Den sani di Yohanisi sikiifi
21 Bakadati Yesesi meke den bakaman si en ete wan leisi di den be de na a ze fu Tiberiyas. A toli waka so: 2 Simon Peitilisi, Tomas (di den e kai a Twelengi), Nataniyeli fu a foto Kaana aini Galileya, den manpikin fu Sebedeyus, anga ete tu taa bakaman fu Yesesi be de a wan peesi. 3 Simon Peitilisi taigi den taki: ‘Mi e go kisi fisi.’ Den taawan taigi en taki: ‘Wo kon anga i.’ A so den go aini a boto, neen den gwe. Ma a neti de, den á kisi nawan sani.
4 A fuuku mmanten, Yesesi kon taampu a wataa mofu, ma den á be fusutan taki neen de ape. 5 Yesesi akisi den taki: ‘Mi mati, wi abi wan sani fu nyan?’ Den taigi en taki: ‘Nono.’ 6 A taigi den taki: ‘Wi iti a seepi go na a letise fu a boto da wo kisi fisi.’ Di den iti a seepi, den á be poi hali en kon aini a boto bika den fisi be ipi. 7 A bakaman di Yesesi be moo lobi taigi Peitilisi taki: ‘A Masaa oo!’ Simon Peitilisi á be wei koosi, neen meke di a yee san a taawan taki, a wei en dyakiti, neen a dyombo go aini a wataa. 8 Ma den taa bakaman di be fika aini a boto hali a seepi anga ala den fisi kon a se, bika den á be de faawe moo. Den be de wan sani fu 100 meiti fu a lanpeesi.
9 Di den doo lanpeesi, den si fisi a tapu faya. Beele be de tu. 10 Yesesi taigi den taki: ‘U tyai wantu fu den fisi di u kisi dyonson de kon.’ 11 Simon Peitilisi go aini a boto neen a hali a seepi anga den somen fisi kon a soo. A 153 gaan fisi be de aini a seepi, toku a seepi á piiti. 12 Yesesi taigi den taki: ‘U kon nyan.’ Nawan fu den bakaman fi en be abi ati sai fu akisi en sama neen, bika den be sabi taki a Masaa. 13 Yesesi teke a beele, neen a gi den. A du aseefi sani anga a fisi. 14 A leisi ya a be a du fu dii leisi di Yesesi meke den bakaman fi en si en, di a kon a libi baka.
15 Di den kaba nyan, Yesesi akisi Simon Peitilisi taki: ‘Simon, manpikin fu Yohanisi, i lobi mi moo den sani ya?’ Simon taigi en taki: ‘Eeye Masaa, i sabi taki mi lobi i.’ Neen Yesesi taigi en taki: ‘Gi den pikin sikapu fu mi nyanyan.’ 16 A akisi en ete wan leisi taki: ‘Simon, manpikin fu Yohanisi, i lobi mi?’ Simon taigi en taki: ‘Eeye Masaa, i sabi taki mi lobi i.’ Neen Yesesi taigi en taki: ‘Gi den pikin sikapu fu mi nyanyan.’ 17 Yesesi akisi en du fu dii boo taki: ‘Simon, manpikin fu Yohanisi, i lobi mi?’ Tyali kisi Peitilisi di Yesesi akisi en du fu dii boo taki: ‘I lobi mi?’ Neen meke a taigi Yesesi taki: ‘Masaa, i sabi ala sani, i sabi taki mi lobi i.’ Yesesi taigi en taki: ‘Gi den pikin sikapu fu mi nyanyan. 18 Mi e taigi i taki: Dii be yonkuu, a iseefi be e wei i koosi dai go a pei wani. Ma di yo gaandi, na ana yo opo da wan taa sama wei koosi gii da a tyai i go a pe ya wani go.’ 19 A taki a sani ya fu soi fa a dede fu Peitilisi be o meke Gadu fende gaandi. Baka di a taki a sani ya, a taigi en taki: ‘Tan waka a mi baka.’
20 Di Peitilisi daai, a si taki a bakaman di Yesesi be moo lobi be de a den baka. Na aseefi bakaman ya be sidon koosube fu Yesesi di den be sidon e nyan na a neti. Neen be akisi en taki: ‘Masaa, sama o konkuu i?’ 21 Di Peitilisi si en, a akisi Yesesi taki: ‘Masaa, da a man de noh?’ 22 Yesesi taigi en taki: ‘Efu mi wani a tan a libi te enke mi daai kon baka, ya mu booko yu ede anga a pisi de. Sai mu du, a tan i mu tan waka a mi baka.’ 23 Na a sani ya meke den taawan be e taki a bakaman ya á be o dede. Ma Yesesi á be taigi den taki a bakaman ya á be o dede. A be taki: ‘Efu mi wani a tan a libi te enke mi daai kon baka, ya mu booko yu ede anga a pisi de.’
24 Na a bakaman ya si den sani ya, neen a sikiifi san a si. U sabi taki den sani di a taki a tuu.
25 A omen taa sani Yesesi du, ma efu sama be mu sikiifi ala den sani ya finifini, mia denki peesi be o de a goontapu fu holi ala den bukulolo de.