Den sani di Mateyesi sikiifi

13 Aseefi dei de di Yesesi komoto aini a osu, a go sidon a wataa mofu. 2 Ma wan gaan kulu sama booko kon neen. Neen meke a go sidon aini wan boto. Den sama be taampu fika a soo. 3 Neen a gi den ageisitoli fu leli den tyaipi sani. A taigi den taki: ‘Wan sama be go a goon go tyatya wantu sii. 4 Di ai tyatya den sii, afu kai a sikin pasi neen foo kon nyan den. 5 Taawan kai a siton tapu, neen den bigin goo wanten, bika a doti di be de na a siton tapu á be ipi. 6 Ma di a san pii, a boon den kii, bika den á be abi lutu. 7 Taawan kai a maka ini. Ma di den bigin goo, den makabon goo tapu den. 8 Ma son sii kai a bun doti, neen den meke nyanyan. Son wan meke 100 toon, taawan 60 toon, taawan baka 30 toon moo enke san be paandi. 9 Meke a sama di abi yesi aliki bun.’

10 Den bakaman fu Yesesi kon neen, neen den akisi en taki: ‘Saide ye gi ageisitoli te ye leli den sama?’ 11 A piki den taki: ‘Aw fende a gaandi fu fusutan den santa kibiitoli* fu a Kownukondee fu hemel. Ma den sama ya á fende a gaandi ya, neen meke den nai fusutan en. 12 A sama di abi, Gadu o gi en moo, aw fende tyaipi. Ma Gadu o teke a pikinso fu a sama di naabi, puu neen ana. 13 Den e luku ma den nai si nawan sani, den e aliki ma a leti enke den nai yee, den nai fusutan nawan sani, neen meke mi e gi ageisitoli te mi e taki anga den. 14 A den sama ya polofeiti Yesaya be e taki di a be sikiifi taki: “Wo yee, ma u naw fusutan san we yee. Wo luku, ma u naw si nawan sani. 15 Bika den sama ya ati taanga enke siton. Den tapu den ain anga den yesi fu den á yee efuso si sani. Neen meke den nai fusutan san den mu du fu daai den libi fu mi deesi den.”

16 Ma we piisii, bika wi ain e si sani, u yesi e yee sani tu. 17 Biibi mi, omen polofeiti anga taa sama di be e dini Gadu be wani si den sani di we si, ma den á si den. Den be wani yee den sani di we yee, ma den á yee den.

18 Wi aliki san a ageisitoli fu a man di be e tyatya sii wani taki. 19 A sii di kai a sikinpasi, a te wan sama yee a wowtu fu a Kownukondee ma aa fusutan en. A ogiiwan e kon da ai hali en puu aini en ati. 20 A sii di kai a siton doti tapu, na a sama di yee a wowtu fu Gadu, neen a teke en wantenwanten anga piisii. 21 Ai holidoo wan pisiten, ma fu di a bosikopu á doo en ati meke te banowtu efuso tesi miti en fu di ai du san a wowtu fu Gadu taki, ai gi abaa. 22 A sii di kai a maka ini, na a sama di yee a wowtu fu Gadu, ma den booko-ede fu a goontapu anga a wani di sama e wani gudu e koli en. Den sani ya e kii a wowtu, da a sii nai meke nyanyan. 23 A sii di kai a bun doti, na a sama di yee a wowtu, a fusutan en neen a meke nyanyan. Son sama e meke 100 toon, taawan 60 toon, taawan baka 30 toon moo enke san be paandi.’

24 A gi den wan taa ageisitoli, a taki: ‘A Kownukondee fu hemel de enke wan man di paandi alisi aini en goon. 25 Ma di sama be e siibi, en feyanti kon paandi takuu uwii* a den alisi* mindii neen a gwe. 26 Di a alisi bigin goo, a meke nyanyan. A takuu uwii seefi goo. 27 Neen den saafu fu a sama di be abi a goon kon akisi en taki: “Masaa, a ná alisi i be paandi aini a goon noh? Da pe a takuu uwii ya komoto?” 28 A piki den taki: “A wan feyanti du a sani ya.” Den saafu akisi en taki: “I wani u go hali den takuu uwii puu?” 29 A taki: “Nono, bika te wo hali den puu, u sa misi hali a alisi puu tu. 30 Meke ala den tu goo te enke a yuu doo fu koti nyanyan. Da mio taigi den sama di o koti a alisi taki: ‘U puu den takuu uwii fosi, daw tei den a bosu fu boon. Bakadati daw koti a alisi tyai kon poti aini mi magisin.’”’

