Den sani di Yohanisi sikiifi
3 Wan Faliseiman be de di den be e kai Nikodeimus. A man ya a be wan fesiman fu den Dyu. 2 A man ya be kon luku Yesesi a neti neen a taigi en taki: ‘Leliman, u sabi taki a Gadu sende i kon fu leli sama, bika nawan sama poi du den wonduu di ye du efu Gadu á de anga en.’ 3 Neen Yesesi taigi en taki: ‘I sa biibi mi, efu wan sama á meke baka, a naw poi go aini Gadu Kownukondee.’ 4 Neen Nikodeimus taigi en taki: ‘Fa wan gaangaan sama o du man meke baka? Aw poi go aini en mma bee fu a meke en ete wan leisi?’ 5 Yesesi taigi en taki: ‘A meke di wan sama o meke baka, a di aw fende a santa yeye fu Gadu, da a dopu aini wataa. Biibi mi, efu wan sama á meke baka na a fasi ya, a naw poi go aini Gadu Kownukondee. 6 Efu a wan libisama meke i, da ya wan libisama. Ma efu na a yeye fu Gadu meke i, da ya wan pikin fu Gadu. 7 Ya mu foondoo di mi taigi i taki u mu meke ete wan leisi. 8 A winta e wai go a pe a wani. Ye yee fa a winta e wai, ma toku i nai sabi pe a komoto efuso pe ai go. A so sani e waka anga den sama di a yeye meke.’
9 Neen Nikodeimus akisi en taki: ‘Fa den sani ya o du man pasa?’ 10 Yesesi taigi en taki: ‘Ya wan leliman fu Islayeli, neen ya sabi den sani ya? 11 Biibi mi, a den sani di u sabi we taki. A den sani di u si, we taigi taawan, toku u nai biibi den sani di we taigi u. 12 A fu den sani di de a goontapu mi e taigi u, neen u nai biibi. Da a di mio taigi u sani fu hemel wo biibi? 13 Nawan sama opo go a hemel, boiti a Manpikin fu libisama di saka komoto a hemel. 14 Leti enke fa Mosesi be opo a sineki go a tapu aini a sabana, a so sama o opo a Manpikin fu libisama go a tapu, 15 fu ala sama di e biibi en sa fende teego libi.
16 Gadu be lobi a goontapu te, neen a sende en wan kodo Manpikin kon dede gi u, da iniiwan sama di e biibi en naw dede, ma den o fende teego libi. 17 Bika Gadu á be sende en Manpikin kon a goontapu fu kuutu sama, ma a sende en kon fu fii den. 18 A naw sitaafu den sama di e biibi en Manpikin. Ma a taki kaba taki aw sitaafu iniiwan sama di nai biibi a wan kodo Manpikin fi en. 19 A faya di e kiin peesi kon a goontapu, ma libisama lobi a dunguu moo a faya, bika den e du omen ogii. Neen meke Gadu o sitaafu den. 20 A sama di e du ogii e buuse a faya, a nai wani kon aini a kiin fu sama si sowtu ogii ai du. 21 Ma a sama di e du bun sani e kon aini a kiin fu sama si taki ai du sani enke fa Gadu wani.’
22 Bakadati Yesesi anga den bakaman fi en go na a pisi kondee fu Yudeya. En anga den be de ape wantu dei. Den be e dopu sama tu. 23 Yohanisi seefi be e dopu* sama a wan peesi den e kai Enon, koosube fu Salim. Ape be abi tyaipi wataa, neen meke a omen sama be e kon neen da a be e dopu den. 24 A ten de Yohanisi á be de a dunguu-osu ete.
25 Den bakaman fu Yohanisi be e takitaki anga wan Dyu fu den gwenti fu den di e soi fa wan sama mu kiin enseefi. 26 Bakadati den go a Yohanisi neen den taigi en taki: ‘Leliman, i be taigi u fu a man di be de anga i na abaase fu Yordaan liba. Nownow ai dopu sama oo, ala den sama e go neen.’ 27 Yohanisi piki den taki: ‘Nawan sama poi fende wan sani efu a ná Gadu di de a hemel seefi gi en a sani de. 28 Useefi yee di mi be taki: “Mi a ná a Kelestesi. A sende Gadu sende mi fu waka neen fesi.” 29 Na a man di e toow abi a uman. Ma te a mati fu a man di e toow taampu neen se, ai piisii te a yee fa en mati e taki anga a uman fi en. A letiso miseefi e piisii. 30 A wooko fi en mu e go a fesi, ma du fu mi mu e go a baka.’
31 A sama di komoto a tapu hei moo ala sama. Ma a sama di de a goontapu, a fu goontapu. Ai taki fu den sani di de a goontapu ya tu. A sama di komoto a hemel hei moo ala taa sama. 32 Ai taki fu den sani di a si anga den sani di a yee, ma nawan sama wani biibi den sani di ai taki. 33 Iniiwan sama di e biibi den sani di a taki, e biibi tu taki den sani di Gadu e taki a tuu. 34 A sama di Gadu sende e taki san Gadu taigi en, bika Gadu nai mombii sama a santa yeye fi en. 35 A Dda lobi a Manpikin, a poti ala sani aini en ana. 36 A sama di e biibi a Manpikin, o fende teego libi, ma a sama di nai aliki a Manpikin naw fende a libi, bika a atiboon fu Gadu o fika neen tapu.