Wan biifi gi den Romesama

1 A mi Pawlesi, wan saafu fu Kelestesi Yesesi sikiifi a biifi ya. Yesesi poti mi enke apostel fu paati a bun nyunsu fu Gadu. 2 Gadu be meke den polofeiti fi en taki fu a bun nyunsu ya aini den Santa Buku fi en. 3 A bun nyunsu ya e taki fi en Manpikin. A Manpikin fi en a wan bakapikin fu David. 4 A de kiin fu si taki neen na a Manpikin fu Gadu, bika Gadu be koboloiki a santa yeye fi en fu meke a kon a libi baka. A Manpikin ya a Yesesi Kelestesi, a Masaa fu u. 5 A fi en ede meke Gadu be poi soi bun-ati gi mi. Neen meke mi fende a gaandi tu fu toon wan apostel, fu mi sa yeepi ala den taa kondee sama fu biibi en da den du san a taki. Te den e du a sani ya den e gafa en nen. 6 Useefi a taa kondee sama di Gadu teke fu toon bakaman fu Yesesi Kelestesi. 7 Mi e sende a biifi ya gi ala den sama fu Rome di Gadu lobi. A kai den sama ya fu toon santa sama.

Meke a freide anga a bun-ati fu u Dda di de a hemel, anga Masaa Yesesi Kelestesi de anga u ye.

8 Na a fosi peesi, mi e gi Gadu daa aini a nen fu Yesesi Kelestesi fu wi ede, bika na ala se fu goontapu sama e taki fu a biibi fu u. 9 Anga mi hii ati mi e du a wooko di Gadu gi mi fu paati a bun nyunsu fi en Manpikin. Gadu seefi sabi taki na ala yuu mi e kai u nen te mi e begi. 10 Mi e begi Gadu fu mi sa fende a okasi fu kon luku u efu a de en wani. 11 Bika mi e angii fu si u te, fu mi sa taigi u sani fu Gadu. A sani ya o meke u biibi moo taanga. 12 Fu taki en kiin, mi wani mi anga u miti fu u sa gi makandaa taanga-sikin, wo gi makandaa taanga-sikin anga a biibi fu u.

13 Den baala fu mi, mi wani u sabi taki a omen leisi mi be wani kon a wi anda ma mia fende a okasi ete. Mi be wani kon yeepi sama fu toon Yesesi bakaman, enke fa mi yeepi den taa kondee sama a taa peesi. 14 Mi de a paiman na ala sama. Mi de a paiman a Giikisama anga taa kondee sama, sama di gwa hei sikoo anga sama di á gwa sikoo. 15 Neen meke mi e angii fu kon paati a bun nyunsu gi wi a Rome anda. 16 Bika sen nai kisi mi fu paati a bun nyunsu. Fu taki en kiin, anga a bun nyunsu Gadu e soi a makiti fi en fu di ai fii den sama di e biibi en. A den Dyu fosi be yee a bun nyunsu ya, bakadati den Giikisama seefi yee en. 17 Bika a bun nyunsu ya e soi taki Gadu e du sani a wan letifasi gi den sama di e biibi en. A sani ya e moo taanga a biibi fu den, bika Gadu buku taki: ‘A sama di e libi a wan letifasi o tan a libi fu di ai biibi.’

18 Gadu di de a hemel e soi taki en ati e boon, te ai si den ogii anga den takuu-ati sani di son sama e du fu tapu taawan fu sabi a tuu. 19 Den sabi bunbun sama a Gadu, bika a soi den kiin sama neen. 20 Senten di goontapu meke, neen sama poi si sowtu manii Gadu abi. Winsi fa den nai si Gadu, toku te den e luku den sani di a meke, den poi si taki a abi teego kaakiti. Den poi si tu taki neen a Gadu tuutuu. Neen meke nawan sama poi taki anga leti taki Gadu á de. 21 Winsi fa den sabi Gadu, toku den á wani gi en gaandi efuso gi en daa. Den e denki enke sama di naabi fusutan, den ati baaka. 22 Den e si enke den koni, ma ná pikin don den don. 23 Pe fu den gi a Gadu di á poi dede gaandi, den e meke pobiki di e gei libisama di nai libi langa. Den e meke pobiki fu fo futu meti, foo, anga meti di e hali anga bee a doti, da den e gi den gaandi.

24 Gadu fika den meke den du den tyobo sani di den ati wani, neen meke den e du sen sani anga den sikin. 25 Den poti den tuu leli fu Gadu a wanse, neen den teke lei e biibi. Den fika a Gadu di meke ala sani, a Sama di u mu gafa fu teego, neen den go dini den sani di a meke. 26 Neen meke Gadu fika den meke den sekisi fii fu den basi den. Den umanpikin nai denki fu siibi anga man, ma den wani du sen sani anga taa uman. Gadu á be meke den fu du den sani ya. 27 Den mannengee seefi á de neen fu siibi anga uman enke fa Gadu meke den, ma den kon abi taanga fii gi taa mannengee. A so man anga man bigin du tyobo sani anga denseefi. Gadu o sitaafu den gi den poli sani di den e du.

28 Den á fende en fanowdu fu sabi Gadu, neen meke a fika den anga den poli denki fu den, fu den du sani di á bun. 29 Den sama ya e du ala sowtu ogii, den giili, den abi takuu-ati, den e dyalusu anga taawan, den e kii taawan, den e feti, den e lei, den e taki sama sani, 30 den e taki ogii fu taawan, den e buuse Gadu, den naabi lesipeki, den abi heimembee, den lobi gafa, a soso ogii den e pakisei, den nai aliki den mma anga den dda, 31 den ede taanga, den nai du san den paamisi, den á lobi taawan, den naabi tyali-ati. 32 Gadu taki den sama di e du den sani ya mu dede. Winsi fa den sabi a sani ya, toku den e du den go doo. Boiti dati, den e holibaka gi den sama di e du den sani ya.