Den sani di Mateyesi sikiifi

12 Wan leisi Yesesi be e waka pasa wantu alisigoon a wan Sabadei. Angii be e kii den bakaman fi en, neen meke den bigin piki alisi nyan. 2 Di den Faliseiman si a sani ya den taigi en taki: ‘Den bakaman fii nai holi a weiti fu a Sabadei.’ 3 Ma a piki den taki: ‘Wa leisi san David du di angii be e kii en anga den man fi en noh? 4 A go aini a osu fu Gadu, neen a teke den beele di den be poti enke ofaandi gi Gadu, neen en anga den man fi en nyan. Ma a Weiti be e soi taki a den pilisite wawan be abi a leti fu nyan den beele ya. 5 Wa leisi aini a Weiti taki den pilisite be e wooko aini a tempel a Sabadei noh? Toku sama á be e si enke den nai holi a weiti fu a Sabadei. 6 Ma mi e taigi u taki wan sama de ya di pelensipali moo a tempel. 7 Efu u be fusutan san den wowtu “mia wani ofaandi, a tyali-ati mi wani u soi” wani taki, wa be o kuutu sama di á du nawan ogii. 8 A Manpikin fu libisama na a Masaa fu a Sabadei.’

9 Baka di a komoto ape a go na a snoga. 10 Wan man be de ape di be malengii neen ana. Fu di den Faliseiman be e suku fowtu neen, meke den akisi en taki: ‘A Weiti e gi pasi fu deesi sama a Sabadei?’ 11 A taigi den taki: ‘Efi yu abi wan kodo sikapu, neen a kai go aini wan dipi olo a Sabadei, ya be o meke moiti fu puu en winsi fa a wan Sabadei noh? 12 Wan libisama á pelensipali moo wan sikapu noh? Neen meke aa fowtu fu du wan bun sani a Sabadei.’ 13 Neen Yesesi taigi a man taki: ‘Langa yu ana.’ Di a man tiiki en ana, aa be malengii moo. 14 Bakadati den Faliseiman gwa doose fu taki fiti fa den sa kii Yesesi. 15 Di Yesesi fusutan san den be wani du, a komoto ape. Di ai gwe omen sama waka neen baka. A deesi ala den sama di be siki. 16 Ma a be bali den taki den á be mu meke sama sabi sama neen. 17 A so a sani di polofeiti Yesaya be taki kon tuu. A be taki:

18 ‘Na a sama ya mi teke fu du a wooko fu mi. Mi lobi en, ai meke mi piisii. Mio gi en mi yeye, da aw soi ala sama a goontapu fa den mu du sani enke fa mi wani. 19 A naw go e bali efuso suku toobi, nawan sama o yee en siten a den gaan pasi tu. 20 A naw masi wan kamaluwa di booko, a naw kii wan faya di e dede. A so aw du sani te enke a meke ala sani e go bun. 21 Eeye, na ala se fu goontapu sama o poti biibi neen*.’

22 Bakadati sama tyai wan man di be abi takuu yeye neen tapu kon a Yesesi. A takuu yeye be meke a man ya beendi, aa be e taki tu. Yesesi deesi a man ya neen a bigin si baka. A be bigin taki baka tu. 23 Ala den sama di be de ape foondoo, neen den taki: ‘A man ya a ná a manpikin* fu David noh?’ 24 Di den Faliseiman yee a sani ya den taki: ‘A man ya e puu takuu yeye a sama tapu fu di Beyelsebub, a tiiman fu den takuu yeye e holibaka gi en.’ 25 Fu di Yesesi be sabi san den be e denki meke a taigi den taki: ‘Efu den sama aini wan kownukondee e feti anga denseefi, a kownukondee de o booko. Iniiwan foto efuso osu pe sama e feti anga denseefi o booko. 26 Efu Saatan e puu takuu yeye a sama tapu, da anga enseefi ai feti. A sani ya be o meke a kownukondee fi en booko. 27 U taki mi e puu takuu yeye a sama tapu bika mi e wooko anga Saatan. Da anga sama den bakaman fu we wooko, bika denseefi e puu takuu yeye a sama tapu. A fu den sani ya ede meke den bakaman fu wo kuutu u. 28 Ma efu anga a kaakiti* fu Gadu mi e puu takuu yeye a sama tapu, da a Kownukondee fu Gadu* doo sondee fu u fusutan. 29 Nawan sama poi booko go aini a osu fu wan taanga man, da a teke den sani fi en sondee fu a tei en. A te a tei a taanga man fosi, da a sa fufuu ala den sani aini a osu. 30 Iniiwan sama di nai wooko makandaa anga mi, a mi feyanti. Iniiwan sama di nai tyai sama kon a wan makandaa anga mi, e yaki sama fu den á kon a mi.

