A fosi biifi gi den Korentesama

15 Den baala fu mi, mi wani u poti pakisei na a bun nyunsu di mi be paati anga u. Di u yee a bun nyunsu ya u teke en anga u hii ati, wa fika den sani di u yee tu. 2 Efu u tan biibi a bun nyunsu di mi leli u, wo fende a libi. Ma efu u fika den sani di we biibi, da a fu soso u toon Yesesi bakaman.

3 Bika wan fu den fosi sani di mi leli u, a san miseefi kon sabi. Dati na a dede di Kelestesi dede fu pai gi den sondu fu u, enke fa a sikiifi aini Gadu buku. 4 Den beli en, ma Gadu weki en baka na a du fu dii dei enke fa a sikiifi aini Gadu buku. 5 A meke Seifas* si en. Bakadati a meke den twalufu apostel fi en si en. 6 Bakaten a meke moo enke 500 baala di be de na a wan peesi si en. A omen fu den de a libi ete, ma son wan fu den dede kaba. 7 A meke Yakowbesi si en, bakadati a meke ala den apostel si en tu. 8 A mi na a lasitiwan di a meke si en. Neen meke mi de enke wan pikin di meke fosi en yuu doo.

9 Mia pelensipali enke den taa apostel. Mia fiti seefi fu sama kai mi apostel, bika mi be e du ogii anga a kemeente fu Gadu. 10 Ma a di Gadu soi bun-ati gi mi meke mi de enke fa mi de nownow. A bun-ati di a soi mia be de fu soso, bika mi wooko taanga moo ala den taawan. A ná anga mi kaakiti mi du a sani ya, ma na a bun-ati fu Gadu yeepi mi. 11 Winsi a mi efuso wan fu den taa apostel peleiki gi u, na aseefi bosikopu we paati. Na a bosikopu ya u biibi baka di u yee en.

12 We paati a bosikopu taki Kelestesi kon a libi baka. Da fa a waka omen fu we taki dedesama naw kon a libi baka? 13 Efu dedesama naw kon a libi baka, da Kelestesi seefi á kon a libi baka tu. 14 Ma efu Kelestesi á weki baka, da a fu soso we peleiki. A fu soso we biibi tu. 15 Efu dedesama á poi kon a libi baka, da we lei gi Gadu. Bika we paati a bosikopu taki Gadu meke Kelestesi kon a libi baka. 16 Efu dedesama á poi kon a libi baka, da Kelestesi seefi á kon a libi baka tu. 17 Boiti dati, efu Kelestesi á kon a libi baka da a fu soso we biibi. Bika da wa fende paadon fu den sondu fu u. 18 Da den sama di dede enke bakaman fu Kelestesi dede fu teego tu. 19 Efu u naw fende wini fu Kelestesi aini a ten di e kon, da a wi a den moo ogii ede sama di de.

20 Ma we biibi taki Kelestesi kon a libi baka tuu. Fu den sama di dede, neen na a fosiwan di kon a libi baka. 21 A wan man tyai dede kon, neen meke a wan man o meke dedesama kon a libi baka tu. 22 Leti enke fa Adan meke ala sama e dede, a so Yesesi o meke ala sama kon a libi baka. 23 Ma ibiiwan sama o kon a libi te en yuu doo. Kelestesi fosi be weki. Den sama fu Kelestesi o kon a libi baka te a daai kon baka. 24 Na a kaba, Kelestesi o gi en Dda di de a hemel a Kownukondee baka. Ma fosi a gi en Dda a Kownukondee, aw puu ala tiimakiti anga sama di abi makiti a pasi. 25 Aw tii enke kownu te enke Gadu poti ala den feyanti fi en neen futu ondoo. 26 Dede na a lasiti feyanti di aw puu a pasi. 27 Bika ‘Gadu poti ala sani a Kelestesi ondoo’. Ma dati á wani taki Gadu seefi de a Kelestesi ondoo, bika neen na a Sama di ‘poti ala sani a Kelestesi ondoo’. 28 Ma te ala sani o de na a Manpikin ondoo, da a Manpikin seefi o soi taki ai saka enseefi a Gadu ondoo, bika a Gadu poti ala sani neen ondoo. Da Gadu o de ala sani gi ala sama.

