Den sani di Lukasi sikiifi

21 Di Yesesi opo ede luku, a si fa den guduman e poti moni aini den moni-kedee. 2 Bakadati a si wan pooti uman di man dede, poti tu sensi* aini wan fu den kedee. 3 Neen Yesesi taki: ‘Biibi mi, fu ala den sama di poti moni aini den kedee, a pooti uman ya poti moo ipi. 4 Ala den taa sama poti san be fika di den du ala den sani fu den. Ma winsi fa a uman ya pooti, tokuso a poti ala san a be abi fu solugu enseefi.’

5 Bakaten, son sama be e taki fu a fasi fa a tempel meke. A meke anga moin siton, anga taa sani di sama be gi Gadu. 6 Neen meke Yesesi taki: ‘Wan ten o kon di u naw si den sani ya moo. Nawan fu den siton ya o fika a taawan tapu, den o booko ala den fiya.’ 7 Bakadati den bakaman fu Yesesi akisi en taki: ‘Leliman, on ten den sani ya o pasa? San wo si di o soi u taki den sani ya o pasa?’ 8 Yesesi taigi den taki: ‘U mu luku bun fu sama á fende u koli. Bika a omen sama o kon da den taki: “A mi na a Kelestesi.” Efuso “A kaba koosube.” Wa mu waka a den baka. 9 Wa mu buuya te we yee taki feti e feti, efuso te sani nai go bun. Bika den sani ya mu pasa, ma a kaba naw kon wantenwanten.’

10 Neen a taigi den taki: ‘Foluku o go e feti anga denseefi, kondee* o go e feti anga taa kondee. 11 Seke-doti o de, nyanyan o pina na ala se, siki o de na ala peesi. Sama o si sani di o meke den feele. Gaan maiki o de fu si a hemel.

12 Ma fosi den sani ya pasa, sama o du ogii anga u, den o kisi u tyai gwe. Den o tyai u gwa den snoga* anga sitaafu-osu. Den o tyai u gwa tiiman anga kownu fesi fu mi nen ede. 13 Te den sani ya pasa, da wo fende a okasi fu peleiki gi taa sama. 14 Ma u naafu go sidon pakisei a fesi san wo taki. 15 Mio gi u koni fu u sabi san u mu taki. Den feyanti fu u naw poi piki u. 16 Boiti dati, u dda, u mma, u baala, u famii anga u mati seefi o meke sama sooto u, den o kii son wan fu u tu. 17 Ala sama o buuse u fu mi nen ede. 18 Ma u naafu feele, bika nawan uwii a wi ede seefi o lasi. 19 Efu u holidoo, wo fende libi.

20 Te u si suudati sete kampu lontu Yelusalem, daw sabi taki a yuu koosube fu a foto booko. 21 Da den sama di e tan a Yudeya mu lowe gwa den mongo. Den sama fu Yelusalem mu lowe komoto aini a foto. Den sama di e tan a doose fu a foto á mu kon aini, 22 bika na a ten de Gadu o sitaafu sama. Da ala den sani di sikiifi aini Gadu buku o kon tuu. 23 Heelu fu den uman di de anga bee anga den uman di abi pikin a bobi na a ten de. Bika wan gaan banowtu o kon aini a kondee, da Gadu o sitaafu den sama ya. 24 Sama o kii den anga fetihow, da den o tyai den gwa den taa kondee sama enke sitaafuman. Da den taa kondee sama o taampu Yelusalem anga futu te enke a yuu fu den taa kondee sama pasa.

25 Maiki o de fu si na a san, a mun, anga den sitali. A ze o ligei, neen meke den sama a goontapu o feele, den naw sabi san fu du. 26 Di den kaakiti fu hemel o seke, sama o buuya te den si den sani di e pasa a goontapu, den o feele te da den faaw. 27 Den o si a Manpikin fu libisama e kon aini wan woluku. Aw kon anga makiti anga gaan gendee. 28 Ma te den sani ya o bigin, u mu opo taampu da wi opo wi ede, bika a yuu di Gadu o fii wi koosube.’

29 Baka di a taki den sani ya a gi den wan ageisitoli. A taki: ‘U poti pakisei na a figabon anga den taa bon. 30 Te u si taki den bigin kengi uwii, daw sabi taki a waan ten fu a yali koosube. 31 A letiso useefi mu sabi taki te u si den sani ya e pasa, daw mu sabi taki a Kownukondee fu Gadu koosube. 32 Biibi mi, den sama fu a ten ya naw dede fosi ala den sani ya pasa. 33 Hemel anga goontapu naw de moo, ma den sani di mi taki o tan fu teego.

34 U mu luku bun taki den sani enke nyan pasa maiki, diingi pasa maiki anga den booko-ede fu a libi á poli a denki fu u. Efuso a wanboowanboo a dei de o doo aw tapu, 35 enke fa wan akaapana e kisi wan meti. Mi e taigi u den sani ya, bika a dei ya o kon a wan yuu di nawan sama a goontapu be denki. 36 Neen meke u mu tan na ain, da we begi naamo anga u hii ati fu u sa tan a libi te ala den sani ya o pasa. U mu e begi Gadu tu fu a yeepi u fu u sa taampu na a Manpikin fu libisama fesi.’

37 Deiten a be e leli sama aini a tempel, ma neti a be e go siibi na a Oleifi Mongo. 38 Fuuku mmanten, ala den sama be e kon na a tempel fu aliki en.