Den sani di Mateyesi sikiifi
28 Baka a Sabadei, na a fuuku mmanten fu a fosi dei fu a wiki, Maliya Makdalena anga a taa Maliya kon luku a geebi.
2 A doti seke, bika wan engel fu Yehofa be saka komoto a hemel. A lolo a siton di be de na a geebi mofu puu, neen a sidon neen tapu. 3 A be e beenki enke te faya e koti a tapu. En koosi be weti fann. 4 Den wakitiman be e feele te neen ala den sikin bigin dansi. Bakadati den fika dinng.
5 A engel taigi den uman taki: ‘U naafu feele, bika mi sabi taki a Yesesi di sama be sipikii a wan ponsu we suku. 6 Ma aa de ya, bika a weki baka enke fa a be taki. U kon luku pe a dedesikin fi en be de. 7 Daw go esi-esi go taigi den bakaman fi en taki a weki baka. Taigi den taki a de a pasi e gwa Galileya. Wo si en ape. Na a bosikopu ya mi be mu gi u.’
8 Den uman be e feele, ma den be e piisii tu. Den á daaidaai fu lon go taigi den bakaman fu Yesesi san pasa. 9 Ma di den de a pasi, Yesesi waka kon miti den neen a gi den odi. Den waka go neen, neen den sutu kini a doti neen fesi. 10 Yesesi taigi den taki: ‘Ná feele. U go taigi den baala* fu mi taki den mu gwa Galileya, da den o si mi ape.’
11 Di den uman de a pasi, wantu fu den suudati di be e holi wakiti go aini a foto, neen den taigi den fesiman fu den pilisite ala san pasa. 12 Baka di den fesiman fu den pilisite anga den gaanwan fu a foluku taki fiti, den gi den suudati tyaipi moni, 13 neen den taigi den taki: ‘U mu taigi sama taki den bakaman fi en kon a neti di we siibi, neen den fufuu a dedesikin fi en. 14 Efu a taki doo a gaanman, u naafu booko wi ede, wo taki anga en.’ 15 Den suudati teke a moni, neen den du leti enke fa den taigi den. Na a lei ya den Dyu e paati te anga a dei fu tide.
16 Ma den 11 bakaman fu Yesesi gwa Galileya na a mongo di a be taigi den. 17 Di den si en, den sutu kini a doti gi en gaandi, ma son wan fu den á be e kaba biibi taki neen. 18 Yesesi waka kon a den neen a taigi den taki: ‘Gadu gi mi ala makiti a hemel anga goontapu. 19 Neen meke u mu gwa sama fu ala kondee, daw meke den toon mi bakaman. U mu dopu den aini a nen fu a Dda, a Manpikin, anga a santa yeye. 20 Leli den fu du ala den sani di mi taigi u, da wo si taki mio de anga u ala yuu, te enke a kaba fu a goontapu doo.’