Toli fu den Apostel

4 Di Peitilisi anga Yohanisi be e taki anga den sama, neen den pilisite, a sama di be e luku a tempel, anga den Saduseiman waka kon a den. 2 Den ati be boon a den apostel fu di den be e leli sama, bika den be e taigi sama fu a weki di Gadu be weki Yesesi baka. 3 Neen meke den kisi den tyai go sooto. Den be holi den ape te enke a taa dei, bika neti be tapu kaba. 4 Ma a omen fu den sama di be aliki den a dei de be toon Yesesi bakaman. Ala anga ala, a wan sani fu 5000 mannengee be kon de aini a kemeente.

5 A taa dei fi en, den edeman fu den Dyu, den gaanwan fu a foluku anga den leliman fu a Weiti kon makandaa aini Yelusalem. 6 Anas a fesiman fu den pilisite, Kayafas, Yohanisi, Aleksander anga den famii fu Anas be de ape tu. 7 Den meke Peitilisi anga Yohanisi taampu a den mindii, neen den akisi den taki: ‘Pe u fende a kaakiti fu du a sani ya?’ 8 Neen a santa yeye meke Peitilisi taigi den taki:

‘Den tiiman anga den gaanwan fu a foluku, 9 a di u du bun gi wan lanman, meke u tyai u kon a kuutu tide? U wani sabi fa a du betee? 10 Meke mi taigi u anga ala den sama fu Islayeli taki, a man di taampu aw fesi ya kon betee aini a nen fu Yesesi Kelestesi fu Nasaleti. Na a Yesesi ya u be kii a wan ponsu. 11 A Yesesi ya na “a siton di wi di e meke a osu á be wani. Neen kon toon a moo pelensipali siton”. 12 Boiti dati, nawan taa sama á poi meke u fende a libi. Neen na a wan kodo sama di Gadu poti gi wi a goontapu fu fii wi.’

13 Den foondoo di den si taki Peitilisi anga Yohanisi á be e feele fu taki, bika den á gwa hei sikoo, den á be abi hei posisi tu. Neen den kisi denseefi taki den man ya be e waka anga Yesesi. 14 Den á be poi taki nawan sani, bika a man di den be deesi be taampu leti ape. 15 Den sende Peitilisi anga Yohanisi gwa doose fu a Sanhedrin*, neen den bendi a se. 16 Den akisi denseefi taki: ‘San wo du anga den man ya? A wan gaan wonduu den du. Wa poi taki aa pasa, bika ala sama di e tan a Yelusalem si a sani ya. 17 Kow meke den feele fu den á taki anga sama moo fu a nen fu Yesesi, da a taki ya naw paati go doo.’

18 A so den kai den neen den bali den taki: ‘Wa mu taki fu a nen ya moo. Wa mu leli sama nawan sani aini a nen fu Yesesi moo.’ 19 Ma Peitilisi anga Yohanisi piki den taki: ‘Useefi luku san Gadu e fende bun, te we aliki en efuso te we aliki u. 20 Ma wi dati á poi tan da wa taki fu den sani di u si anga den sani di u yee.’ 21 Den puu kaasi gi den ete wan leisi neen den losi den, bika den á be du nawan ogii fu den sitaafu den. Boiti dati, den be e feele den sama bika ala den be e gafa Gadu fu a sani di pasa. 22 A man di be betee be pasa 40 yali kaba.

23 Di den losi Peitilisi anga Yohanisi, den gwa den taa bakaman fu Yesesi, neen den taigi den san den fesiman fu den pilisite anga den gaanwan fu a foluku taigi den. 24 Di den yee san den taki, ala den kon a wan neen den begi Gadu. Den taki:

‘Masaa fu Hemel anga Goontapu, a yu meke hemel anga ala sani a hemel, a yu meke goontapu anga ala sani di de aini, a yu meke a ze anga ala sani di de aini. 25 I be gii futuboi David* a santa yeye fii, neen a sikiifi taki: “Saide den foluku e ligei so? Saide den e sidon pakisei sani di naabi nawan wini? 26 Den kownu fu goontapu de seekaseeka, den tiiman kon a wan fu feti anga Yehofa* anga a salufuwan fi en.” 27 Bika Herodes, Pontiyus Pilatus, den taa kondee sama, anga den Islayelisama be kon a wan aini a foto ya fu feti anga i futuboi Yesesi dii salufu. 28 Den kon makandaa fu du sai be taki a fesi. Ala den sani ya pasa fu di yu abi a makiti fu du san yu abi a pakisei. 29 We Yehofa*, luku fa den e du sani fu meke u feele. Yeepi den saafu fii fu den abi deki-ati te den e paati a wowtu fii baa. 30 Gaantangi langa yu ana naamo e deesi sama, e du wonduu naamo aini a nen fii santa futuboi Yesesi baa.’

31 Di den kaba begi, a peesi pe den be kon makandaa seke, ala den fiya be fende a santa yeye, neen den bigin paati a wowtu fu Gadu. Den á be e feele fu du a sani ya.

32 A gaan kulu sama di be toon biibiman be e denki go na a wanse, den be e libi na a wan tu. Nawan fu den be e si enke den sani di den be abi a be fu den wawan, ma den be e paati ala san den be abi anga denseefi. 33 Den apostel be e paati a nyunsu go doo taki Yesesi weki baka. Sani be e waka bun te den be e du a sani ya. Ná pikin belesi Gadu be e belesi den. 34 Nawan fu den be e pina, bika den wan di be abi dyali anga osu be e seli den, da den be e tyai a moni di den be fende 35 kon gi den apostel. Den apostel be e paati a moni, da den be e gi ala sama san den be abi fanowdu. 36 Yowsefu di den apostel be e kai Barnabas (a nen ya wani taki ‘Manpikin fu toosutu’) be abi wan pisi doti. A man ya a be wan Leifisama di be meke a Siprus. 37 A seli a pisi doti fi en neen a tyai a moni go gi den apostel.