Wan biifi gi Titesi

1 A biifi ya komoto a Pawlesi di de wan saafu fu Gadu. Mi a wan apostel fu Yesesi Kelestesi di abi aseefi biibi enke den sama di Gadu seefi kai. Mi kon sabi finifini san a den tuu toli fu Gadu di abi fu du anga a fasi faw mu dini en fayafaya. 2 Den sani ya abi fu du anga a howpu di wi abi fu libi fu teego. Na a sani ya a Gadu di á poi lei paamisi u senten kaba. 3 Ma di a yuu fu Gadu doo, a meke sama kon sabi a wowtu fi en. Mi e paati a wowtu ya leti enke fa Gadu, a Sama di e fii wi sende mi fu du. 4 Mi e sende a biifi ya gi Titesi di de enke mi pikin aini a biibi.

Meke a bun-ati anga a freide fu u Dda di de a hemel, anga Kelestesi Yesesi di fii wi, de anga i.

5 Mi fika yu a Kreita fu seeka den sani di nai go bun, anga fu poti owluman aini ala den foto tu enke fa mi be taigi i. 6 Wan owluman mu de wan sama di taawan á poi fende fowtu neen, a mu abi wan uman namo. Den pikin fi en mu de bakaman fu Kelestesi, sama á mu sabi den enke pikin di e libi wan yayolibi efuso pikin di nai teke taki. 7 Wan sama di e teke fesi aini a kemeente a wan futuboi di e luku a osu fu Gadu, neen meke sama á mu poi fende fowtu neen, aa mu e du san enseefi wani, en ati á mu e boon gaw, aa mu e diingi duungu, aa mu e du ogii anga taawan, aa mu de wan sama di lobi moni efuso di e suku wini gi enseefi. 8 Ma a mu lobi kai sama kon neen osu, a mu lobi du bun gi taawan, a mu de anga kiin fusutan, a mu e du sani a wan letifasi, a mu e du sani enke fa Gadu wani ala yuu, a mu poi dwengi enseefi. 9 Te ai leli taawan, a mu e wooko finifini anga den tuu leli di sama sa fitoow, a so aw poi gi taawan taanga-sikin anga a tuu leli. Boiti dati, aw poi poti sama a pasi te den e taki sani di nai kai anga den tuu leli.

10 Bika sama lai di nai teke taki, taawan e taki soso taki. Sama de tu di e koli taawan, moomoo den sama di e fende taki wan sama mu besnei* namonamo. 11 I mu tapu den sama ya mofu, bika den e poli hii osufamii anga den falisi sani di den e leli den, fu di den wani fende wini a wan fasi di á bun. 12 Wan fu den polofeiti* fu Kreita seefi be taki: ‘Den sama fu Kreita lobi lei, den de enke ogii meti. Den lesi, da den e nyan ipi.’

13 A sani di a taki a tuu. Neen meke i mu e poti den sama ya a pasi ala yuu fu den biibi sa taanga, 14 da den naw poti pakisei a den anainsitoli fu den Dyu, anga den weiti fu libisama di nai kai anga a tuu leli. 15 Ala sani kiin gi sama di kiin, ma nawan sani e kiin gi tyobo sama efuso sama di naabi biibi, bika den fusutan anga den kosensi tyobo. 16 Den e taigi ala sama taki den sabi Gadu, ma den sani di den e du e soi taki den á sabi en. Bika a soso tyobo sani den e du, den nai teke taki, den á bun fu du nawan sowtu bun sani.