31 Neen meke mi e taigi u taki sama sa fende paadon fu iniiwan sondu di den du. Den sa fende paadon tu fu den ogii-ati sani di den e taki. Ma efu wan sama taki ogii fu a yeye fu Gadu a naw fende paadon. 32 Efu wan sama e taki ogii fu a Manpikin fu libisama aw fende paadon. Ma efu wan sama e taki ogii fu a santa yeye, a naw fende paadon fu a sani ya. Nono, ná aini a ten ya, ná aini a ten di e kon tu.

33 Efi ye solugu wan bon, aw meke bun nyanyan. Ma efii nai solugu a bon, a naw meke bun nyanyan. Bika a den nyanyan di wan bon e meke e soi sowtu bon neen. 34 U sinekipikin, wi abi ogii-ati, neen meke bunbun taki á poi komoto aw mofu. Bika a san de aini wan sama ati, a dati ai taki. 35 Wan bun-ati sama e taki bun sani, bika a soso bun de aini en ati. Ma wan ogii-ati sama e taki soso ogii, bika ogii fuu aini en ati. 36 Ma mi e taigi u taki efu wan sama e taki soso taki, da Gadu o akisi en faantiwowtu na a dei di aw kuutu sama. 37 Efi ye taki sani di bun, Gadu o si yu enke wan sama di e libi a wan letifasi. Ma Gadu o kuutu i, efi ye taki sani di á bun.’

38 Neen den leliman fu a Weiti anga den Faliseiman taigi en taki: ‘Leliman, du wan wonduu meke u si taki a Gadu sende i kon tuu.’ 39 Yesesi piki den taki: ‘Den ogii-ati sama fu a ten ya di daai baka gi Gadu wani si wonduu fosi den o biibi. Ma den naw si nawan taa wonduu moo enke a sani di be pasa anga polofeiti Yona. 40 Leti enke fa Yona be tan dii dei anga dii neti aini a fisi bee, a so a Manpikin fu libisama o tan dii dei anga dii neti aini geebi. 41 Den sama fu Ninifei o kon a libi baka makandaa anga den sama fu a ten ya na a dei di Gadu o kuutu sama. Bika den daai den libi di den yee a bosikopu fu Yona. Ma wan sama di pelensipali moo Yona de ya. 42 A umankownu fu Skeiba o kon a libi baka makandaa anga den sama fu a ten ya na a dei di Gadu o kuutu sama. Aw soi taki den sama fu a ten ya nai tyai denseefi bun. Bika a be komoto te a faawe fu kon yee den koni fu Salomo. Ma wan sama di pelensipali moo Salomo de ya.

43 Te wan takuu yeye komoto a wan sama tapu, ai go waka lontu suku taa peesi aini den sabana fu a tan, ma te aa fende, 44 da ai taki: “Mio gwa mi osu baka a pe mi be komoto.” Te a daai go baka ai si taki a osu de leigileigi. Den sibi en neen den seeka en te a de taa. 45 Da ai daai gwe go kai ete seibin taa yeye di ogii moo enseefi. Ala den e go tan aini a sama, da a libi fi en e kon ogii moo enke fa a be de fosi. Na aseefi sani ya o miti den ogii sama fu a ten ya.’

46 Di Yesesi be e taki anga den sama, en mma anga den baala fi en kon ape. Den be taampu a doose e suku wan fasi fu taki anga en. 47 Neen meke wan sama kon taigi en taki: ‘I mma anga den baala fii taampu a doose, den wani taki anga i.’ 48 Yesesi akisi en taki: ‘I sabi sama a mi mma anga den baala fu mi?’ 49 Yesesi soi ana gwa den bakaman fi en, neen a taki: ‘A den sama ya a mma anga mi baala! 50 Bika a den sama di e libi enke fa Nda di de a hemel wani, a mi baala, mi sisa anga mma.’