Du fu tu biifi gi Timotiyesi
3 Ma sabi taki aini den lasiti dei muliki ten o de di o taanga fu pasa. 2 Libisama o go e denki denseefi namo. Den o lobi moni. Den o lobi gafa. Den o abi heimembee. Den o go e taki ogii fu Gadu anga taawan. Pikin naw go e teke mma anga dda taki. Sama naw sabi kiyoo. Den o gwe fika taawan*. 3 Den naw lobi taawan*. Den naw wani meke kuudei. Den o go e lei gi taawan. Den naw poi dwengi denseefi. Den o abi ogii-ati. Den naw lobi bun sani. 4 Den o go e konkuu. A san denseefi wani namo den o go e du. Den o si enke den bun moo taawan. Den o lobi piisii pe fu den lobi Gadu. 5 Den o taki den e dini Gadu, ma den libi o soi taki den nai dini en. Ya mu e paa anga den sowtu sama ya. 6 Aini den sama ya, man o de di o du enke den a bunbun sama, da den o go aini osufamii fu koli den swaki uman di lai sondu efuso di á man basi den fii fu den. 7 Den uman ya e teke leli ala yuu, ma toku den á poi sabi a tuu leli finifini.
8 Leti enke fa Yanes anga Yambres á be wani wooko anga san Mosesi taki, a letiso den man ya á wani wooko anga a tuu leli. A soso poli sani den e denki. Gadu nai piisii anga den, bika den nai tyai denseefi enke fa a tuu biibi e soi. 9 Den man ya naw poi go doo anga a libi fu den, bika ala sama o si kiin taki den don leti enke Yanes anga Yambres. 10 Ma i dati poti pakisei finifini a den sani di mi leli i, a fasi fa mi e libi, den sani di mi wani du, a biibi fu mi, a pasensi fu mi, a lobi fu mi anga a fasi fa mi e holidoo. 11 Boiti dati, i sabi den sani di miti mi, anga a fasi fa mi nyan pina na Antiokiya, Ikoniyum anga Listra. Winsi fa den sani ya miti mi, mi holidoo. Masaa puu mi aini ala den sani di miti mi. 12 Fu taki en kiin, solanga wan sama e meke moiti fu dini Gadu fayafaya enke bakaman fu Kelestesi Yesesi, sama o du ogii anga en. 13 Ma ogiiman anga bidiigiman o kon moo ogii dei fu dei. Den o go e koli sama, da sama o go e koli den baka.
14 Ma i mu tan wooko anga den sani dii leli. A di sama soi i finifini taki den sani ya a tuu, meke i biibi den. I sabi sama leli i den sani ya tu. 15 Fanafu dii de beibi, neen den e leli i san sikiifi aini den santa buku fu Gadu. A den leli ya o meke i koni, fu Gadu sa fii yu fu di ye biibi Kelestesi Yesesi. 16 A Gadu seefi meke sama sikiifi ala den sani di de aini den Santa Buku fi en. Den sani di a meke den sikiifi, bun fu leli sama, fu poti sama a pasi, anga fu seeka sani. Den e yeepi sama fu libi a wan letifasi tu. 17 A so a sama di e dini Gadu naw mankei nawan sani. Aw de seekaseeka fu du ala sowtu bun wooko.