Du fu tu biifi gi Timotiyesi

4 Di Kelestesi Yesesi o kon, aw kuutu den sama di de a libi anga den sama di dede. Aw du a sani ya di aw tii a Kownukondee fi en. Mi e taigi yu a Kelestesi Yesesi anga Gadu fesi taki: 2 I mu paati a wowtu. I mu e du a sani ya fayafaya aini bun ten anga taanga ten. Poti taawan a pasi, wasikoi den, gi den taanga-sikin. I mu e du den sani ya anga pasensi, leti enke wan bun leliman. 3 Bika wan ten o kon di sama naw wani yee sani fu a tuu leli. Den o du san denseefi wani, neen meke den o suku sama di o leli den sani di e switi den yesi. 4 Den naw wani aliki den tuu leli moo, a soso lei toli den o go e aliki. 5 Ma i mu de anga kiin fusutan ala yuu. I mu de kabakaba fu nyan pina, fu du a wooko fu wan peleikiman anga fu dini Gadu fayafaya.

6 Bika mi de enke wan diingi ofaandi di kandi towe na a altari. A yuu di mio fii de koosube. 7 Mi feti a bun feti, mi lon a siteelon te na a kaba, mia komoto a biibi. 8 Nownow, a Masaa di e kuutu sani a wan letifasi seeka wan kownu-ati gi mi. A den sama di e libi a wan letifasi o fende en. Aw gi mi a kownu-ati ya enke wan paiman na a kuutu dei. A ná mi wawan o fende a paiman ya, ma ala den sama di e angii fu a kon, o fende en tu.

9 Gaantangi meke moiti kon a mi esi-esi. 10 Deimas gwe fika mi, bika a lobi den sani fu a goontapu ya. A gwa Tesalonika, Kresens gwa Galasiya, Titesi gwa Dalmasiya. 11 A Lukasi wawan de anga mi ya. Tyai Malikisi te ye kon, bika a sa yeepi mi anga a wooko di mi e du gi Gadu. 12 Mi sende Tikikus gwa Efeise. 13 Te ye kon, tyai a dyakiti di mi be fika a Trowas, a Karpus osu gi mi baa. Tyai den bukulolo gi mi tu, moomoo den wan di meke anga metibuba.

14 Aleksander di e meke sani anga kopoo du omen ogii anga mi, ma Yehofa* o pai en fu den sani di a du. 15 Iseefi mu luku bun anga en, bika a omen sani a du fu tapu sama fu biibi a bosikopu di we paati.

16 A fosi leisi di mi gwa kuutu, nawan sama á be holibaka gi mi, ala den gwe fika mi. Meke Gadu gi den paadon. 17 Ma Masaa á fika mi, a gi mi kaakiti fu mi paati a wowtu finifini fu sama na ala se be sa yee a bosikopu ya. A puu mi aini a lew mofu. 18 Masaa o kibii mi fu nawan ogii á miti mi, aw fii mi fu mi sa go aini a Kownukondee fi en a hemel. Masaa mu fende gaandi fu teego, eeye fu ala ten. Amen.

19 Gi Priska anga Akwila, anga den sama aini a osu fu Oneisiforus odi gi mi.

20 Erastus fika a Korente. Mi fika Trofimus a Mileite bika a be siki. 21 Meke moiti fu doo ya fosi a koo ten fu a yali.

Ebilus, Pudens, Linus, Klawdiya anga ala den taa baala sende odi gii.

22 Meke Masaa de anga i fu a fasi fa ye tyai iseefi. A bun-ati fi en mu de anga ala u.