Den sani di Malikisi sikiifi

7 Den Faliseiman anga wantu fu den leliman fu a Weiti di komoto a Yelusalem, kon a Yesesi. 2 Den si wantu fu den bakaman fu Yesesi e nyan anga tyobo ana, dati wani taki den á be wasi den ana enke fa a gwenti be de na a ten de. 3 (Bika den Faliseiman anga den taa Dyu á be e nyan sondee den wasi den ana doo den koko-ana, enke fa den gaansama fu den be gwenti. 4 Den e wasi fosi den nyan te den komoto a wowoyo tu. A omen taa gwenti de ete di den e holi. Neen meke fosi den nyan anga wan beenki, diingi anga wan kan, efuso boli anga wan pan, den e dipi en a wataa.) 5 Na a sani ya meke den Faliseiman anga den leliman fu a Weiti akisi en taki: ‘Saide den bakaman fii nai du sani enke fa den gaansama fu u be gwenti? Saide den e nyan anga tyobo ana?’ 6 Ma a piki den taki: ‘U bidiigiman, Yesaya be abi leti di a be taki: “Den sama ya e gafa mi anga den mofu, ma den ati de faawe fu mi. 7 A sosokaali den e dini mi, bika a den weiti fu libisama den e leli taawan.” 8 We poti den weiti fu Gadu a wanse, da we wooko anga den gwenti fu libisama.’

9 A taigi den tu taki: ‘U sabi fa fu poti a Weiti fu Gadu a wanse soso fu di u wani du sani enke faw gwenti. 10 Mosesi be taki: “I mu lesipeki i mma anga i dda.” A be taki tu taki: “Den mu kii iniiwan sama di e kosi en mma efuso en dda.” 11 Ma we taki: “Efu wan man taigi en mma efuso en dda taki mia poi yeepi i bika mi paamisi Gadu taki mio gi en ala san mi abi,” 12 da we taigi en taki a naafu du nawan enkii sani gi en mma anga en dda. 13 A so we poti a wowtu fu Gadu a wanse da we poti den gwenti fu den gaansama fu wa fesi. U lobi du den sowtu sani ya.’ 14 Bakadati a kai ala den sama kon neen, neen a taigi den taki: ‘Ala sama di de ya wi aliki mi, daw fusutan san mi e taki. 15 A ná den sani di wan sama e nyan e tyobo en, ma a den sani di ai taki e tyobo en.’ 16 *——

17 Di Yesesi komoto a den sama mindii go aini wan osu, den bakaman fi en kon akisi en san a ageisitoli wani taki. 18 Neen a taigi den taki: ‘Useefi á fusutan a toli ya ete noh? Wa sabi taki a ná den sani di wan sama e nyan e tyobo en noh? 19 Bika den sani di wan sama e nyan nai go aini en ati. Ma den e go aini en bee, da baka wan pisiten den e komoto aini en sikin baka.’ Yesesi be wani den fusutan taki ala nyanyan bun fu nyan. 20 A taigi den tu taki: ‘A den takuu pakisei di de aini wan sama e tyobo en. 21 Den sani di e komoto aini wan sama ati a takuu pakisei, hululibi*, fufuu, kii, 22 wakalibi*, takuu giili, ogii-ati, lei, ogii di sama e du sondee sen, dyalusu, kosi*, heimembee, anga sani di sama e taki sondee fu den denki. 23 A den takuu pakisei ya di de aini wan sama ati e meke Gadu si en enke wan sama di tyobo.’

24 Di Yesesi komoto ape, a go na a pisi fu Tirus anga Sidon, neen a go aini wan osu. Winsi fa aa be wani sama si en tokuso den si en. 25 Wan uman di be abi wan meisyo di takuu yeye be e fooseli be de ape. Faisi Yesesi doo, a so a uman ya yee taki a kon de. 26 A uman ya a be wan Giikisama* di be e tan a Siro-Finisiya. A begi Yesesi omen leisi fu yaki a takuu yeye puu na a meisyo fi en tapu. 27 Ma Yesesi taigi en taki: ‘Meke den pikin nyan te den bee fuu fosi, bika aa bun fu mi teke a beele fu den pikin, da mi iti en gi den pikin dagu.’ 28 Ma a piki en taki: ‘A tuu masaa, ma toku den pikin dagu e nyan den pisi beele di e kai na a tafaa ondoo.’ 29 Neen a taigi a uman taki: ‘I sa go. Fu dii taki a sani ya meke a takuu yeye komoto na a meisyo fii tapu.’ 30 Di a uman gwa osu, a si a pikin fi en didon a bedi tapu. A takuu yeye á be de neen tapu moo.

31 Di Yesesi komoto na a pisi fu Tirus, a pasa aini Sidon, anga den tin foto di den e kai Dekapolis te enke a doo a ze fu Galileya. 32 Di a doo ape, den tyai wan dofuman kon neen. A man ya á be poi taki bun. Den begi Yesesi fu poti en ana na a man tapu. 33 Yesesi puu a man a den sama ini neen a tyai en gwa wanse. A poti en finga aini a man yesi. Baka di a tufe, a holi a tongo fu a man. 34 A luku gwa tapu neen a hali wan dipi boo. Bakadati a taki: ‘Efata.’ A sani ya wani taki: ‘Opo.’ 35 Di a taki a sani ya, a man bigin yee, a be poi taki bun tu. 36 A taigi den sama taki den á mu taigi nawan sama san a du. Ma o moo a be e bali den, o moo den be e paati a taki. 37 Den sama foondoo te neen den taki: ‘A soso bun sani ai du. Ai meke den dofusama yee, ai meke den babawman taki tu.’