Wan biifi gi den Romesama

3 Sowtu wini a abi efu wan sama a wan Dyu? Sowtu wini sama e fende te den besnei*? 2 A omen wini a abi. Na a fosi peesi, a den a den sama di Gadu gi den santa buku fi en. 3 Ma kow taki son wan fu den Dyu nai biibi noh? Daw si enke a di den nai biibi meke Gadu naw du san a paamisi? 4 Noiti! Winsi ala sama e lei, tokuso noiti Gadu e lei. A sikiifi aini en wowtu taki: ‘Den sani di ye taki o meke sama sabi taki ye du sani a wan letifasi. Neen meke yo wini te den kai ya kuutu.’ 5 Efu a du di we du sani di á bun e meke libisama si taki Gadu e du sani a wan letifasi, da dati wani taki a wan ogii Gadu e du te ai sitaafu u? (A so omen sama e denki.) 6 Nono! Efu Gadu nai du sani a wan letifasi, da fa aw kuutu a goontapu?

7 Ma efu a lei mi e lei, neen a lei di mi meke e soi taki den sani di Gadu taki a tuu, neen libisama e gafa en fu den sani de, da saide Gadu e kai mi wan sondu sama? 8 Saide u nai taki ‘meke u du ogii fu a ogii sa tyai wan bun’? Son sama e lei gi u taki a dati we taki. A sitaafu di den sama ya o fende o fiti den.

9 Da a bun u bun moo den taa kondee sama? Nono! Bika u be taki kaba taki den Dyu anga den Giikisama a saafu fu sondu. 10 A sikiifi aini Gadu buku taki: ‘Nawan sama e libi a wan letifasi, nawan kodo seefi. 11 Nawan sama e fusutan sani kiin, nawan sama e meke moiti fu kon sabi Gadu. 12 Ala sama daai baka gi Gadu. Ala den toon wisiwasiman. Nawan fu den e du bun sani. Nawan kodo seefi.’ 13 ‘Den golingo* de enke wan geebi di de opo-opo. Den e bidiigi taawan anga den mofu.’ ‘Den sani di den e taki de enke a bita fu wan takuu sineki.’ 14 ‘A soso fuuku e komoto aini den mofu. A soso ogii-ati sani den e taigi taawan.’ 15 ‘Den e feti fu lon go kii sama.’ 16 ‘Ala pe den go den e poli sama libi, den e gi sama booko-ede. 17 Den á sabi fa fu libi bun anga taawan.’ 18 ‘Den naabi nawan doopu lesipeki gi Gadu.’

19 U sabi taki ala den sani di a Weiti e taki e teli gi den sama di e wooko anga a Weiti. Neen meke nawan fu den sama ya poi taki anga leti taki den naabi sondu. A so meke Gadu o sitaafu a hii goontapu. 20 Neen meke a ná te wan sama e du san a Weiti e taki, da Gadu o si en enke wan sama di e libi a wan letifasi. Bika na a Weiti meke u kon fusutan taki wi a sondu sama.

21 Ma now u kon fusutan taki winsi wan sama nai holi a Weiti, tokuso Gadu poi si en enke wan sama di e libi a wan letifasi, leti enke fa a Weiti anga den buku fu den Polofeiti e taki. 22 Gadu e si ala den sama di e biibi Yesesi Kelestesi enke sama di e libi a wan letifasi, bika a nai paatibee. 23 Ala sama sondu, nawan fu den poi de sondee fowtu enke Gadu. 24 Toku Gadu e si den enke sama di e libi a wan letifasi fu di Yesesi Kelestesi pai a paiman fu fii wi. A sani ya a wan kado di Gadu gi libisama fu di a abi bun-ati. 25 Gadu gi Kelestesi enke wan ofaandi, fu ala sama di e biibi taki Yesesi pai a paiman gi u anga en buulu, sa kon bun baka anga Gadu. Gadu be du a sani ya fu soi taki ai du sani a wan letifasi di a pasensi anga den, anga di a gi den paadon fu den sondu di den du aini a ten di pasa. 26 A soi taki ai du sani a wan letifasi fu di ai si den sama di e biibi Yesesi enke sama di e libi a wan letifasi.

27 Daw si enke u mu gafa? Nono. U si enke u mu gafa fu di we wooko anga san a Weiti e taki? Nono. A wan kodo sani di u sa gafa fi en, a te we wooko anga a weiti di e soi taki wan sama mu e biibi. 28 Bika u sabi taki a ná te wan sama e du san a Weiti e taki da Gadu e si en enke wan sama di e libi a wan letifasi, ma a te ai biibi. 29 En na a Gadu fu den Dyu wawan? En a ná a Gadu fu den taa kondee sama tu noh? 30 A wan tuu Gadu namo de, neen meke a naabi toobi efu wan sama besnei*, solanga ai biibi, Gadu e si en enke wan sama di e libi a wan letifasi. 31 Daw si enke a teli u nai teli a Weiti moo fu di we biibi? Nono! A holi we holibaka gi a Weiti.