Toli fu den Apostel

28 Di u doo soo, u yee taki a tabiki ya nen a be Malta. 2 Den sama fu ape libi switi anga u te. Den be meke wan faya gi u, bika a alen be e kai, a peesi be koo tu. 3 Pawlesi teke wan ipi udu poti na a faya, ma wan sineki be de a den udu mindii. Di a sineki fii a waan fu a faya, a biti Pawlesi neen ana. 4 Di den sama si a takuu sineki fasi a Pawlesi ana, den bigin taigi denseefi taki: ‘A man ya musu fu de wan kiiman. Winsi fa aa dede aini a ze, tokuso a gadu fu letidu sitaafu en bika aw dede.’ 5 Ma Pawlesi sekeseke a sineki towe aini a faya. Winsi fa a sineki nyan mi en tokuso nawan sani á be du en. 6 Den sama be denki taki Pawlesi ana be o bigin soopu efuso taki a be o kai dede wanten. Di den luku te di den si taki nawan sani á du en, neen den bigin taki Pawlesi a wan gadu.

7 A gaanman fu a tabiki den e kai Publiyus be abi wan pisi doti ape. A bali wadaa gi u, neen a solugu u dii dei langa. 8 A dda fu Publiyus be didon a bedi, bika a be abi feba anga lusubee. Pawlesi go luku en, a poti en ana neen tapu neen a deesi en. 9 Bakadati ala den taa sama fu a tabiki di be siki bigin kon a Pawlesi neen a deesi den. 10 A sani di Pawlesi du be bigi gi den, neen meke den gi u tyaipi kado. Di u de fu gwe, den lai ala saw be abi fanowdu a boto gi u.

11 U tan dii mun na a tabiki. Bakadati u go aini wan sipi fu Aleksandriya di be de ape e wakiti fu a koo-ten fu a yali pasa. Wan pobiki fu den tu manpikin fu Seus be de na a ede fu a sipi ya. 12 Di u doo Sirakusa, u tan dii dei ape. 13 Di u komoto ape u gwa Regiyum. A taa dei fi en wan winta wai komoto na a zuidse. Tu dei baka di u komoto a Regiyum, u doo a Puteyoli. 14 Di u doo ape u miti wantu baala, neen den begi u fu tan seibin dei anga den. Bakadati u komoto ape fu gwa Rome. 15 Di den baala anga sisa fu Rome yee taki u de a pasi e kon, den kon miti u te na a wowoyo fu Apiyus anga a peesi di den e kai Dii Osu, pe sama be e yuu kambaa. Di Pawlesi si den, a gi Gadu daa bika a fende taanga-sikin. 16 Di u pinapina doo Rome, den gi Pawlesi a okasi fu a tan a pe a be wani. Na a suudati di be e holi wakiti gi en wawan be de ape anga en.

17 Baka dii dei, Pawlesi kai den fesiman fu den Dyu kon makandaa. Di den kon, a taigi den taki: ‘Baala, mia du nawan sani anga a foluku. Mia pasa den weiti fu den gaansama fu u tu. Toku sama tyai mi komoto a Yelusalem enke sitaafuman kon gi den Romesama. 18 Baka di den ondoosuku a toli, den be wani losi mi, bika den be si taki mia du nawan ogii fu mi mu dede. 19 Ma den Dyu ligei, neen meke mi be abi fu akisi fu Gaankownu kuutu mi. Ma ná wani mi be wani tyai den sama fu mi gwa lanti fesi. 20 A fu a sani ya ede mi kai u kon ya fu mi sa taki anga u. A di mi abi a howpu di Islayeli abi, meke den bui mi anga den keti di we si ya.’ 21 Di a kaba taki, den taigi en taki: ‘Nawan sama fu Yudeya á sende biifi gi u fu gi wan kaagi fii. Nawan fu den baala fu u di komoto anda taigi u wan sani efuso kon gi u wan kaagi fii tu. 22 Ma u si enke a moo bun fu yee san iseefi abi fu taki, bika u sabi taki na ala se sama e taki ogii fu den bakaman fu Yesesi.’

23 Den meke mofu anga en fu kon neen wan taa dei. Di a dei doo, den be kon anga moo sama a pe Pawlesi be e tan. Mamanten fu te neti tapu pii a be e peleiki finifini fu a Kownukondee fu Gadu. A wooko anga a Weiti fu Mosesi anga den sani di den Polofeiti be sikiifi fu leli den fu Yesesi. 24 Sowan be e biibi den sani di a be e taki, ma taawan á be wani biibi en. 25 Di den sama si taki den á be e go na a wanse, den bigin gwe. Neen meke Pawlesi taigi den taki:

‘A santa yeye be meke polofeiti Yesaya taigi den afo fu u taki: 26 “Go na a foluku ya dai taigi den taki: ‘Wo yee, ma u naw fusutan san we yee. Wo luku, ma u naw si nawan sani. 27 Bika den sama ya ati taanga enke siton. Den tapu den ain anga den yesi fu den á yee efuso si sani. Neen meke den nai fusutan san den mu du fu daai den libi fu mi deesi den.’” 28 Neen meke u mu sabi taki den taa foluku yee a bosikopu fu Gadu di e soi fa ai fii sama. Den o poti pakisei na a bosikopu ya.’ 29 *——

30 A tu yali langa Pawlesi tan aini a osu di a be yuu. A be e bali wadaa gi ala sama di be e kon neen. 31 Aa be e feele fu taki fu a Kownukondee fu Gadu anga den. Nawan sani be e tapu en fu leli den sani fu Masaa Yesesi Kelestesi.