Den sani di Lukasi sikiifi
13 Na aseefi pisiten de, wantu sama kon gi Yesesi a toli fu den Galileyasama di Pilatus kii di den be e tyai den ofaandi fu den. 2 Neen a taigi den taki: ‘U si enke a sondu den Galileyasama ya be sondu moo den taa sama fu Galileya meke a sani ya miti den? 3 Nono, ma mi e taigi u taki efu wa daai u libi, wo dede leti enke den. 4 U denki taki den 18 sama di a sikotu fu Silowam be booko kai kii be sondu moo ala den taa sama a Yelusalem? 5 Nono, ma mi e taigi u taki efu wa daai u libi, wo dede leti enke den.’
6 Bakadati a gi den wan ageisitoli. A taki: ‘Wan man be abi wan figabon aini en doloifigoon. Di a go suku figa na a bon ya, aa fende nawan. 7 Neen a taigi a sama di be e wooko aini a doloifigoon taki: “A dii yali langa kaba mi e kon suku sii na a figabon ya, ma mia poi fende nawan. Koti en towe! A fu soso a de ya e fuu peesi.” 8 Ma a man taigi en taki: “Masaa, fika en ete wan yali baa, mio puu gotoo lontu en da mi poti doti gi en. 9 Efu a meke nyanyan bakaten, da a bun. Ma efu aa meke nyanyan, i sa koti en towe.”’
10 Wan leisi Yesesi be e leli sama na a Sabadei aini wan fu den snoga*. 11 Wan uman be de ape di be abi wan takuu yeye neen tapu. A yeye be meke a siki 18 yali langa. Aa be poi waka bun, a bendibendi a be e waka. 12 Di Yesesi si a uman, a kai en neen a taigi en taki: ‘Uman, i kon bun, i naabi a siki ya moo.’ 13 Faisi a poti ana na a uman tapu, a so a opo taampu wanten neen a bigin gafa Gadu. 14 Ma a fesiman fu a snoga* ati be boon taki Yesesi be deesi sama na a Sabadei*. Neen meke a taigi den sama taki: ‘Wi abi sigisi dei fu wooko. A den dei de u mu kon efu u wani sama deesi u, wa mu kon na a Sabadei.’ 15 Ma Masaa Yesesi taigi en taki: ‘Bidiigiman! U nai losi den man kaw anga den buliki fu u fu go diingi wataa a Sabadei noh? 16 A uman ya a wan bakapikin fu Abalaham di Saatan pina 18 yali langa. Da wa si enke a fiti taki a fii fu a siki ya a wan Sabadei noh?’ 17 Di a taki den sani ya, sen kisi ala den feyanti fi en. Ma ala den sama di be de ape be e poolo di den si ala den gaan sani di Yesesi du.
18 Bakadati a taigi den taki: ‘Anga san mi sa maiki a Kownukondee fu Gadu? 19 A de enke wan mosterd sii* di wan man paandi aini en dyali. A sii goo te enke a toon wan bon, neen den foo di e fee a tapu go meke nesi a den taka fi en.’
20 A taigi den ete wan leisi taki: ‘Anga san mi sa maiki a Kownukondee fu Gadu? 21 A de enke sowda di wan uman mokisa anga dii gaan beenki bolon, neen ala a bolon soopu.’
22 Di Yesesi be de pasi e gwa Yelusalem, a be e leli sama na ala den foto anga kampu di a be e pasa. 23 Wan sama akisi en taki: ‘Masaa, a tuu taki a wantu sama namo o fende a libi?’ Neen a taigi den taki: 24 ‘Du ala sai poi fu pasa na a sumaa doo, bika biibi mi, a omen sama o wani go aini, ma den naw poi. 25 Baka di a sama di abi a osu o sooto a doo, wo taampu a doose e koko a doo. Wo go e bali taki: “Masaa, opo a doo gi u baa.” Ma aw taigi u taki: “Mia sabi pe u komoto.” 26 Da wo taigi en taki: “U be sidon a tafaa e nyan diingi anga i, i be e leli sama a den gaan pasi fu u.” 27 Ma aw taigi u taki: “Mia sabi pe u komoto, u gwe komoto ya, bika a soso ogii we du.” 28 Di wo si Abalaham, Isaki, Yakopu, anga ala den polofeiti aini a Kownukondee fu Gadu, wo kee daw kaw tifi, bika u dati o de a doose. 29 Boiti dati, sama o komoto a faawe kondee, da den o sidon a tafaa aini a Kownukondee fu Gadu. 30 Da son wan fu den sama di be de lasitiwan, o toon fosiwan, son wan fu den fosiwan o toon lasitiwan.’
31 Aseefi yuu de, wantu fu den Faliseiman kon a Yesesi, neen den taigi en taki: ‘I mu gwe komoto ya, bika Herodes wani kii yu.’ 32 Ma Yesesi taigi den taki: ‘U go taigi a bidiigiman de taki: “Yee, tide anga tamaa mio puu takuu yeye a sama tapu ete, mio deesi sama tu, ma na a du fu dii dei da mio kaba.” 33 Ma tide, tamaa, anga taa tamaa mio go doo anga mi wooko te enke mi doo Yelusalem, bika aa fiti fu wan polofeiti dede a wan taa peesi. 34 Yelusalem, Yelusalem, a foto di e kii den polofeiti, di e fiingi siton kii den sama di Gadu sende. Leti enke fa wan umanfoo e tyai den pikin fi en kon a wan neen mapaapi ondoo, a so mi be wani tyai u kon a wan tu, ma wa be wani. 35 Gadu o gwe fika a tempel* fu u. Mi e taigi u taki u naw si mi moo te enke u taki: “Meke a sama di e kon aini a nen fu Yehofa* fende belesi.”’