Den sani di Yohanisi sikiifi

6 Bakadati Yesesi komoto ape, neen a abaa a ze fu Galileya di sama sabi enke Tiberiyas tu. 2 Wan gaan kulu sama be e waka neen baka, bika den be si den somen wonduu di a du fu deesi den sama di be siki. 3 Neen Yesesi anga den bakaman fi en subi gwa wan mongo neen den sidon ape. 4 A ten de, a Paskafesa* fu den Dyu be koosube. 5 Di Yesesi si taki wan gaan kulu sama be e kon neen, a akisi Filipus taki: ‘Pe wo bai beele gi den somen sama ya fu nyan?’ 6 Yesesi be sabi kaba san a be o du, ma a be akisi Filipus a sani ya fu sabi fa ai denki. 7 Filipus piki en taki: ‘Winsi u be o bai beele fu 200 solufu moni*, toku aa be o sai fu ala sama fende wan pikin pisi seefi.’ 8 Wan fu den bakaman fi en di den e kai Andreyas, a baala fu Simon Peitilisi taigi en taki: 9 ‘Wan pikin boi de ya anga feifi beele* anga tu pikin fisi, ma a naw sai den somen sama ya.’

10 Neen Yesesi taki: ‘U meke den sama go sidon.’ Gaasi be lai ape, neen meke ala den sama go sidon aini a gaasi. Wan sani fu 5000 mannengee be de ape. 11 Yesesi teke a beele, neen a gi Gadu daa. Bakadati a paati en gi den sama di be sidon ape. Na aseefi sani a du anga den fisi. Ala den sama nyan te den bee fuu. 12 Di den kaba nyan, a taigi den bakaman fi en taki: ‘U piki den pisi beele di fika, bika nawan sani mu fika poli.’ 13 Neen den go piki den beele. Di den piki te den kaba, den fuu 12 bakisi anga den pisi beele di be fika di ala sama nyan.

14 Di den sama si a wonduu di a du, den taki: ‘Neen na a Polofeiti di be mu kon a goontapu tuu.’ 15 Yesesi be sabi taki den be wani poti en enke kownu anga taanga. Neen meke a subi go na a mongo baka. Ma a leisi ya neen wawan be go.

16 Di neti tapu, den bakaman fi en saka go na a ze. 17 Den go aini wan boto, neen den teke pasi fu gwa Kaperna-um. A peesi be dunguu kaba, ma Yesesi á be kon miti den ete. 18 A wataa bigin seke tu, bika wan gaan winta be e wai. 19 Di den de wan sani fu feifi go miti sigisi kilomeiti a mindii wataa, den si Yesesi e waka na a wataa tapu kon na a boto. Ná pikin feele den feele, 20 ma a taigi den taki: ‘Wa feele, a mi de ya!’ 21 Di a taki so, neen den meke a kon aini a boto. Aa langa bakadati, neen den doo a pe den be e go.

22 A taa dei, den sama di be fika na abaase fu a ze, be si taki boto á be de ape moo. A den bakaman fu Yesesi wawan be gwe anga a pikin boto di be de ape. Yesesi á be go anga den. 23 Boto be komoto a Tiberiyas go koosube a pe Yesesi be gi den sama beele fu nyan baka di a be gi Gadu daa. 24 Di den sama si taki Yesesi anga den bakaman fi en á be de ape, den go aini den boto baka, neen den gwa Kaperna-um fu go suku Yesesi.

25 Di den si en na a taase fu a ze, den akisi en taki: ‘Leliman, on ten i kon dise?’ 26 Yesesi taigi den taki: ‘Mi sabi taki a ná den wonduu di u si meke we suku pe mi de, ma a di u fende beele nyan te u bee fuu. 27 Wa mu wooko gi a nyanyan di e poli, ma u mu wooko gi a nyanyan di nai poli. Neen o meke u fende teego libi. Na a Manpikin fu libisama o gi wi a nyanyan ya, bika Gadu, a Dda di de a hemel naki sitampu taki a fende en bun.’

28 Neen meke den akisi en taki: ‘Saw mu du fu Gadu fende u bun?’ 29 Yesesi piki den taki: ‘Efu u wani Gadu fende u bun, daw mu biibi a sama di a sende kon.’ 30 Den akisi en taki: ‘Da san yo du fu meke u biibi i? Sowtu wonduu yo du? 31 Den afo fu u be nyan mana aini a sabana leti enke fa a sikiifi aini Gadu buku. A sikiifi taki: “A meke beele komoto a hemel gi den fu nyan.”’ 32 Neen Yesesi taigi den taki: ‘A ná Mosesi be gi wi a beele di be komoto a hemel, ma a Nda e gi wi a tuutuu beele di e komoto a hemel. 33 Bika a beele fu Gadu, na a beele di saka komoto a hemel fu meke sama* fende libi.’ 34 Neen den taigi en taki: ‘Masaa na ala yuu i mu e gi wi a beele ya.’

