Den sani di Mateyesi sikiifi

17 Baka sigisi dei, Yesesi teke Peitilisi, Yakowbesi anga en baala Yohanisi tyai gwa wan hei mongo, 2 neen a kengi leti a den fesi. En fesi be e beenki enke a san, en koosi seefi be e beenki enke faya. 3 Neen den si Mosesi anga Eliya e taki anga Yesesi. 4 Neen Peitilisi taigi Yesesi taki: ‘Masaa, a bun taki u de ya. Efii wani mi sa meke dii masanga* ya, wan fii, wan fu Mosesi anga wan fu Eliya.’ 5 A be e taki ete di wan woluku tapu den, a woluku ya be e beenki. Neen den yee wan siten e taki aini a woluku taki: ‘A mi Manpikin de ya, mi lobi en, ai meke mi piisii, u mu aliki en.’ 6 Di den bakaman fu Yesesi yee a sani ya, den feele te neen den kai tapu fesi a doti. 7 Ma Yesesi go koosube a den, a holi den, neen a taigi den taki: ‘Wi opo, aa de fu u feele.’ 8 Di den opo, a Yesesi wawan den si. 9 Di den be e saka komoto na a mongo, Yesesi taigi den taki: ‘Solanga a Manpikin fu libisama á kon a libi baka, wa mu taigi nawan sama saw si ye.’

10 Ma den bakaman fi en akisi en taki: ‘Saide den leliman fu a Weiti e taki Eliya mu kon fosi a Kelestesi?’ 11 A piki den taki: ‘Eliya o kon tuu fu seeka ala sani. 12 Ma mi e taigi u taki Eliya kon kaba, ma den á fusutan taki neen, neen meke den du san den wani anga en. A so den o du ogii anga a Manpikin fu libisama tu.’ 13 Neen den bakaman fi en fusutan wanten taki a Yohanisi a Dopuman a be e taki.

14 Di den doo a kulu sama di be de ape, wan man waka kon a Yesesi. A sutu kini a doti, neen a taki: 15 ‘Masaa, soi tyali-ati gi a boi fu mi baa, a abi pikinnengee siki. Ná pikin fooseli a siki ya e fooseli en. A omen leisi a siki ya e naki en towe aini wataa efuso faya. 16 Mi tyai en gwa den bakaman fii, ma den á poi deesi en.’ 17 Neen Yesesi taki: ‘Oohoo, den sondu sama fu a ten ya, saide u nai biibi sai? On langa mi mu de anga u ya ete? On langa mi mu pasensi anga u? U tyai en kon gi mi.’ 18 Yesesi bali a takuu yeye, neen a takuu yeye komoto na a boi tapu. A so a boi betee wanten. 19 Di den bakaman fu Yesesi anga en wawan be de, den akisi en taki: ‘Saide wa be poi puu a takuu yeye na a boi tapu?’ 20 Neen a taigi den taki: ‘A di u nai biibi sai. Biibi mi, efu a biibi fu u be bigi enke wan mosterd sii namo, u be o man taigi a mongo ya taki: “Opo komoto ya go ape.” Da a mongo be o du saw taki. Sani naw de di u naw poi du.’ 21 *——

22 Di den be de a Galileya, Yesesi taigi den taki: ‘Den o konkuu a Manpikin fu libisama gi den feyanti fi en. 23 Den o kii en, ma Gadu o weki en baka na a du fu dii dei.’ Ná pikin tyali kisi den bakaman fi en di a taki a sani ya.

24 Di den doo Kaperna-um, den man di be e piki lantimoni na a tempel kon a Peitilisi, neen den akisi en taki: ‘A leliman fii nai pai lantimoni* noh?’ 25 A piki den taki: ‘Eeye.’ Ma faisi a go aini a osu Yesesi akisi en taki: ‘Simon, fa ye si a toli? Sama e pai den kownu fu goontapu lantimoni? A den manpikin fu den, efuso taa sama?’ 26 A piki en taki: ‘A den taa sama.’ Neen Yesesi taigi en taki: ‘Da den manpikin fu kownu naafu pai lantimoni. 27 Ma wa wani den ati boon, neen meke go na a ze go uku. Teke a fosi fisi di yo kisi. Di yo opo en mofu, yo fende wan solufu moni. Teke en dai pai a lantimoni gi mi anga i.’