Den sani di Yohanisi sikiifi

12 Sigisi dei fosi a Paskafesa, Yesesi go a Betaniya, a foto pe Lasalesi be e tan. Na a Lasalesi ya Yesesi be weki baka. 2 Di a doo, den seeka nyanyan gi en. Maata be e tyai nyanyan gi den sama di be sidon a tafaa. Wan fu den sama ya a be Lasalesi. 3 Maliya teke wan sani fu wan afu liti nardus oli*, a kandi en a Yesesi futu, neen a dee mi en anga en ede uwii. A oli be e sumee aini a hii osu. 4 Ma Yudas Iskariot, a bakaman fu Yesesi di be o konkuu en taki: 5 ‘Saide wa seli a sumee switi oli ya 300 solufu moni daw gi den pootiman a moni?’ 6 Neen be e holi a moni-kedee, ma en a be wan fufuuman. Neen meke fa a taki a sani ya, a ná booko a be e booko en ede anga den pootiman so. Ma a be gwenti teke a moni di be de aini a moni-kedee. 7 Yesesi taki: ‘Fika en, a seeka ai seeka mi sikin gi a beli fu mi enke fa a gwenti de. 8 Na ala yuu den pootiman o de anga u ya, ma mi dati naw de anga wi ala yuu.’

9 Wan gaan kulu sama be kon fusutan taki Yesesi de a Betaniya, neen den kon luku en. A ná Yesesi wawan den be wani si, ma den be wani si Lasalesi tu, a man di be kon a libi baka. 10 Den edeman fu den pilisite be e sete sani fu kii Lasalesi, 11 bika a fi en ede meke omen fu den Dyu be go a Betaniya. A fi en ede meke omen fu den bigin biibi Yesesi tu.

12 A taa dei fi en, a gaan kulu sama di be kon na a fesa a Yelusalem be yee taki Yesesi de a pasi e kon ape. 13 Neen meke den koti taka puu a den bon* neen den waka go miti en. Den be e bali taki: ‘Gadu kibii en baa. A Kownu fu Islayeli di e kon aini Yehofa* nen mu fende belesi.’ 14 Di Yesesi fende wan yonkuu buliki, a sidon neen tapu leti enke fa Gadu buku be taki. Ape sikiifi taki: 15 ‘Ná feele, umanpikin fu Siyon, a kownu fii e kon, a sidon na a pikin fu wan buliki tapu.’ 16 Biginbigin, den bakaman fi en á be fusutan den sani ya. Ma di Yesesi fende gaandi, den membee wanten taki den sani di pasa, anga den sani di sama du anga Yesesi, a pilisisi san Gadu buku be taki.

17 Den sama di be si taki Yesesi meke Lasalesi kon a libi baka, be e taki naamo fu a sani di pasa. 18 A fu di den sama di be kon na a fesa yee fu a wonduu di Yesesi du, meke den be wani miti en. 19 Den Faliseiman be e taki anga denseefi taki: ‘Wa si taki wa poi du nawan sani noh? Ala sama e waka neen baka.’

20 Wantu fu den sama di be kon na a fesa fu dini Gadu, a be Giikisama*. 21 Den go a Filipus, wan man fu a foto Betsaida aini Galileya, neen den akisi en taki: ‘U wani si Yesesi.’ 22 Filipus go taigi Andreyas, neen Andreyas anga Filipus go taigi Yesesi san den sama taki.

23 Ma Yesesi taigi den taki: ‘A yuu doo fu a Manpikin fu libisama fende gaandi. 24 Biibi mi, efu wan sii alisi kai a doti, a wan kodo sii ai tan. Ma efu a dede, aw goo da a meke tyaipi nyanyan. 25 A sama di lobi en libi, o lasi en. Ma a sama di e buuse a libi di a abi aini a goontapu ya, o fende teego libi. 26 Efu wan sama wani de mi futuboi, a mu e waka a mi baka. Pe mi de, na ape mi futuboi o de. Efu wan sama a mi futuboi, Nda o gi en gaandi. 27 Nownow mi ati de a fuka, ma san mi sa taki? Nda, gaantangi puu mi aini a fuka ya baa. Ma mi sabi taki a fu a sani ya meke mi kon a goontapu. 28 Nda gii nen gaandi baa.’ Neen wan siten taki komoto a hemel taki: ‘Mi gi mi nen gaandi kaba, anga ala mio gi en gaandi baka.’

29 Di son wan fu den sama di be de ape yee san pasa, den taki a dondoo bali. Taawan taki: ‘A wan engel taki anga en.’ 30 Neen Yesesi taigi den taki: ‘A ná fu mi ede u yee a siten ya, ma a fu wi ede. 31 Gadu o kuutu a goontapu ya, da aw fiingi a tiiman fu a goontapu ya go a doose. 32 Ma te den opo mi go a tapu*, mio hali ala sowtu sama kon a mi.’ 33 A be taki a sani ya fu soi den fa a be o dede. 34 Neen den sama taigi en taki: ‘A Weiti e taki a Kelestesi e tan fu teego. Da fai sa taki den o opo a Manpikin fu libisama go a tapu? Sama na a Manpikin fu libisama di ye taki ya?’ 35 Yesesi taigi den taki: ‘A faya o de anga u ya wan pisiten ete. U waka, di na a faya de ya anga wi ete, fu a dunguu á tapu u. A sama di e waka aini a dunguu á sabi pe ai go. 36 U mu biibi a faya, solanga a de ya anga u, da wo toon manpikin fu a faya.’

Baka di Yesesi taki den sani ya, a go kibii gi den. 37 Winsi fa den si den somen wonduu di a du, toku den á be e biibi en. 38 A so den sani di polofeiti Yesaya be taki kon tuu. A be taki: ‘Yehofa*, sama e biibi a sani di u taki? Sama si a kaakiti fu Yehofa*?’ 39 Yesaya be taki saide den á be e biibi. A be taki: 40 ‘Mi meke den ain dunguu fu den á poi si. Mi meke den ati kon taanga, fu den á poi fusutan san den mu du. Neen meke den naw daai kon baka fu mi deesi den.’ 41 Yesaya be taki den sani ya fu Yesesi fu di a be si a kaakiti fi en. 42 A omen sama be e biibi en. Wantu fu den tiiman seefi be e biibi en. Ma fu den Faliseiman ede meke den á be wani sama sabi, bika den á be wani den yaki den puu aini a snoga*. 43 Den be lobi a gaandi di den be e fende a libisama, moo a gaandi di den be mu fende a Gadu.

44 Ma Yesesi taigi den taki: ‘A sama di e biibi mi, nai biibi mi namo, ma ai biibi a sama di sende mi tu. 45 A sama di si mi, si a sama di sende mi tu. 46 Mi kon enke wan faya a goontapu, fu meke iniiwan sama di e biibi mi á tan aini a dunguu. 47 Efu wan sama yee san mi taki ma a nai du den sani de, mi naw kuutu en. Bika mia kon fu kuutu a goontapu, ma mi kon fu fii a goontapu. 48 Wan sama o kuutu a sama di nai lesipeki mi, efuso di nai du san mi taki. A den sani di mi e taki o kuutu en na a lasiti dei. 49 Bika a ná san miseefi wani mi e taki, ma na a Dda di sende mi seefi taigi mi san mi mu taki, anga san mi mu leli sama. 50 Mi sabi tu taki den sani di a taigi mi o meke sama fende teego libi. Neen meke a den sani di a Dda taigi mi, a den mi e taki.’