Den sani di Lukasi sikiifi

6 Wan Sabadei a be e waka pasa aini wantu alisigoon, den bakaman fi en be e piki alisi* e kuuna aini den ana e nyan. 2 Di den Faliseiman* si a sani ya den taki: ‘Saide den bakaman fii nai holi a weiti fu a Sabadei?’ 3 Ma Yesesi piki den taki: ‘Noiti wa leisi san David du di angii be e kii en anga den man fi en noh? 4 A go aini a osu fu Gadu, a teke den beele di den be poti enke ofaandi gi Gadu neen a nyan. Bakadati a gi den man fi en fu denseefi nyan. Ma a Weiti be e soi taki a den pilisite wawan be abi a leti fu nyan den beele ya.’ 5 Bakadati a taigi den taki: ‘A Manpikin fu libisama na a Masaa fu a Sabadei.’

6 Wan taa Sabadei, Yesesi go aini a snoga* neen a bigin leli sama. Wan man be de ape di be malengii neen letise-ana. 7 Den leliman fu a Weiti anga den Faliseiman be fika e luku Yesesi fu si efu a be o deesi sama na a Sabadei, bika den be e suku wan fasi fu kuutu en. 8 Ma Yesesi be sabi san den e pakisei. Neen meke a taigi a man di be malengii neen ana taki: ‘Opo dai kon taampu a mindii ya.’ A man opo neen a go taampu a pe Yesesi soi en. 9 Bakadati Yesesi akisi den taki: ‘A fiti fu du bun efuso ogii a Sabadei? A fiti fu yeepi wan sama efuso fu fika en fu a dede a Sabadei?’ 10 Baka di a luku ala den, a taigi a man taki: ‘Langa yu ana.’ A man langa en ana, neen en ana kon bun. 11 Ma den ati boon a Yesesi te ná pikin sani. Neen den bendi a se fu luku san den be sa du anga en.

12 Wan dei a go na a mongo fu go begi, neen a begi Gadu a hii neti. 13 Di peesi kiin a kai den bakaman fi en, a teke 12 fu den, neen a kai den apostel*. 14 I be abi Simon di a be e kai Peitilisi, Andreyas anga en baala Yakowbesi, Yohanisi, Filipus, Bartolomeyus, 15 Mateyesi, Tomas, Yakowbesi a manpikin fu Alfeyus, Simon di sama sabi enke a fayafaya man, 16 Yudas a manpikin fu Yakowbesi, anga Yudas Iskariot di konkuu en bakaten.

17 A saka komoto anga den na a mongo, neen a go taampu a wan paata peesi. A omen bakaman fi en be de ape makandaa anga wan gaan kulu sama di be komoto a Yudeya, Yelusalem, anga den foto Tirus anga Sidon di de koosube fu a ze. Den sama be kon ape fu aliki en. Den sama di be siki be kon tu fu a deesi den. 18 A be deesi den sama di takuu yeye be e fooseli tu. 19 Ala den sama di be de ape be e meke moiti fu langa ana holi en, bika te den be du a sani ya, da a kaakiti di be e komoto neen sikin be e deesi den.

20 A luku den bakaman fi en neen a taki:

‘Koloku fu den pootiman, bika a den o fende a Kownukondee fu Gadu.

21 Koloku fu den sama di angii e kii, bika den bee o fuu.

Koloku fu den sama di e kee, bika dyonson den o lafu.

22 Koloku fu u te sama e buuse u, te den á wani paa anga u, te den e soso u, efuso te den e poli u nen fu a Manpikin fu libisama ede. 23 A denseefi sani ya den afo fu den be e du anga den polofeiti. U mu piisii pasa maiki te den sani ya e pasa, bika wo fende wan gaan pai a hemel.

24 Ma heelu fu u, u guduman, bika u fende ala saw be mu fende kaba.

25 Heelu fu u ye den sama di bee fuu nownow, bika angii o kii u.

Heelu fu u ye den sama di e lafu nownow, bika wo tyali, wo kee.