35 Yesesi taigi den taki: ‘A mi na a beele di e gi libi. Efu wan sama e waka a mi baka, angii naw kii en moo. Noiti moo wataa o kii a sama di e biibi mi tu. 36 Ma enke fa mi be taigi u kaba, da winsi faw si den somen wonduu di mi du, tokuso u nai biibi mi. 37 Ala den sama di a Dda gi mi, o kon waka a mi baka. Noiti mio yaki a sama di e kon waka a mi baka, 38 bika mia saka komoto a hemel fu du san miseefi wani, ma mi kon fu du san a sama di sende mi kon wani. 39 A disi a sama di sende mi kon wani mi du: mia mu lasi nawan fu den sama di a gi mi, ma mi mu meke den kon a libi baka na a lasiti dei. 40 Nda wani ala sama di sabi a Manpikin anga di e biibi en, fende teego libi. Mio weki a sama de baka na a lasiti dei.’

41 Bakadati den Dyu bigin kuutu en fu di a taki: ‘A mi na a beele di komoto a hemel.’ 42 Den bigin taki: ‘A Yesesi ya a ná a manpikin fu Yowsefu noh? Wa sabi en mma anga en dda noh? Da fa a waka ai taki: “Mi saka komoto a hemel?”’ 43 Neen Yesesi taigi den taki: ‘Wa de ape e kuutukuutu moo. 44 Nawan sama á poi kon a mi efu a Dda di sende mi, á hali en kon. Mio weki a sama ya na a lasiti dei. 45 Den Polofeiti be sikiifi taki: “Yehofa o leli ala den sama.” Iniiwan sama di e aliki a Dda, neen a du san a Dda taki, e waka a mi baka. 46 Nawan sama si a Dda boiti a sama di komoto neen. Neen wawan si a Dda. 47 Biibi mi, iniiwan sama di e biibi mi o fende teego libi.

48 A mi na a beele di e gi libi. 49 Den afo fu u be nyan mana* aini a sabana, tokuso den dede. 50 Ma efu wan sama nyan a beele di komoto a hemel, a naw dede. 51 A mi na a beele di komoto a hemel. A beele ya e meke sama fende a libi. Iniiwan sama di nyan a beele ya, o libi fu teego. Fu taki en kiin, a beele di mio gi, a mi sikin fu a goontapu sa fende libi.’

52 Neen den Dyu bigin kuutu. Den taki: ‘Fa a man ya sa taki aw gi wi en sikin fu nyan?’ 53 Neen meke Yesesi taigi den taki: ‘Biibi mi, efu wa nyan a sikin fu a Manpikin fu libisama daw diingi en buulu, u naw fende a libi*. 54 Iniiwan sama di nyan mi sikin da a diingi mi buulu o fende teego libi. Mio weki en baka na a lasiti dei, 55 bika a mi sikin na a moo bun sani fu nyan. Mi buulu na a moo bun sani fu diingi. 56 Iniiwan sama di e nyan mi sikin da a diingi mi buulu o de wan anga mi. Mio de wan anga en tu. 57 Na a Dda di de a libi sende mi kon, neen gi mi libi. A letiso den sama di o nyan mi sikin o libi tu, bika mio gi den libi. 58 Disi na a beele di komoto a hemel. A beele ya á de enke a beele di den afo fu u be nyan, bika den dede bakaten. Ma iniiwan sama di nyan a beele ya o libi fu teego.’ 59 A be taki den sani ya aini wan snoga* di a be de a Kaperna-um e gi leli.

60 Di den yee san a taki, omen fu den bakaman fi en taki: ‘San a den sani di a man ya e taki ya? Wa poi yee den sani ya.’ 61 Ma Yesesi be sabi taki den bakaman fi en be e kuutu di den yee san a taki. Neen meke a akisi den taki: ‘Na a sani di mi taki de dyombo u so? 62 Da fa wo du di wo si a Manpikin fu libisama opo gwa pe a be komoto? 63 Na a yeye fu Gadu e gi sama libi, libisama á poi du a sani ya. Na a yeye meke mi taki den sani ya. A den sani ya e meke sama fende libi. 64 Ma son wan fu u ya nai biibi.’ Yesesi be taki den sani ya fu di a be sabi a fesi kaba sama a den sama di á be o biibi en. A be sabi tu sama be o konkuu en. 65 Bakadati a taki: ‘Neen meke mi be taigi u taki, nawan sama á poi waka a mi baka efu a Dda á gi en a okasi.’

66 Na a sani ya meke omen fu den bakaman fi en daai go du den sani di den be gwenti du. Den á be wani waka anga en moo. 67 Neen Yesesi akisi den twalufu apostel taki: ‘Useefi á wani gwe tu noh?’ 68 Simon Peitilisi taigi en taki: ‘Masaa, da pe wo go? A ye taki sani di e meke sama fende teego libi. 69 We biibi taki i na a Santawan fu Gadu. U sabi taki ai na a Santawan fu Gadu.’ 70 Yesesi taigi den taki: ‘A ná miseefi teke wi enke mi apostel noh? Tokuso wan fu wi a wan ogii-ati leiman*.’ 71 A Yudas, a manpikin fu Simon Iskariot a be e taki. Bika neen be o konkuu en, winsi fa en a be wan fu den twalufu apostel.