A fosi biifi gi Timotiyesi

2 Na a fosi peesi, mi wani taigi i fu begi fayafaya gi ala sama. Begi Gadu fu a meke sani waka bun gi den. Gi Gadu daa tu. 2 U mu begi tu gi den kownu anga ala den bigiman fu kondee, fu u sa libi aini freide sondee fu sama e fooseli u. Da a so wo man dini Gadu fayafaya anga u hii ati. 3 Na a sani ya bun gi a Gadu di fii wi, a sani ya e meke a piisii. 4 A wani ala sowtu sama fende libi*, a wani den sabi den tuu leli finifini tu. 5 Bika a wan kodo Gadu de, a wan mindiiman namo de a Gadu anga libisama mindii. Dati a Kelestesi Yesesi. 6 A gi enseefi enke wan paiman di fiti fu fii ala sama. A fu a sani ya sama o taki te a yuu doo. 7 A fu a sani ya meke Gadu poti mi enke wan peleikiman anga wan apostel. Na a tuu mi e taki, mi nai lei. Mi e leli den taa kondee sama san na a tuu anga san a wani taki fu abi biibi.

8 Mi wani taigi u taki te u kon makandaa, a den mannengee mu e begi. Te den opo den ana gwa tapu fu begi, den mu du a sani ya anga wan kiin ati. Den ati á mu e boon, den á mu e kwali tu. 9 Umansama mu e wei koosi a wan lesipeki fasi anga wan fasi di e soi taki den de anga kiinkiin fusutan. Den á mu e moin denseefi anga gaan kofaliki uwii, gowtu sani, dii kaala efuso dii koosi. 10 Ma den mu moin denseefi anga den bun sani di den e du, enke fa a fiti umansama di e dini Gadu.

11 Te umansama e teke leli* den mu saka denseefi da den de pii e aliki. 12 Mi nai gi den umansama pasi fu gi leli efuso fu de fesiman fu den mannengee. Ma den mu tan pii. 13 Bika na Adan fosi Gadu meke neen a meke Efa. 14 Boiti dati, a ná Adan Didibii be koli, ma na a uman a koli fu taangayesi Gadu. 15 Te wan uman meke pikin, da a sani ya o kibii en. Ma a soso te ai biibi, te a lobi sama, te a santa anga te a de anga kiin fusutan ala yuu.