Toli fu den Apostel

2 A dei fu a Pinksterfesa, ala den bakaman fu Yesesi be de na a wan peesi. 2 Den be sidon aini wan osu, neen wanboowanboo so den yee wan sani enke wan gaan taanga winta e wai komoto a hemel. Den be e yee a sani ya aini a hii osu. 3 Neen den si wantu pikin sani di gei faya. Ibiiwan fu den sama di be de ape be abi wan fu den sani ya neen ede tapu. 4 A kaakiti fu Gadu kon na ala den tapu, neen den bigin taki omen sowtu tongo. Na a kaakiti fu Gadu be meke den taki den tongo ya.

5 A ten de den Dyu di be e dini Gadu be komoto na ala se fu goontapu kon a Yelusalem. 6 Neen meke di den yee a babali, den booko gwa pe den bakaman fu Yesesi be de. Den foondoo taki den bakaman be poi taki a mamabee tongo fu ala den sama di be kon ape. 7 Den foondoo te neen den akisi denseefi taki: ‘Ala den sama di e taki ya, a ná Galileyasama noh? 8 Da fa a du kon taki ala we yee u mamabee tongo? 9 Den sama di de ya a Partiyasama, Mediyasama, Elamsama, sama fu Mesopotamiya, Yudeya, Kapadosiya, Pontus, a pisi fu Asiya, 10 Frigiya, Pamfiliya, Egepte, a pisi fu Libiya di de koosube fu Sireine, sama di komoto a Rome, wantu Dyu anga taa kondee sama di teke a Dyu biibi. 11 Sama fu Kreita anga Arabiya de ya tu. U yee fa den taki aini u eigi mamabee tongo fu den gaan sani di Gadu du.’ 12 Ala den be foondoo, neen meke den be e akisi denseefi taki: ‘San a sani ya wani taki?’ 13 Ma son sama be e soso den. Den be e taki: ‘A duungu den duungu.’

14 Ma Peitilisi anga den taa elufu apostel opo, neen a taki: ‘Den sama fu Yudeya anga ala den taa sama di e tan a Yelusalem, wi aliki mi bun, u poti pakisei a den sani di mio taki. 15 A ná san we denki de oo, den sama ya á duungu, a neigin yuu mamanten u de. 16 Ma a sani di e pasa ya, a san Gadu be meke polofeiti Yoweli sikiifi. 17 A be sikiifi: “Gadu taki, ‘aini den lasiti dei mio meke ala sowtu sama fende a yeye fu mi, da den manpikin anga den umanpikin fu wo taki polofeititoli, den yonkuman o si fisyun, den man di gaandi kaba o deen apaiti deen. 18 Den mansaafu anga den umansaafu fu mi seefi o fende a yeye fu mi, da denseefi o taki polofeititoli. 19 Mio du wonduu a hemel anga goontapu, den o si buulu, faya anga somoko. 20 A san o dunguu pii, a mun o lebi enke buulu fosi a gaan dei fu Yehofa* doo. 21 Iniiwan sama di e kai Yehofa* nen o fende libi.’”

22 Den sama fu Islayeli, wi aliki mi: Leti enke faw sabi, da a Gadu be sende Yesesi fu Nasaleti kon aw. Gadu meke a du omen wonduu aw mindii. 23 Na a man ya u be kisi tyai go gi takuu-ati sama fu sipikii en a wan ponsu. A Gadu seefi gi pasi fu sani waka so, bika a be sabi a fesi kaba taki a sani ya be o pasa. 24 Ma Gadu weki en baka, a puu en a dede ana, dede á be poi holi en fika ape. 25 David be taki a sani ya fu Kelestesi. A be taki: “Ala yuu mi e si Yehofa* a mi fesi, a de a mi leti-ana, neen meke noiti mio buuya. 26 A sani ya e meke mi ati e piisii, den sani di mi e taki seefi e soi taki mi e piisii gaan piisii. Mi hii libi mio fitoow i, 27 bika i naw fika mi aini Geebi. Noiti mi fika i, neen meke i naw fika a sikin fu wan sama di e tan holi a yu fu poli. 28 I soi mi a pasi di e gi libi, mio piisii gaan piisii, bika i fende mi bun.”

29 Den baala ya, mio taki kiin anga u fu wi afo David. A dede te den beli en, ma en geebi de a wi ya ete te enke a dei fu tide. 30 En a be wan polofeiti, Gadu be paamisi en taki a be o poti wan bakapikin fi en na a kownusutuu. Fu di a be sabi a sani ya, 31 meke a be taki Kelestesi be o weki baka. A be taki tu taki Gadu á be o fika en aini Geebi, en sikin á be o poli tu. 32 Gadu weki a Yesesi ya baka tuu. Ala u di de ya si a sani ya. 33 Neen meke Yesesi go sidon na a leti-ana fu Gadu a hemel. Boiti dati, a fende a santa yeye di Gadu be paamisi en. Na a santa yeye ya a sende gi u leti enke fa we yee anga fa we si. 34 David á gwa hemel, ma enseefi be taki: “Yehofa* taigi mi Masaa taki: ‘Sidon a mi leti-ana 35 te enke mi poti ala den feyanti fii ai futu ondoo.’” 36 Neen meke ala den Islayelisama mu sabi taki Gadu poti Yesesi enke Masaa anga Kelestesi. Na a Yesesi ya u kii di u sipikii en a wan ponsu.’

37 Di den yee san a taki, den fii en te aini den ati, neen meke den akisi Peitilisi anga den taa apostel taki: ‘Baala, saw mu du?’ 38 Peitilisi taigi den taki: ‘U daai u libi, daw dopu aini a nen fu Yesesi fu u sa fende paadon fu u sondu. Da wo fende a santa yeye di Gadu e gi sama fu soso. 39 Bika na a sani ya Gadu paamisi u, den pikin fu u, ala den sama di de a faawe, anga den sama di u Gadu Yehofa* kai.’ 40 Peitilisi leli den omen taa sani finifini, a be e gi den taanga-sikin taki: ‘Ná mosoo anga den ogii sama moo, da wo tan a libi.’ 41 Neen ala den sama di teke san Peitilisi taigi den anga den hii ati, dopu. A wan sani fu 3000 sama toon Yesesi bakaman a dei de. 42 Den be e poti pakisei ala yuu a den sani di den apostel be e leli den, den be lobi paati san den be abi anga denseefi. Den be e nyan makandaa, den be e begi makandaa tu.

43 Den apostel bigin du omen foondoo sani anga omen wonduu. Ala sama be e si den sani ya, neen meke den bigin lesipeki Gadu. 44 Den sama di toon Yesesi bakaman be kon a wan. Den be e paati ala san den be abi anga denseefi. 45 Den be e seli den goon fu den anga ala den sani di den be abi, da den be e paati a moni. A so iniiwan sama be e fende san a be abi fanowdu. 46 Ala dei den be e kon makandaa aini a tempel. Den be e kai denseefi kon a osu fu nyan makandaa. Den be e piisii fu nyan a denseefi osu. Den be e paati san den be abi fu nyan anga den hii ati. 47 Den be e gafa Gadu, ala sama be lobi den. Dei fu dei Yehofa* be e meke den sama di a be e fii kon moo ipi.