31 A gi den ete wan ageisitoli, a taki: ‘A Kownukondee fu hemel de enke wan mosterd sii* di wan man paandi aini en goon. 32 Neen na a moo pikin sii di de, ma te a goo da ai bigi moo ala taa guluntu bon. Ai bigi te da a toon wan gaan bon, da den foo di e fee a tapu e fende wan peesi fu tan a den taka fi en.’

33 A gi den ete wan ageisitoli, a taki: ‘A Kownukondee fu hemel de enke sowda* di wan uman mokisa anga 10 kilo bolon, neen ala a bolon soopu.’

34 A den sowtu ageisitoli ya Yesesi be e gi den sama te a be e taki anga den. Ala yuu te a be e taki anga sama, a be e gi den ageisitoli. 35 A so a sani di Gadu be meke en polofeiti taki kon tuu. A be taki: ‘Mio gi ageisitoli te mi e taki. Mio meke sama kon sabi den sani di be kibii senten di goontapu sete.’

36 Baka di a sende den sama gwe, a go aini a osu. Den bakaman fi en kon neen, neen den taki: ‘Taigi u san a ageisitoli fu a takuu uwii aini a goon wani taki.’ 37 A piki den taki: ‘A man di be paandi a alisi* na a Manpikin fu libisama. 38 A goon, na a goontapu. A alisi, a den sama* di o go aini a Kownukondee fu hemel. A takuu uwii, a den manpikin fu Didibii*. 39 A feyanti di paandi a takuu uwii, a Didibii. A yuu fu koti nyanyan a te a kaba fu a goontapu koosube. Den sama di e koti a nyanyan a den engel. 40 Leti enke fa den e hali a takuu uwii puu fu boon aini faya, a so sani o waka aini den lasiti dei fu a goontapu ya. 41 A Manpikin fu libisama o sende den engel fi en go puu den sama di e meke taawan sondu, anga den sama di e du ogii aini a Kownukondee fi en. 42 Da den o iti den go aini wan gaan faya. Den o kee da den kaw tifi te den de ape. 43 Na a ten de, den sama di Gadu fende bun o beenki enke a san aini a Kownukondee fu den Dda. Meke a sama di abi yesi aliki bun.

44 A Kownukondee fu hemel de enke wan gudu di kibii aini wan goon. Wan man fende en, neen a go kibii en. A poolo te, neen a go seli ala den sani di a be abi, neen a bai a goon.

45 A Kownukondee fu hemel de enke wan man di e waka a omen peesi e suku dii siton fu bai. 46 Di a fende wan gaan dii siton, a go seli ala den sani di a be abi wantenwanten, neen a bai en.

47 A Kownukondee fu hemel de enke wan seepi di sama towe aini a ze, neen a kisi ala sowtu fisi. 48 Di a seepi fuu, den hali en kon a soo. Den go sidon, neen den puu den bun wan poti aini sani. Ma den towe den fisi di á be bun fu nyan. 49 A so sani o waka aini den lasiti dei fu a goontapu ya. Den engel o kon puu den ogii sama a den sama di e libi a wan letifasi mindii. 50 Da den o iti den go aini wan gaan faya. Den o kee da den kaw tifi te den de ape.’

51 Neen Yesesi akisi den taki: ‘U fusutan san ala den sani ya wani taki?’ Den piki en taki: ‘Eeye Masaa.’ 52 Neen a taigi den taki: ‘Da a bun, bika iniiwan leliman di kon sabi sani fu a Kownukondee fu hemel, de enke a masaa fu wan osu, di e puu gaandi sani anga nyun sani aini en magisin.’

53 Di Yesesi gi ala den ageisitoli ya te a kaba, neen a komoto ape. 54 Di Yesesi doo a foto pe a be kiya, a bigin leli sama aini den snoga. Den sama foondoo te neen den taki: ‘Pe a man ya fende a koni ya? Sama gi en a makiti fu du den gaan wonduu ya? 55 A ná a boi fu a tembeeman de ya noh? A ná Maliya neen mma noh? Den baala fi en a Yakowbesi, Yowsefu, Simon, anga Yudas. 56 A ná wi anga ala den sisa fi en de ya noh? Da pe a fende a koni anga a makiti fu du ala den sani ya?’ 57 Neen meke den á be wani biibi en. Ma Yesesi taigi den taki: ‘Den e lesipeki wan polofeiti na ala peesi, boiti pe a kiya anga pe ai tan.’ 58 Fu di den á be e biibi en, meke Yesesi á du omen gaan wonduu na ape.