Wan biifi gi den Romesama

6 Da a sani ya wani taki u mu tan du sondu fu Gadu sa soi u moo bun-ati? 2 Kweti! Efu u fii fu sondu kaba da saide u wani libi so ete? 3 Wa sabi taki ala u di dopu fu u be sa toon wan anga Kelestesi, be dopu fu dede leti enke en noh? 4 A di u dopu fu dede leti enke Kelestesi, meke Gadu beli u makandaa anga en. Neen meke u mu libi wan nyun libi enke fa Kelestesi e libi wan nyun libi di Gadu weki en baka anga a kaakiti fi en. 5 U toon wan anga en fu di u dede leti enke en, neen meke wo toon wan anga en tu te u kon a libi baka, leti enke fa enseefi be kon a libi baka. 6 U sabi taki di sama sipikii Kelestesi a wan ponsu, den gaandi manii fu u sipikii makandaa anga en na a ponsu, neen meke a sondu sikin fu u nai basi u moo. Wi a ná saafu fu sondu moo tu. 7 Te wan sama dede, da a pai fi en sondu kaba.

8 Boiti dati, efu u dede anga Kelestesi, da we biibi taki wo kon a libi anga en tu. 9 Bika u sabi taki di Kelestesi kon a libi baka aa poi dede moo, dede á poi basi en moo tu. 10 A dede wan kodo leisi namo fu puu sondu fu teego. A libi di ai libi nownow a fu du a wani fu Gadu. 11 Leti enke faw mu si useefi enke dedesama te a abi fu du anga sondu, a letiso u mu si useefi enke sama di e libi fu du a wani fu Gadu, bika wa bakaman fu Kelestesi Yesesi.

12 Wa mu meke sondu tii a libi fu u enke kownu moo. Wa mu du den sani di a sikin* wani. 13 Wa mu teke u sikin enke wan sani fu du sondu, wa mu wooko anga en enke wan fetisani fu du sani di á bun. Ma u mu gi useefi abaa a Gadu enke sama di kon a libi baka. U mu gi u sikin enke wookosani fu du san bun*. 14 A Weiti nai tii u moo bika Gadu soi u bun-ati, neen meke sondu á mu basi u moo.

15 Da a sani ya wani taki u sa sondu fu di u nai wooko anga a Weiti moo fu di Gadu soi u bun-ati? Noiti. 16 Wa sabi taki efu we aliki wan sama ala yuu da wi a saafu fu a sama de noh? Efu wa saafu fu sondu wo dede. Ma efu wa saafu fu Gadu wo aliki en, da aw si wi enke leti-ati sama. 17 Mi e gi Gadu daa, bika wa be saafu fu sondu, ma now we du den sani di Gadu leli wi anga u hii ati. 18 Nownow wi a ná saafu fu sondu moo, ma u toon saafu fu Gadu di e du san bun*. 19 A sikin fu u swaki, neen meke mi e taki anga wi a wan fasi di libisama sa fusutan. U be e meke den fii fu u meke u du sani di á kiin anga sani di á bun. Ma nownow u mu meke moiti fu du bun sani* anga sani di santa. 20 Bika di u be de saafu fu sondu, wa be abi fu du sani a wan letifasi.

21 Sowtu wini u be e fende fu den sani di u be e du fosi? Nownow sen e kisi u fu den sani di u be e du, a bakapisi fu den sani ya a dede. 22 Nownow wi a ná saafu fu sondu moo, ma wi a saafu fu Gadu. Neen meke u mu du sani di santa, da wo fende teego libi. 23 A bakapisi fu sondu a dede, ma Gadu koboloiki u Masaa Kelestesi Yesesi fu gi u teego libi enke kado.