Den sani di Malikisi sikiifi

6 Di a komoto ape, a go na a pisi kondee pe a kiya. Den bakaman fi en be go anga en. 2 Di a Sabadei doo, a bigin leli sama aini a snoga. Gaanse fu den sama di be si a fasi fa ai gi leli be foondoo. Den be e taki: ‘Fa a man ya du sabi den sani ya? Pe a fende a makiti fu du den wonduu* ya? 3 A ná a tembeeman de ya noh? A ná a pikin fu Maliya de ya noh? A ná a baala fu Yakowbesi, Yowsefu, Yudas anga Simon noh? A ná ya den sisa fi en e tan noh?’ Neen meke den á be wani aliki en. 4 Ma Yesesi taigi den taki: ‘Na ala peesi sama e lesipeki wan polofeiti, boiti den sama fi en eigi foto, anga den famii fi en.’ 5 Neen meke aa du tyaipi wonduu de, a wantu sama namo di be siki a deesi di a poti en ana a den tapu. 6 Yesesi be foondoo taki den sama á be wani biibi en. Di a komoto de, a gwa den pikin foto di be de koosube, neen a bigin leli den sama.

7 A kai den twalufu apostel, a paati den tu na tu, neen a sende den go paati a bun nyunsu. A gi den a makiti fu basi den takuu yeye. 8 A taigi den taki den á mu tyai nawan taa sani boiti a wakatiki di de a den ana. Den á mu tyai beele, nyanyan-saka, efuso moni. 9 Den á mu tyai taa susu efuso koosi, boiti di be de a den sikin. 10 A taigi den tu taki: ‘Winsi sowtu osu u go, u tan ape te enke u komoto aini a foto de. 11 Ma efu u gwa wan peesi, neen sama á wani aliki u efuso holi wi a den osu, da naki a doti puu aw futu te we komoto ape fu soi taki den á tyai denseefi bun.’ 12 Bakadati den gwe, neen den bigin taigi den sama taki den mu daai den libi. 13 Den yaki omen takuu yeye puu a sama tapu. Den lobi oli gi omen sama di be siki, neen den deesi den.

14 Kownu Herodes yee ala den sani ya, bika na ala se sama be e taki fu Yesesi. Son sama be e taki: ‘Yohanisi a Dopuman kon a libi baka, neen meke a poi du den somen wonduu ya.’ 15 Ma taa sama be e taki: ‘A Eliya.’ Taawan baka be e taki: ‘A man ya a wan polofeiti leti enke ala den taa polofeiti.’ 16 Ma di Herodes yee fu Yesesi, a taki: ‘A musu de taki a Yohanisi di mi be meke sama doo en ede kon a libi baka.’ 17 Herodes be meke sama kisi Yohanisi tyai go sooto fi en uman Herodiyas ede. Bika fosi, Herodiyas a be a uman fu Filipus, a baala fu Herodes. 18 A omen leisi Yohanisi be taigi Herodes taki: ‘Aa bun taki ye libi anga a uman fii baala.’ 19 Herodiyas be holi Yohanisi na ati, neen meke a be wani kii en, ma aa be poi. 20 Herodes be e lesipeki Yohanisi bika a be sabi taki en a wan bun man di be e dini Gadu. Neen meke a be e kibii en fu sama á du ogii anga en. Ala yuu te Yohanisi be e taki anga en, Herodes á be e sabi san fu du, ma toku a be lobi aliki en.

21 Ma wan dei Herodiyas fende a okasi fu du san a be wani. Di Herodes fuuyali, a holi wan gaan fesa gi den man di be abi hei posisi, den suudati-edeman, anga den bigiman fu Galileya. 22 A umanpikin fu Herodiyas kon a inise neen a dansi. A sani switi gi Herodes anga den sama di be de na a fesa te neen a taigi a meisyo taki: ‘I sa akisi mi iniiwan sani, mio gi yu en.’ 23 A sweli taki: ‘Mio gii iniiwan sani di yu akisi mi, winsi na afu fu a kownukondee fu mi seefi.’ 24 A meisyo go neen mma neen a akisi en taki: ‘San mi mu akisi?’ En mma piki en taki: ‘A ede fu Yohanisi a Dopuman.’ 25 Neen a meisyo lon go na a kownu neen a taigi en taki: ‘Mi wani i gi mi a ede fu Yohanisi a Dopuman a wan peeti tapu nownow.’ 26 Winsi fa a sani ya be hati a kownu toku aa be poi taki nono, bika a be sweli a den sama di be de ape fesi taki aw gi en iniiwan sani di a akisi. 27 A kownu sende wan suudati fu tyai a ede fu Yohanisi kon gi en. A suudati go na a sitaafu-osu, neen a doo Yohanisi ede puu. 28 A tyai a ede kon a wan peeti tapu gi a meisyo, neen a meisyo tyai en go gi en mma. 29 Di den bakaman fu Yohanisi yee san pasa, den kon teke a dedesikin fi en neen den beli en.

