PIÖÖC 11

Ye yï Puɔ̈u Mat ë Jamdu Yic

Romai 12:11

JAM CIEKIC: Them ba kɔc piŋ yïn gɔɔt puɔ̈th ë kueer bïï yïn jam ke yï cï yï puɔ̈u mat ë jamdu yic.

Tääu yï puɔ̈u thïn. Të guiir yïn rot ba jamdu lɔ gaam, ye yïnɔm kaŋ tak ye wɛ̈tŋö thiek en yic yen ke lɔ lɛ̈k keek kënë. Ŋic rot guiir ba jamdu deetic apiɛth, ku kënë abï yïn kuɔny ba la jam kën bɛ̈nbei yï puɔ̈u.
Tak yïnɔm ë kɔc bï yïn la piŋ. Ye yïnɔm tak ye këdï lëu bïï kë ba la piɔ̈ɔ̈c kɔc kɔ̈k kuɔny. Ye yïnɔm tak aya ë kuɛɛr bïï yïn jamdu la gaam ago kɔc piŋ yïn kuɔny bïk deetic ku mïït ke puɔ̈th.
Ye jam wël bɛ̈nbei yï puɔ̈u. Ye yï puɔ̈u mat ë jamdu yic. Ye ciɛnku luöi bïï yïn käŋ thɔ̈ɔ̈ŋ, kä jääm ke yiic, ku ye nyuɔɔth yï nyin aya, ye këdï ye raan daai të cïï yen puɔ̈u riääk awu të mit yen puɔ̈u.

Të jiɛɛm yïn kɔc nïïm, duk käŋ ë thɔ̈ɔ̈ŋ tën tök ëbën, wɛ̈tŋö, alëu bï kɔckun piŋ yïn cɔl akuc yï deet ke ye yen të ye yïn jiɛɛm thïn. Ye käŋ ŋiɛc thɔ̈ɔ̈ŋ kueer piɛth. Ye jam ke yï tuc guöp të nɔŋ en kë thiekic wïc ba lueel, kë wën lëu bï kɔc piŋ yïn kuɔny bïk tääu pïïrdenic. Duk jam ke yï tuc guöp ë jamdu yic ëbën, wɛ̈tŋö alëu bï kɔc piŋ yïn cɔl adɛ̈k.