Toli fu den Apostel

3 Wan sani fu dii yuu bakadina, Peitilisi anga Yohanisi be e go aini a tempel fu begi. 2 Aseefi yuu de sama be e tyai wan man di be malengii kon ape. A malengiimalengii a man ya meke. Ala dei den be e poti en koosube fu a doo fu a tempel di den e kai Moin doo, fu a be sa e begi den sama di be e kon na a tempel moni. 3 Di a si Peitilisi anga Yohanisi e go aini a tempel, a begi den moni. 4 Ma Peitilisi anga Yohanisi luku en duun, neen Peitilisi taki: ‘Opo yu ede luku u.’ 5 Neen a luku den, bika a be denki den be o gi en wan sani. 6 Ma Peitilisi taigi en taki: ‘Mi naabi solufu anga gowtu, ma mio gii san mi abi. Aini a nen fu Yesesi fu Nasaleti, opo dai waka!’ 7 Di a taki a sani ya, a holi a man neen leti-ana neen a yeepi en fu a opo. Wantenwanten a man futu betee. 8 A fee opo, neen a bigin waka go aini a tempel anga den. A be e dyombo a tapu e gafa Gadu. 9 Ala sama be e si taki a be e waka, da a be e gafa Gadu. 10 Den kon fusutan taki na a man ya be gwenti sidon e begi moni na a doo fu a tempel di den e kai Moin doo. Neen meke den foondoo di den si taki a man e waka.

11 Ala den sama lon kon a den na a peesi pe sama be sabi enke a Pasi fu Salomo, a pisiten de a man be holi Peitilisi anga Yohanisi a den ana ete. Ná pikin foondoo den sama foondoo. 12 Di Peitilisi si a sani ya, a akisi den sama taki: ‘Islayelisama, saide we foondoo di a sani ya pasa? Saide we luku u enke anga u eigi kaakiti u meke a man ya waka? U denki taki a di we dini Gadu fayafaya, neen u meke a man ya waka? 13 A Gadu fu den afo fu u Abalaham, Isaki anga Yakopu gi en futuboi Yesesi gaandi. Na a Yesesi ya u be e wisiwasi. U meke Pilatus kii en, winsi fa Pilatus seefi be wani losi en. 14 Wa be wani yee sani fu a santa man ya di á du nawan ogii, ma u meke Pilatus losi wan kiiman gi u. 15 A so u kii a sama di Gadu poti fu gi sama libi. Ma Gadu weki en baka. Mi anga Yohanisi seefi de enke kotoigi fu a sani ya. 16 Fu di we biibi Yesesi meke a man ya kon betee aini a nen fi en. Na a biibi di we biibi en meke a man di we si ya kon bun baka na ala sama fesi. 17 Den baala fu mi, mi sabi taki a di wa be sabi sama na a man ya tuutuu meke u du a sani ya leti enke den tiiman fu u. 18 Ma Gadu meke den sani ya pasa fu den sani di den polofeiti taki be sa kon tuu. Den be taki Kelestesi be o pina.

19 U daai u libi, u teke a se fu Yehofa*, da aw gi u paadon fu den sondu fu u, aw gi u kaakiti tu. 20 Aw sende a Kelestesi di a be paamisi u fu kon yeepi u, dati a Yesesi. 21 A mu tan a hemel te enke a yuu doo di Gadu o seeka ala sani, leti enke fa a be meke den polofeiti fi en fu fositen taki. 22 Mosesi be taki: “Yehofa* Gadu o poti wan fu u enke polofeiti. A sama ya o de wan polofeiti leti enke mi, u mu aliki ala san ai taigi u. 23 Gadu o kii iniiwan sama di nai aliki a Polofeiti ya.” 24 Samuweli anga ala den polofeiti di kon neen baka be taki fu a ten ya. 25 Den polofeiti be taki fu a kuudei di Gadu meke anga den afo fu wi. A kuudei ya e teli gi u tu bika Gadu be paamisi Abalaham taki: “Ai paansu o meke ala den foluku a goontapu fende belesi.” 26 Baka di Gadu weki en futuboi Yesesi, aw fosi a sende en kon. A sende en kon aw fu u sa tapu anga den ogii di we du.’