Den sani di Mateyesi sikiifi
26 Di Yesesi kaba taki ala den sani ya, a taigi den bakaman fi en taki: 2 ‘U sabi taki a Paskafesa o de baka tu dei, da sama o tyai a Manpikin fu libisama go gi den feyanti fi en fu den kii en a wan ponsu.’
3 Bakadati den fesiman fu den pilisite, anga den gaanwan fu a foluku kon makandaa aini a dyali fu a gaan pilisite* di den e kai Kayafas. 4 Den be e taki anga denseefi fa den be sa lei gi Yesesi fu kisi en tyai go kii. 5 Ma den be taki: ‘Wa mu kisi en na a fesa, efuso den sama o ligei.’
6 Yesesi be de a Betaniya aini a osu fu Simon, wan man di be abi gwasi fosi. 7 Di a sidon e nyan, wan uman kon neen anga wan dii bataa sumee switi oli, neen a bigin kandi a oli a Yesesi ede. 8 Den bakaman fi en á be lobi a sani ya seefiseefi. Den taki: ‘Saide ai poli a oli du? 9 U be sa seli a oli ya wan bunbun moni, daw gi den pootiman a moni de.’ 10 Yesesi be sabi san den e taki, neen meke a taigi den taki: ‘Saide we fuufeli a uman? A wan bun sani a du gi mi. 11 Den pootiman o de ya anga wi ala yuu, ma mi naw de ya anga wi ala yuu. 12 A sumee switi oli di a poti a mi sikin ya, a fu seeka mi sikin di den o beli mi. 13 Biibi mi, na ala se fu goontapu pe a bun nyunsu ya o paati, sama o taki fu a sani di a uman ya du. Noiti den o feegete en.’
14 Bakadati wan fu den twalufu apostel fi en di den e kai Yudas Iskariot go a den fesiman fu den pilisite, neen a akisi den taki: 15 ‘San wo gi mi efu mi konkuu en fu u sa fende en kisi?’ Den taigi en taki den o gi en 30 pisi solufu moni. 16 Fanafu a dei de, a bigin suku fasi fu konkuu Yesesi.
17 Den bakaman fu Yesesi kon neen na a fosi dei fu a fesa fu beele sondee sowda, neen den akisi en taki: ‘Pei wani u seeka sani gi a Paska nyanyan?’ 18 A piki den taki: ‘U go aini a foto, da wo si wan man ape. U mu taigi en taki: “A leliman taki: ‘A yuu fu mi koosube. Mio holi a Paskafesa anga den bakaman fu mi a yu osu.’”’ 19 Den bakaman fu Yesesi du san a taigi den, neen den seeka sani gi a Paskafesa.
20 Di neti tapu, a sidon a tafaa anga den 12 bakaman fi en. 21 Di den e nyan a taigi den taki: ‘Biibi mi, wan fu wi o konkuu mi.’ 22 Di den yee a sani ya tyali kisi den, neen meke ala den bigin akisi en taki: ‘Masaa, a mi?’ 23 A piki den taki: ‘Na a sama di mi anga en dipi ana go aini a komiki, o konkuu mi. 24 A tuu taki a Manpikin fu libisama o dede enke fa Gadu buku taki. Ma heelu fu a sama di konkuu a Manpikin fu libisama! A be o moo bun efu a sama de á be meke kon a goontapu.’ 25 Yudas di be o konkuu Yesesi akisi en taki: ‘Leliman, a sa de taki a mi?’ Yesesi piki en taki: ‘A iseefi taki so.’
26 Di den nyan te wan pisi, Yesesi teke wan beele, a gi Gadu daa, neen a booko en a omen pisi. A langa en gi den bakaman fi en neen a taigi den taki: ‘A beele ya wani taki mi sikin, u teke daw nyan.’ 27 Bakadati a teke wan kan win, a gi Gadu daa neen a gi den bakaman fi en. A taigi den taki: ‘Ala u mu diingi. 28 A win ya wani taki a “buulu” fu mi “fu a kuudei” di o kai a doti. Na a buulu fu mio meke omen sama fende paadon fu den sondu fu den. 29 Ma mi e taigi u taki: Mi naw diingi a win ya moo, te enke a dei di mio diingi a nyun win anga u aini a Kownukondee fu Nda.’ 30 Baka di den singi gafa Gadu, den go na a Oleifi Mongo.
