A fosi biifi gi Timotiyesi

1 A biifi ya komoto a Pawlesi di Gadu seefi poti enke wan apostel fu Kelestesi Yesesi. A Gadu fii wi. Masaa Yesesi Kelestesi na a sama di meke wi abi howpu. 2 Mi e sende a biifi ya gi Timotiyesi di de enke mi pikin aini a biibi.

Meke a bun-ati, a tyali-ati anga a freide fu u Dda di de a hemel anga u Masaa Yesesi Kelestesi de anga i.

3 Di mi be de fu gwa Masadoniya mi be begi i fii fika a Efeise. Mi wani begi i baka fu fika ape fii sa wasikoi den sama di wani tyai falisi leli kon aini a kemeente. 4 Yeepi den fu den á poti pakisei a lei toli, efuso lasi den ten fu go ondoosuku sama a den afo fu den, bika den sani ya naabi nawan wini, a moo den e moo buuya sama*. A ná Gadu den sowtu sani ya e komoto, neen meke den nai taanga sama biibi. 5 Mi wani u biibi taanga. Mi wani u lobi useefi anga wan kiin ati anga wan kiin kosensi tu, neen meke mi e taigi u den sani ya. 6 Fu di son sama nai du den sani ya, meke den poti denseefi aini ala sowtu soso taki. 7 Den wani leli sama sani fu a Weiti namonamo, ma denseefi nai fusutan den sani di den e taki anga den sani di den wani leli taawan.

8 U sabi taki a Weiti bun, solanga sama e wooko anga en a wan bun fasi. 9 U sabi taki weiti á meke gi den sama di e libi a wan letifasi. Ma a meke gi sama di nai wooko anga weiti, sama di nai saka denseefi, sama di naabi toobi anga Gadu, sama di e du ogii, sama di e gwe fika Gadu efuso taawan, sama di á lobi santa sani, sama di e kii den dda, den mma efuso taawan. 10 Sama di e libi wan hululibi, man di e libi anga taa man, sama di e kisi taawan tyai gwe anga taanga, sama di e lei, sama di nai du san den paamisi, anga sama di e du iniiwan taa sani di nai kai anga den leli di e tyai wini gi u. 11 Den leli ya e kai anga a bun nyunsu di a koloku Gadu gi mi fu paati gi sama.

12 Ai bigi gi mi taki Yesesi Kelestesi u Masaa, gi mi a kaakiti fu wooko gi en fu di ai fitoow mi, 13 winsi fa mi be e taki ogii fu Gadu fosi. Mi be e du ogii anga a foluku fi en, mia be abi sen, ma toku Kelestesi soi tyali-ati gi mi, bika mia be sabi san mi be e du. A di mia be e biibi meke mi be e du den sani ya. 14 Ma Masaa Gadu soi gaan bun-ati gi mi. Kelestesi Yesesi soi taki a lobi mi, a yeepi mi fu abi biibi. 15 A sani di mio taki ya a tuu, u sa biibi en. Kelestesi Yesesi kon a goontapu fu fii sama di abi sondu. Fu ala den sama di abi sondu, mi ogii moo ala. 16 A mi na a moo sondu sama di de. Ma Kelestesi Yesesi soi tyali-ati gi mi. Kelestesi du a sani ya fu soi ala a pasensi di a abi. Te taa sama luku a tyali-ati di Yesesi soi mi, da a sani ya o yeepi den fu si taki den sa fende teego libi efu den biibi en.

17 Meke a Kownu di de fu teego, a wan di á poi dede, di sama á poi si, a wan enkii Gadu, fende gaandi. Meke u gafa en fu teego, eeye fu ala ten. Amen.

18 Mi boi Timotiyesi, den sani di mi akisi i fu du ya e kai anga san den polofeititoli be taki fii. Den polofeititoli ya mu gii taanga-sikin fu tan feti a bun feti. 19 I mu e meke moiti fii biibi á swaki, i mu abi wan kiin kosensi tu. A di son sama ná aliki a kosensi fu den meke a biibi fu den saka gwe enke wan sipi di sungu. 20 Tu fu den sama ya a Himeneyus anga Aleksander. Mi fika den gi Didibii*, da a sitaafu di den o fende o leli den taki den á mu e soso Gadu.