30 Di den apostel daai kon a Yesesi, den taigi en ala san den du anga san den leli sama. 31 Fu di omen sama be e go e kon, meke den á be abi ten seefi fu nyan. Neen meke Yesesi taigi den taki: ‘Kow gwa wan koo peesi fu u sa boo pikinso.’ 32 A so den teke boto fu gwa wan peesi pe taa sama á be de. 33 Ma sama si di den e gwe, neen den paati a taki. Den sama lon komoto na ala den foto fu go doo pe Yesesi anga den bakaman fi en be e go, neen den doo ape fosi den. 34 Di Yesesi komoto aini a boto a si wan gaan kulu sama. Tyali fu den kisi en, bika den be de enke sikapu di naabi sikapuman. Neen a bigin leli den omen sani fu Gadu.

35 Di bakadina doo, den bakaman fi en kon neen, neen den taigi en taki: ‘A wan faawe peesi u de, anga ala a lati kaba. 36 Sende den sama gwe fu den sa go bai sani fu nyan a den foto anga den kampu di de koosube.’ 37 A taigi den taki: ‘U gi den sani fu nyan noh.’ Ma den taigi en taki: ‘Fa wo du a sani ya? Efu u mu gi ala den sama ya sani fu nyan, wo abi fu bai beele fu 200 solufu moni*.’ 38 A akisi den taki: ‘Omen beele wi abi? U go luku osi.’ Di den kon den piki en taki: ‘Wi abi feifi beele anga tu fisi.’ 39 A taigi den sama fu go sidon aini kulu aini a gaasi. 40 Neen den sama go sidon aini kulu fu 100 anga fu 50. 41 Yesesi teke den feifi beele anga den tu fisi, a luku gwa tapu neen a begi. Bakadati a booko den beele, neen a gi den bakaman fi en fu paati gi den sama. A du aseefi sani anga den tu fisi tu. 42 Ala den sama nyan te den bee fuu. 43 Di den sama kaba nyan, den fuu 12 bakisi anga den pisi beele di be fika. Fisi be fika tu. 44 A 5000 mannengee be nyan den beele.

45 Bakadati a sende den bakaman fi en fu go teke a boto da den bigin go na abaase a Betsaida, ma a be fika a baka fu sende den sama gwe. 46 Di den sama gwe, a gwa wan mongo fu go begi. 47 Di neti tapu en wawan be de a soo ete. A ten de a boto be de te a mindii wataa. 48 A winta be e wai taanga na a musude*. Neen meke di a si fa den bakaman fi en be e feti fu tii a boto, a bigin waka na a wataa tapu gwa den, ma a du enke a be o waka pasa den. 49 Di den si ai waka na a wataa tapu kon a den, den taki: ‘San na a sani di e kon de?’ Neen den bigin bali. 50 Bika den be e feele. Ma Yesesi taigi den taki: ‘Wa feele, a mi de ya.’ 51 Di a subi go aini a boto, a winta á be e wai moo. Den bakaman fi en foondoo di den si a sani ya. 52 Bika winsi fa den be si a wonduu fu den beele toku den á be fusutan ete taki a be sa du a wonduu ya.

53 Di den doo na a taase, den poti boto na a pisi fu Geneisaret. 54 Ma faisi den saka komoto aini a boto, wantu sama fusutan taki a Yesesi de ape. 55 Den lon go taigi den taa sama di be e tan na a pisi de taki Yesesi doo ape, a so ala den sama bigin tyai den sama di be siki gwa Yesesi. 56 Iniiwan peesi efuso foto pe Yesesi be go, den be e tyai sama di siki kon a den wowoyo, da den be e begi en fu den be sa holi a koosi mofu fi en. Ala sama di be holi a koosi mofu fi en be e betee.