Den sani di Mateyesi sikiifi
4 Bakadati a yeye fu Gadu tyai Yesesi go aini a sabana neen Didibii* kon tesi en. 2 A 40 dei langa aa be nyan, neen meke angii be e kii en. 3 Didibii kon a Yesesi, neen a taigi en taki: ‘Efi ya wan manpikin fu Gadu, da meke den siton ya toon beele*.’ 4 Ma Yesesi piki en taki: ‘Gadu buku taki: “A ná beele namo sa meke sama tan a libi, ma a te den e du ala san Yehofa taki.”’
5 Bakadati Didibii tyai en gwa Yelusalem neen a poti en na a moo hei pisi fu a tempel. 6 Neen a taigi en taki: ‘Efi ya wan manpikin fu Gadu da dyombo gwa ondoo, bika Gadu buku taki: “Aw sende den engel fi en kon fanga i fi ya naki i futu a siton.”’ 7 Ma Yesesi taigi en taki: ‘Gadu buku taki: “Ya mu du sani fuseefi fu si efu Yehofa i Gadu o yeepi i.”’
8 Bakadati Didibii tyai en gwa wan gaan hei mongo, neen a soi en ala den kondee fu goontapu anga den gudu fu den. 9 Neen a taigi en taki: ‘Efii sutu kini a doti dini mi wan leisi namo, mio gii ala den sani ya.’ 10 Ma Yesesi bali en taki: ‘Pasa komoto ya Saatan! Bika Gadu buku taki: “A Yehofa i Gadu wawan i mu sutu kini a doti begi, neen wawan too i mu dini.”’ 11 Bakadati Didibii gwe, neen den engel* kon yeepi en anga san a be abi fanowdu*.
12 Di Yesesi yee taki den sooto Yohanisi, a gwa Galileya. 13 Di a komoto a Nasaleti, a go tan a Kaperna-um koosube fu a ze na a pisi kondee fu Seibulon anga Naftali. 14 Na a sani ya Gadu be meke polofeiti Yesaya taki a fesi. A be taki: 15 ‘Den sama fu Seibulon anga Naftali di e tan koosube fu a ze, na abaase fu a Yordaan liba a Galileya, na a kondee pe den taa kondee sama e tan, 16 a peesi o kiin gi u*. Aw kiin gi den sama di be de a dunguu, anga den sama di be de a dede mofu.’ 17 Fanafu a ten de Yesesi bigin peleiki, a be e taigi den taki: ‘U daai u libi, bika a Kownukondee fu hemel koosube.
18 Di a be e waka na a lanpeesi fu a ze fu Galileya a si tu baala e towe seepi, bika den a be fisiman. Wan fu den a Simon di sama be sabi enke Peitilisi, a taawan a be Andreyas. 19 Neen a taigi den taki: ‘U waka a mi baka, da mio soi u faw sa kisi libisama enke fa we kisi fisi.’ 20 Den á daaidaai, den fika den seepi fu den neen den bigin waka neen baka. 21 Di a waka go moo faawe a si tu boi fu Sebedeyus di den e kai Yakowbesi anga Yohanisi. Den be de aini boto anga den dda Sebedeyus e seeka den seepi, neen Yesesi kai den. 22 Di a kai den, den á daaidaai, den komoto aini a boto fika den dda, neen den bigin waka neen baka.
23 Bakadati a bigin leli sama aini ala den snoga* fu Galileya. A be e paati a bun nyunsu fu a Kownukondee fu Gadu gi den. Winsi sowtu siki wan sama be abi, a be e deesi en. 24 Sama be e taki fu Yesesi aini hii Siriya, neen meke den tyai ala den sama fu den di be siki kon neen. Den be tyai sama kon neen di takuu yeye* be e fooseli, sama di be abi pikinnengee siki, anga sama di be malengii, neen a deesi ala den. 25 Neen meke tyaipi sama fu Galileya, den tin foto di den e kai Dekapolis*, Yelusalem, Yudeya, anga den sama di be de na abaase fu a Yordaan liba bigin waka neen baka.