31 Neen Yesesi taigi den taki: ‘Tide neti ala wo gwe fika mi te u si san pasa anga mi, bika Gadu buku taki: “Mio naki a sikapuman, da ala den sikapu o lon fanyafanya.” 32 Ma di mio weki baka, mio gwa Galileya, da mio wakiti wi ape.’ 33 Ma Peitilisi piki en taki: ‘Winsi ala den taawan ya gwe fika i te den si san pasa anga i, mi dati noiti o fika i.’ 34 Ma Yesesi piki en taki: ‘Biibi mi, tide neti seefi, fosi wan kakafoo bali, yo taki dii boo taki ya sabi mi.’ 35 Peitilisi taigi en taki: ‘Winsi mi mu dede anga i seefi, toku noiti mio taki mia sabi i.’ Ala den taa bakaman taki aseefi sani tu.
36 Bakadati Yesesi anga den bakaman fi en doo na a peesi den e kai Getsemanei, neen a taigi den taki: ‘U sidon ya wakiti mi! Mio go anda go begi.’ 37 Ma a meke Peitilisi anga den tu manpikin fu Sebedeyus go anga en. A be de anga gaan buduufu na ati, ná pikin ibi a be ibi gi en. 38 Neen a taigi den taki: ‘A buduufu di de a mi ati ibi te a sa tyai dede kii mi. U wakiti ya, u de na ain anga mi.’ 39 A waka go pikinso moo faawe, a sutu kini a doti neen a bendi ede. Bakadati a bigin begi taki: ‘Nda, efu a poi, da gaantangi puu a kan ya a mi fesi baa. A ná san mi wani mu pasa, ma meke sani waka enke fai wani.’
40 Di a daai gwa den bakaman fi en, a si taki den e siibi, neen a taigi Peitilisi taki: ‘Wa be poi meke taanga-sikin, fu de na ain anga mi wan kodo yuu seefi noh? 41 U mu de na ain, da we begi naamo fu wa sondu te tesi miti u. Mi sabi taki a ati wani, ma a sikin swaki.’ 42 A gwe ete wan leisi neen a begi taki: ‘Nda, efu a namonamo mi mu diingi a sani ya, da meke sani waka enke fai wani.’ 43 Di a daai kon a den, a si taki den be e siibi baka, bika siibi be moo den. 44 A gwe baka go begi du fu dii toon, neen a taki denseefi sani. 45 Di a daai kon a den bakaman fi en a taigi den taki: ‘Na a yuu ya we siibi e boo sikin? A yuu doo fu sama seli a Manpikin fu libisama gi ogii sama. 46 Wi opo meke u gwe. A sama di o konkuu mi doo kaba.’ 47 Aa kaba taki seefi, neen Yudas, wan fu den twalufu apostel fi en doo ape anga wan gaan kulu sama. Den de anga fetihow anga kodya. A den fesiman fu den pilisite anga den gaanwan fu a foluku sende den kon.
