti a wange trootro la itre ekalesia ka qene Serbe e Europe. Hna kapa lo itre thithi kaka ekö lo nyio a nekönatr!

Kola atingetingëne la hning la eni a ini Tusi cas. Hnenge hna inine troa “catre thith” ngöne la itupath, tune lo aqane kuca i Iesu. (Luka 22:44) Iehova a sa la itre thithing, jëne la itre trejin ne la ekalesiang ne Nadezhda, e Sofia. Angatr a amaman la ihnimi angatr me loi thiina koi ni, me hë ni lapa troa ce tro me angatr, nge celë hi ka amadrinë ni.

Eni pala hi a mekun la melehmaca. Eni a mekun la kemeng me thineng elany qëmeken la hnalapa i eahun, nge ka mingöminge nyidro tune lo ijine nyidroti a faipoipo. Ketre eni a öhne la trejin me eni a kuci xen, nge Heinz a nango cil ezine la hoosi nyidrë. Nge eni a nango goeë angatr. Aqane tro hi lai a apatrene la itre mekunang ka ngazo me amadrinëne la hning, me hetre hni ne oleng koi Iehova.

Ame la eni a mekune hmaca la meleng, memine la mele elany hnei Iehova hna thingehnaean koi së, ke casi hi la mekunang me Dravita. Öni angeic ngöne Salamo 27:​13, 14: “Ekaa ha ni, e tha öhne kö ni la ihnimi Iehova ngöne la nöj ne la itre ka mel? Mejiune jë koi Iehova; catre pi nge hni ne trahmanyi jë. Eje hi, mejiune jë koi Iehova.”