26 Heelu fu u ye den sama di ala sama e gafa, bika a so den afo fu den be e gafa den falisi polofeiti.

27 Ma mi e taigi u di e aliki mi taki: U mu lobi u feyanti, u mu e du bun gi den sama di e buuse u, 28 u mu e begi Gadu fu a belesi den sama di e winsi ogii gi u, u mu e begi gi den sama di e soso u. 29 Efu wan sama naki yu ai sikinfesi, daai a taase fesi gi en. Efu wan sama teke i dyakiti, gi en a koosi dii wei a ondoo tu. 30 Efu wan sama akisi i wan sani, gi en a sani di a akisi i. Efu wan sama teke wan sani fii, ya mu akisi en fu a gi yu en baka.

31 Boiti dati, a faw wani sama libi anga u, a letiso u mu libi anga den tu.

32 Efu a den sama di lobi u wawan u lobi, da sowtu bun u si enke we du? Bika na aseefi sani ya den sama di e libi wan sondu libi e du. 33 Efu a den sama di e du bun gi u wawan we du bun gi, da sowtu bun u si enke we du? Bika na aseefi sani ya den sama di e libi wan sondu libi e du. 34 Efu a den sama di u si enke o pai u baka we leni sani, da sowtu bun u si enke we du? Bika na aseefi sani ya den sama di e libi wan sondu libi e du. 35 Ma u mu tan lobi u feyanti, u mu e du bun gi taawan, wa mu e leni sama sani anga a denki taki den mu pai u baka. Te we du den sani ya da Gadu o pai u, wo de pikin* fu a Moo Gaan Gadu, bika ai du bun gi den ogii sama anga sama di á sabi kiyoo. 36 U mu abi tyali-ati anga taawan leti enke faw Dda abi tyali-ati anga taawan.

37 Ná kuutu taawan moo, da Gadu naw kuutu u. Ná suku fowtu a taawan moo, da Gadu naw suku fowtu aw. U mu e gi taawan paadon, da Gadu seefi o gi u paadon. 38 U mu lobi gi taawan sani, da sama o gi u sani tu. Den o fuu wan bakisi, den o pampan te a fuu kinkin, da den kandi en go aini a saka fu u koosi. Bika a fa we libi anga taawan, a so den o libi anga u.’

39 Neen a gi den wan ageisitoli. A taigi den taki: ‘Wan beendiman á poi tyai wan taa beendiman, ná so noh? A ná den tu man o kai go aini wan dipi peti noh? 40 Wan sama á bigi moo en leliman, ma a sa de enke en leliman efu a teke leli bun. 41 Fa ye du si a pikin fini tiki aini i baala ain, dai nai si a gaan pisi udu aini yu ain? 42 Efuso fai sa taigi i baala taki: “Mi baala, kon meke mi puu a tiki aini yu ain gii”, ma i nai si a gaan pisi udu di de aini yu ain? U bidiigiman. Puu a gaan pisi udu aini yu ain fosi, da yo si moo bun fai sa puu a fini pisi tiki aini i baala ain.

43 Wan gusontu bon á poi meke nyanyan di á bun, wan bon di masi á poi meke bun nyanyan. 44 A den sii di wan bon e meke e soi sowtu bon neen. Sama á poi piki figa a wan makabon, sama nai piki doloifi a makabon tu. 45 Wan bun-ati sama e taki bun sani, bika a soso bun de aini en ati. Ma wan ogii-ati sama e taki soso ogii, bika ogii fuu aini en ati. A san fuu en ati, a dati ai taki.

46 Saide we kai mi “Masaa”, daw nai du den sani di mi e taki? 47 Mio taigi u anga saw sa maiki wan sama di e waka a mi baka, da ai du den sani di mi e taki. 48 A de enke wan man di meke wan osu. A diki go dipi aini a doti neen a meke a fondamenti fu a osu a siton tapu. Di gaan fuudu kon, den balon naki a osu, ma a osu á kai, bika a be bow bun. 49 Ma efu wan sama yee san mi taki, neen aa du den sani ya, da a sama ya de enke wan man di meke en osu sondee wan fondamenti. Di gaan fuudu kon, den balon naki a osu, neen a osu booko kai.’