A fosi biifi gi den Tesalonikasama

5 Te we taki fu den dei anga den ten di Gadu poti, da aa de fu u sikiifi biifi gi u. 2 Bika useefi sabi taki a dei fu Yehofa* o kon enke fa wan fufuuman e kon a neti. 3 Faisi den o bali taki: ‘Nownow we libi na a wan*, ala sani e go bun’, da gaan ogii o miti den wanboowanboo leti enke fa bee e nyan wan uman di de fu meke. Den naw poi go kibii gi a ogii di o miti den. 4 Ma den baala fu mi, u dati á de a dunguu, neen meke a dei de naw doo aw tapu wanboowanboo enke fa dei e booko kon miti fufuuman. 5 Bika ala wi a manpikin fu leti. Wi a manpikin fu deiten. Wi a ná sama fu neti efuso dunguu.

6 Neen meke wa mu siibi enke fa den taa sama e siibi, ma u mu de na ain, u mu e koboloiki u fusutan. 7 Bika den sama di e siibi, a neti den e siibi, den sama di e diingi duungu, e de duunguduungu a neti. 8 Ma wi di de enke pikin fu a dei, mu koboloiki u fusutan. Meke a biibi anga a lobi di wi abi de enke wan sani di u wei fu kibii u boofu-ati. Meke a howpu fu u de enke wan suudati-ati a wi ede. 9 Gadu á kai u kon neen fu puu atiboon aw tapu, ma a kai u fu fii wi anga yeepi fu Masaa Yesesi. 10 Yesesi dede gi u, neen meke winsi u de a libi efuso u dede, wo libi makandaa anga en. 11 U mu e gi useefi taanga-sikin ala yuu, u mu tan yeepi useefi tu enke faw gwenti.

12 Den baala fu mi, mi wani begi u ete wan sani. U mu e lesipeki den sama di e wooko taanga aw mindii, bika a den e teke fesi fu du a wooko fu Masaa, a den e poti wi a pasi tu. 13 A bunbun lesipeki anga lobi u mu abi gi den, bika den e wooko taanga. Ala u mu e libi na a wan. 14 Na a taase, mi wani begi u fu wasikoi den sama di nai tyai denseefi bun. Taki switi anga den sama di lasi-ati. Holibaka gi den sama di swaki. Pasensi anga ala sama. 15 U mu luku bun fu u nai pai ogii fu ogii. Ma u mu e meke moiti fu du bun ala yuu.

16 U mu e piisii ala yuu. 17 U mu e begi ala yuu. 18 Gi Gadu daa fu ala sani, bika a dati a wani den bakaman fu Kelestesi Yesesi du. 19 Ná tapu a santa yeye fu Gadu fu wooko aini u. 20 Wa mu e si den polofeititoli* fu Gadu enke soso sani. 21 Ondoosuku ala sani luku efu a tuu, dai wooko anga san bun. 22 Tan faawe fu ala sowtu ogii.

23 Meke a Gadu fu freide seefi yeepi u fu kon moo santa. Den baala fu mi, meke a hii fasi fa we denki, u hii libi, anga u hii sikin de kiinkiin. Den mu de sondee fowtu di u Masaa Yesesi Kelestesi o kon. 24 U sa fitoow a sama di kai u, aw du san a paamisi.

25 Den baala fu mi, u mu e begi gi wi ala yuu.

26 Gi ala den baala anga sisa odi anga wan santa bosi.

27 Aini a nen fu Masaa mi wani begi u fu leisi a biifi ya gi ala den baala.

28 Meke a bun-ati fu Masaa Yesesi Kelestesi de anga u ye.