48 A sama di be o konkuu en be taigi den taki: ‘Na a sama di mio bosi u mu kisi ye.’ 49 A waka langalanga gwa Yesesi, neen a taki: ‘A tapu wi oo Leliman.’ Neen a bosi en neen en sikinfesi. 50 Ma Yesesi akisi en taki: ‘San na a kon fii ya?’ Neen den sama di be kon anga Yudas kisi Yesesi tyai gwe. 51 Ma wan fu den bakaman fu Yesesi hali en fetihow, neen a koti a yesi fu a saafu fu a gaan pilisite puu. 52 Yesesi taigi en taki: ‘Poti i fetihow neen peesi baka. Bika a sama di e teke fetihow, a fetihow o kii en. 53 I denki taki mia poi akisi Nda fu sende moo enke 12 gaan kulu engel fu kon yeepi mi? 54 Ma efu mi du a sani ya, da fa den sani di sikiifi aini a wowtu fu Gadu o kon tuu?’ 55 Neen Yesesi taigi den sama taki: ‘Anga fetihow anga kodya u kon teke mi fu tyai go sooto enke mi a fufuuman? Na ala dei mi be e sidon aini a tempel e leli sama, ma wa be e kisi mi tyai go sooto. 56 Ma ala den sani ya e pasa fu den sani di den polofeiti be sikiifi, sa kon tuu.’ Bakadati ala den bakaman fi en lon gwe fika en.
57 Den sama di kisi Yesesi, tyai en go na a osu fu a gaan pilisite Kayafas. Den leliman fu a Weiti anga den gaanwan fu a foluku be kon makandaa ape. 58 Ma Peitilisi be e waka faawe neen baka, te enke den doo a dyali fu a gaan pilisite. Di a doo ape, a go sidon anga den futuboi fu a osu fu luku fa sani o waka.
59 A ten de den fesiman fu den pilisite anga a hii Sanhedrin* be e suku sama fu lei gi Yesesi fu den be sa fende en kii. 60 Winsi fa omen sama kon lei gi en, toku den á be fende nawan fasi fu kii en. Bakaten ete tu kotoigi kon, neen den taki: 61 ‘A man ya be taki: “Mi sa booko a tempel fu Gadu, da mi meke en baka aini dii dei.”’ 62 Di den taki a sani ya, a gaan pilisite opo taampu neen a akisi en taki: ‘I nai piki noh? I nai yee san den man ya e taki fii noh?’ 63 Ma Yesesi á piki. Neen meke a gaan pilisite taigi en taki: ‘I mu taki a tuu, efuso a libilibi Gadu o sitaafu i. A yu na a Kelestesi, a Manpikin fu Gadu?’ 64 Yesesi piki en taki: ‘A iseefi taki so. Ma mi e taigi u taki fanafu now wo si a Manpikin fu libisama e kon aini den woluku fu hemel. Aw sidon na a letise-ana fu a makiti Gadu.’ 65 Di a taki so, a gaan pilisite piiti en koosi neen a taki: ‘A wisiwasi Gadu! Aa de fu u suku kotoigi moo, useefi yee fa a wisiwasi Gadu. 66 Saw denki u mu du anga en?’ Den piki taki: ‘A dede a mu dede.’ 67 Den tufe aini en fesi, neen den naki en anga kofu. Taawan kalapu en aini en fesi. 68 Den be e taigi en taki: ‘Kelestesi, efi ya wan polofeiti, da taigi u sama naki i osi.’
69 A ten de Peitilisi be sidon a doose aini a dyali. Neen wan fu den uman di be e wooko aini a osu kon neen, neen a taki: ‘Ya wan fu den man di be lobi waka anga Yesesi fu Galileya.’ 70 Ma a sitee na ala sama fesi taki: ‘Mia sabi san ye taki.’ 71 Di a go na a doomofu fu a dyali, wan taa uman si en de, neen a taki: ‘A man ya seefi be de makandaa anga Yesesi fu Nasaleti.’ 72 Ma Peitilisi sitee baka taki: ‘Fu Gadu, mia sabi a man de.’ 73 Baka wan pisiten, den sama di be taampu ape kon moo koosube neen den taigi Peitilisi taki: ‘I musu de wan fu den, bika ye taki enke den Galileyasama.’ 74 Ma a bigin sweli taki ogii sa miti en efu a nai taki a tuu. A taki: ‘Mia sabi a man ya.’ Faisi a taki a sani ya, wan kakafoo bali. 75 Neen Peitilisi membee a sani di Yesesi be taki. A be taki: ‘Fosi wan kakafoo bali, yo taki dii boo taki ya sabi mi.’ A gwa doose neen a bali wan adyumadye.