Den sani di Yohanisi sikiifi
15 Mi na a doloifibon di e meke bun nyanyan. A sama di e wooko a goon, a Nda. 2 Nda e koti ala den taka fu mi di nai meke nyanyan puu, da ai kiin ala den taka di e meke nyanyan fu den sa meke moo nyanyan. 3 U de kiinkiin kaba, bika wi aliki den sani di mi taigi u. 4 U mu de wan anga mi ala yuu, da miseefi o de wan anga u. Leti enke fa wan taka á poi meke nyanyan efu aa de na a bon, a so useefi naw poi meke nyanyan efu wa de wan anga mi ala yuu. 5 A mi na a doloifibon, wi a den taka fu a bon. Efu wan sama de wan anga mi, mio de wan anga en tu, da a sama ya o meke tyaipi nyanyan. Bika wa poi du nawan sani sondee mi. 6 A sama di á de wan anga mi, de enke taka di den koti towe, da ai dee. Sama e piki den dee taka ya iti aini faya da den e boon toon asisi. 7 Efu u de wan anga mi, neen we du san mi taki, u sa akisi iniiwan sani di u wani, da wo fende en. 8 Te we meke tyaipi nyanyan fu di wi a mi bakaman, sama o gafa Nda. 9 Leti enke fa a Dda lobi mi, a so miseefi lobi u. U mu du sani fu mi sa lobi wi ala yuu. 10 Efu we du san mi taki, mio tan lobi u, leti enke fa a Dda lobi mi fu di mi e du san a taki.
11 Mi taigi u den sani ya, bika mi wani u piisii tuutuu enke fa mi e piisii. 12 A disi na a weiti di mi e gi u: U mu lobi useefi enke fa mi lobi u. 13 A moo gaan lobi di wan sama sa soi, a fu dede gi den mati fi en. 14 Efu we du san mi taki, da wi a mi mati. 15 Mi nai kai u saafu moo, bika wan saafu nai sabi san en masaa e du. Ma mi e kai u mi mati, bika mi taigi u ala den sani di Nda taigi mi. 16 A ná useefi kon a mi, a mi kai u. Mi gi wi a wooko fu we meke nyanyan naamo. A nyanyan di wo meke mu tan fu teego. Da Nda o gi u iniiwan sani di wo akisi en aini mi nen.
17 Mi e taigi u den sani ya, fu u sa lobi useefi. 18 Efu den sama fu a goontapu e buuse u, daw mu sabi taki den be buuse mi fosi den bigin buuse u. 19 Efu u be de enke den sama fu a goontapu ya, da den be o lobi u. Ma wa de enke den sama fu a goontapu ya, bika mi teke u puu a den mindii, neen meke den e buuse u. 20 Holi a sani di mi be taigi wi a pakisei: Wan saafu á bigi moo en masaa. Efu den be libi ogii anga mi, da den o libi ogii anga u tu. Efu den be du san mi taki, da den o du san u taki tu. 21 A di wi a mi bakaman meke den o du ala den sani ya anga u, bika den á sabi a sama di sende mi. 22 Efu mia be kon taki anga den, den á be o abi sondu, ma now den á poi taki den naabi sondu. 23 A sama di e buuse mi, e buuse Nda tu. 24 Efu mia be du den wonduu ya a den fesi, di taa sama á be du ete, den á be o abi sondu. Ma den si den sani di mi du*, toku den e buuse mi anga Nda. 25 Ma den sani ya pasa fu meke den sani di sikiifi aini Gadu Buku kon tuu. A be sikiifi taki: “Den buuse mi sondee fu mi du wan sani.” 26 Mio sende wan yeepiman kon gi u di mio de na a Dda. Dati na a santa yeye di e tyai a tuu kon a kiin. Na a Dda e gi sama a yeye ya. Di a yeye ya o kon, aw yeepi u fu sabi mi tuutuu. 27 Useefi mu yeepi taawan fu sabi mi, bika u be de anga mi fanafu a bigin.