29 Efu den sama di dede naw kon a libi baka, da saw pasa anga den sama di e dopu a dopu di o tyai dede gi den? Saide den e dopu a dopu ya? 30 Saide we du sani di sa tyai dede gi u? 31 Den baala fu mi, leti enke fa mi e piisii taki u de wan anga u Masaa Kelestesi Yesesi, a letiso u sa biibi taki ala dei sani e miti mi di sa tyai dede gi mi. 32 Efu mi feti anga ogii meti a Efeise leti enke taa sama, da sowtu wini mi fende? Efu den dedesama naw kon a libi baka, ‘da meke u nyan diingi, bika tamaa wo dede’. 33 Ná meke sama koli u. Takuu mati e poli den bun manii di wan sama abi. 34 U mu kisi useefi, daw du bun. Wa mu e sondu, bika son wan fu u á sabi Gadu. Mi e taki a sani ya fu sen kisi u.

35 Ma kande wan sama akisi u taki: ‘Fa den sama di dede o kon a libi baka? Sowtu sikin den o abi?’ 36 Saide ye poti den sowtu akisi ya? Ya sabi taki tei paandi wan sii a mu dede fosi da a kon a libi noh? 37 Te we paandi, a wan sii we paandi, u nai paandi wan sani di goo kaba. Winsi a wan alisi efuso taa sowtu sii, toku na a sii we paandi. 38 . Ma Gadu meke iniiwan bon enke fa a wani. Iniiwan sii di e goo e meke taa fasi. 39 A ná ala sikin meke aseefi fasi, libisama abi den sikin, meti abi den sikin, foo abi den sikin, fisi seefi abi fu den sikin. 40 Yu abi sani a hemel anga sani a goontapu. Den sani di de a hemel anga den sani di de a goontapu á meke aseefi fasi. 41 A san, a mun anga den sitali nai beenki na aseefi fasi. Fu taki en kiin, ibiiwan sitali e beenki neen fasi.

42 A so a de anga den sama di o kon a libi baka. A sikin di dede o poli, ma a sikin di o kon a libi baka naw poli. 43 A be paandi anga sen, ma aw fende gaandi di aw kon a libi baka. A be swaki di a be paandi, ma aw kon a libi baka anga kaakiti. 44 A be paandi enke wan libisama sikin, ma aw kon a libi baka enke wan yeye sikin. Efu wan libisama sikin de, da wan yeye sikin de tu. 45 Gadu buku taki: ‘A fosi man Adan toon wan libisama.’ A lasiti Adan toon wan yeye di e gi libi. 46 A ná a yeye sikin fosi kon. Na a libisama sikin fosi be de, a bakadati a yeye sikin kon. 47 A fosi man, a goontapu a komoto. Anga doti a meke. Du fu tu man komoto a hemel. 48 Den sama fu a goontapu ya de enke a man di Gadu be meke anga doti. Den sama di de a hemel de enke a sama di komoto a hemel. 49 Leti enke fa we gei a sama di meke anga doti, a so wo gei a sama di de a hemel tu.

50 Den baala fu mi, mi e taigi u taki dugudugu anga buulu á poi go aini Gadu Kownukondee. Wan sani di e poli á poi toon wan sani di nai poli. 51 Mio taigi u wan santa kibiitoli. A ná ala wo dede, ma na ala wo kengi. 52 Di den o boo a lasiti tutu da wantenwanten, fosi i pingi yu ain, den sama di dede o kon a libi baka. Di a tutu o bali, den sama di dede o kon a libi baka anga wan sikin di naw poli noiti moo, da wo kengi. 53 A sikin di e poli o kengi kon toon wan sikin di á poi poli. A sikin di e dede o kengi kon toon wan sikin di á poi dede. 54 Ma te a sani di e poli kengi kon toon wan sani di nai poli, efuso te a sani di e dede kengi kon toon wan sani di á poi dede moo, da a sani di Gadu buku taki o pasa. A sikiifi taki: ‘Dede komoto a pasi fu teego.’ 55 ‘Dede, ya poi wini moo. Dede, pei maka de?’ 56 A maka di e tyai dede kon a sondu. A kaakiti fu sondu na a Weiti. 57 Ma we gi Gadu daa fu di a meke u wini anga yeepi fu Yesesi Kelestesi.

58 Den baala fu mi, u mu taampu gingin, wa mu buuya. U mu e wooko taanga gi Masaa ala yuu, bika u sabi taki a wooko di we du gi Masaa, a ná fu soso.