Den sani di Mateyesi sikiifi

6 Te we du bun, u mu luku bun fu wa du sama ain sani. Efuso u Dda di de a hemel naw pai u. 2 Te u yeepi pootiman a sani wa mu paati a taki, bika a so den bidiigiman e du. Te den yeepi sama a sani, da den e paati a taki a ganda anga den snoga fu sama mu gafa den. Biibi mi, den fende den pai kaba. 3 Ma tei yeepi pootiman a sani, i kukutu-ana naafu sabi sai leti-ana du. 4 Sama naafu sabi taki i du bun gi wan pootiman. I Dda di de a hemel o pai i baka, bika ai si ala sani.

5 Te we begi, wa mu begi enke den bidiigiman, bika te den e begi den lobi taampu a den snoga, anga den uku fu den gaan pasi fu sama mu si den. Biibi mi, den fende den pai kaba. 6 Ma te ye begi, go aini i kambaa, tapu i doo dai begi i Dda di sama á poi si. I Dda di de a hemel o belesi i, bika ai si ala sani. 7 Te ye begi, ya mu e taki denseefi sani ala yuu baka enke den sama di nai dini Gadu. Bika den e si enke a te den e taki omen sani, da Gadu o aliki den. 8 Wa mu de enke den sama ya, bika u Dda di de a hemel sabi san wi abi fanowdu fosi wi akisi en.

9 Neen meke te we begi, u mu taki:

“U Dda di de a hemel, i nen mu santa. 10 Meke i Kownukondee kon. Meke sani waka enke fai wani a goontapu, leti enke fa sani e waka a hemel. 11 Gi u san wi abi fanowdu fu nyan* tide baa. 12 Gi u paadon fu den sondu fu u baa, leti enke fa we gi taawan paadon te den du wan sani anga u. 13 Yeepi u fu wa sondu te tesi miti u, kibii u fu Didibii* á fende u kisi.”

14 Efu we gi taawan paadon te den du wan sani anga u, daw Dda di de a hemel o gi u paadon tu. 15 Ma efu u nai gi taawan paadon te den du wan sani anga u, u Dda di de a hemel naw gi u paadon.

16 Te we faste*, wa mu poti u fesi enke we tyali. Bika a so den bidiigiman e du. Den e masi den fesi fu sama mu sabi taki den e faste. Biibi mi, den fende den pai kaba. 17 Ma te ye faste, wasi i fesi, dai lobi fatu a yu ede. 18 Sama naafu si taki ye faste, boiti i Dda di de a hemel di sama nai si. Neen o pai i, bika ai si ala sani.

19 Wa kibii u gudu a goontapu moo pe udulosu anga fuusu sa poli en, efuso pe fufuuman sa fufuu en. 20 Ma kibii u gudu a hemel pe udulosu anga fuusu á poi poli en, efuso pe fufuuman á poi fufuu en. 21 Bika a pei gudu de, na ape yu ati o de tu.

22 A lampu fu a sikin a den ain. Neen meke efi yu ain kiin, dai hii sikin o beenki. 23 Efi yu ain e luku sani di á bun, dai hii sikin o dunguu. Efu a faya di de aini i dede, dai de a dunguu tuutuu.

24 Nawan sama poi dini tu masaa. Bika aw buuse wan fu den, da a lobi a taawan. Efuso aw holibaka gi wan fu den, da ai wisiwasi a taawan. Ya poi dini Gadu anga Gudu na aseefi yuu.

25 Neen meke mi e taigi u taki: Wa booko wi ede anga a libi fu u moo. Wa booko wi ede anga san wo nyan, san wo diingi, efuso san wo wei. A libi á pelensipali moo nyanyan noh? U sikin á pelensipali moo koosi noh? 26 Luku den foo di e fee a tapu. Den nai sai sii efuso koti nyanyan. Den nai kibii nyanyan aini magisin tu, tokuso u Dda di de a hemel e gi den sani fu nyan. Wa pelensipali moo den foo ya noh? 27 On di fu u ya poi kusumi te da a meke en libi kon moo langa pikinso? 28 Saide we booko wi ede anga san wo wei? Luku fa den boomiki* e goo. Den nai wooko efuso meke koosi. 29 Ma mi e taigi u taki, Salomo sowan gendee kownu seefi á be e wei moin enke wan fu den boomiki ya. 30 Efu Gadu e meke den sani ya moin so winsi fa den nai libi langa, da saide u nai biibi taki a poi gi u koosi fu wei? 31 Neen meke wa mu booko wi ede anga sani. Wa mu taki: “San wo nyan?” “San wo diingi?” efuso: “San wo wei?” 32 Bika a den sani ya baka den sama di nai dini Gadu e feti. U Dda di de a hemel sabi taki wi abi ala den sani ya fanowdu.

33 Neen meke a Kownukondee fu Gadu mu de a moo pelensipali sani aini u libi, u mu du sani enke fa Gadu wani ala yuu tu, da aw gi u ala den taa sani di wi abi fanowdu. 34 Ná booko yu ede anga tamaa, bika tamaa abi fi en. Ibii dei abi en eigi booko-ede.