Toli fu den Apostel

20 Di den sama á be e ligei moo, Pawlesi sende kai den taa bakaman. Baka di a gi den taanga-sikin, a bali adyosi, neen a teke pasi gwa Masadoniya. 2 Baka di a gi den baala anga sisa taanga-sikin aini den foto ape, a gwa Giikikondee. 3 A tan dii mun langa ape. Ma di a de fu teke boto gwa Siriya, a be yee taki den Dyu be wani kii en. Neen meke a daai gwa Masadoniya baka. 4 Aristakus anga Sekundus fu Tesalonika, Timotiyesi, Gayus fu Derbe, Tikikus anga Trofimus fu Asiya, anga a manpikin fu Pirus fu Bereya di den e kai Sopater be go anga en tu. 5 Den man ya be gwa fesi. Den be de a Trowas e wakiti u. 6 Ma u teke boto komoto a Filipi baka a fesa fu beele sondee sowda. Baka feifi dei u miti den taawan a Trowas neen u tan ape seibin dei.

7 A fosi dei fu a wiki u be kon makandaa fu nyan. Pawlesi be o gwe a tamaa fi en, neen meke a taki anga ala den sama di be kon ape te enke mindiineti. 8 A omen abeni be de letileti na a sodoo pe u be de. 9 Wan yonkuman di den e kai Etikus be sidon na a fensee. Di Pawlesi taki tee, a yonkuman ya kai a siibi neen a kai komoto na a du fu dii sodoo kon a ondoo. Di den go luku, den si taki a yonkuman ya be dede. 10 Ma di Pawlesi saka gwa ondoo, a bendi go neen, neen a baasa en. A taigi den sama taki: ‘Wa kee moo, bika a weki baka.’ 11 Bakadati Pawlesi subi gwa tapu, a booko a beele neen a bigin nyan. A taki anga den go doo te enke peesi kiin neen a gwe. 12 Bakaten den sama tyai a boi gwa osu. Ná pikin piisii den be e piisii taki a boi be de a libi.

13 Bakadati u teke boto gwa Asus. Wi anga Pawlesi be taki fiti taki a be o waka anga futu go na a foto ya, daw be o teke en ape. 14 Di a kon miti wi a Asus, u gwa boto, neen u gwa Mitileina. 15 A taa dei fi en u komoto ape, neen u doo a Kiyos. A dei bakadati u doo a Samos. A dei neen baka neen u doo a Mileite. 16 Pawlesi á be gwa Efeise, bika aa be wani tan a Asiya. Aa be wani daaidaai bika a be e meke moiti fu doo Yelusalem a dei fu a Pinksterfesa.

17 Ma di a be de a Mileite, a sende kai den owluman fu a kemeente fu Efeise. 18 Di den kon neen, a taigi den taki: ‘U sabi fa mi tyai miseefi fanafu a fosi dei di mi poti futu a Asiya. 19 Anga ala sakafasi anga wataa na ain mi be e wooko gi Masaa enke saafu. Mi miti omen tesi, bika den Dyu be meke mofu fu kii mi. 20 Toku mia daaidaai fu taigi u ala den sani di o tyai wini gi u. Mi be e leli wi aini gaan kulu, ma mi be e leli u osu fu osu tu. 21 Mi taigi den Dyu anga den Giikisama sama finifini taki den mu daai den libi, da den dini Gadu. Den mu biibi Masaa Yesesi tu. 22 Nownow mio gwa Yelusalem, bika a yeye fu Gadu soi mi taki mi mu go anda winsi fa mia sabi saw pasa anga mi anda. 23 A wan enkii sani di mi sabi a taki ala yuu te mi e gwa wan foto, a santa yeye e soi mi taki den o sooto mi efuso du ogii anga mi. 24 Ma mi nai booko mi ede anga mi libi. A wan enkii sani di mi wani du, a fu lon a sitee lon te na a kaba. Mi wani kaba a wooko di Masaa Yesesi gi mi tu. A wooko di a gi mi a fu paati a bun nyunsu finifini taki Gadu e soi bun-ati gi sama.

25 Mi sabi taki nawan fu u ya di mi paati a Kownukondee bosikopu gi o si mi fesi moo. 26 Neen meke mi kai u kon ya tide fu u sabi taki mi naabi nawan sama buulu paiman a mi tapu. 27 Bika mia kibii nawan sani gi u. Mi taigi u ala san Gadu abi a pakisei fu du. 28 Poti pakisei a useefi, daw solugu ala den sikapu fu Gadu, bika na a santa yeye poti wi enke sikapuman fu teke fesi aini a kemeente di Gadu bai anga a buulu fi en Manpikin. 29 Mi sabi taki baka di mio gwe, sama o kon aw mindii di de enke ogii busidagu. Den naw libi bun anga den sikapu fu Gadu. 30 Wantu man aw mindii o daai den tuu leli poti enke fa den wani, fu meke sama toon den bakaman.

31 Neen meke u mu de na ain, wa mu feegete taki a dii yali langa mi be e poti wi a pasi dei anga neti. Anga ala wataa na ain mi be e taki anga u. 32 Now mio fika u gi Gadu fu a luku u. A bosikopu fu a bun-ati fi en o kibii u. A bosikopu ya o taanga u, aw yeepi u fu fende a gudu di den santawan o fende. 33 Giili á be e kisi mi gi nawan sama solufu, gowtu efuso koosi. 34 Useefi sabi taki anga den tu ana fu mi ya mi wooko solugu miseefi, anga ala den sama di be de makandaa anga mi. 35 Aini ala san mi be e du, mi soi u taki u mu e yeepi den sama di swaki. U mu holi a sani di Masaa Yesesi be taki a pakisei. A be taki: “Te wan sama e gi taawan sani, ai piisii moo enke te taawan e gi en sani.”’

36 Baka di a taki den sani ya, en anga ala den sama di be de ape sutu kini a doti neen den begi. 37 Bakadati ala sama bali kee, den baasa Pawlesi neen den bosi en. 38 Ná pikin tyali kisi den di a taigi den taki den naw si en moo. Bakadati den tyai en go poti a boto.