Den sani di Yohanisi sikiifi

5 Bakadati Yesesi gwa Yelusalem, bika den Dyu be abi wan fesa. 2 Wan peesi be de aini Yelusalem den e kai Sikapu doo*. Wan peti wataa be de ape. Wan sowtu gaan baikon be lontu a peti ya. Aini Hebrewtongo den be e kai en Betsata. 3 A omen sama di be siki, di be beendi, di be lan anga di be malengii be e didon ape. 4 *—— 5 Wan man be de ape tu di be siki 38 yali kaba. 6 Yesesi be sabi taki a omen ten kaba a man e siki, neen meke di a si a man de didondidon a doti, a akisi en taki: ‘I wani kon bun?’ 7 Neen a man piki en taki: ‘Mi naabi nawan sama fu diki mi tyai go aini a wataa te ai seke. Ala yuu te mi sete fu go, da wan taa sama e gwa mi fesi.’ 8 Neen Yesesi taigi en taki: ‘Opo taampu! Teke i bedi dai waka.’ 9 Faisi Yesesi taki a sani ya, a man kon bun wanten. A teke en bedi neen a bigin waka.

A dei ya a be wan Sabadei. 10 Neen meke son wan fu den Dyu taigi a man di betee taki: ‘Tide a Sabadei, ya mu tyai i bedi na a dei ya.’ 11 Ma a taigi den taki: ‘Na a man di deesi mi, taigi mi taki: “Teke i bedi dai waka.”’ 12 Neen den akisi en taki: ‘Sama na a man di taigi i taki “teke i bedi dai waka?”’ 13 Ma a man á be sabi sama deesi en, bika Yesesi be waka komoto ape gwa den somen sama ini.

14 Bakadati Yesesi go miti a man aini a tempel, neen a taigi en taki: ‘I si fai kon bun ya, ya mu du ogii moo ye, efuso a wan moo gaan sani o miti i.’ 15 A man gwe, neen a go taigi den Dyu taki a Yesesi na a man di be deesi en. 16 Neen den Dyu bigin taki omen ogii fu Yesesi fu di a be e du den sani ya na a Sabadei. 17 Ma a taigi den taki: ‘Senten Nda de neen ai wooko, neen meke miseefi e wooko ala yuu.’ 18 A sani ya meke den Dyu be de namonamo fu kii Yesesi, bika den be fende taki a ná den weiti fu a Sabadei namo a be e pasa, ma a be e kai enseefi a pikin fu Gadu tu. Da a leti enke a be e taki en anga Gadu na a wan.

19 Neen Yesesi taigi den taki: ‘Biibi mi, a Manpikin á poi du nawan sani boiti san a si a Dda e du. Bika ala san a Dda e du, a dati a Manpikin e du tu. 20 A Dda lobi a Manpikin, neen meke ai soi en ala den sani di ai du. Aw soi en moo gaan sani moo den wan ya seefi. Den sani ya o meke u foondoo. 21 Leti enke fa a Dda e meke dedesama kon a libi baka, a so a Manpikin sa meke iniiwan sama di a wani kon a libi tu. 22 Bika a Dda nai kuutu nawan sama, ma a fika a pisi de gi a Manpikin. 23 Da ala sama o lesipeki a Manpikin enke fa den e lesipeki a Dda. A sama di nai lesipeki a Manpikin, nai lesipeki a Dda di sende en. 24 Biibi mi, a sama di yee san mi taki, da a poti biibi aini a sama di sende mi, o fende teego libi. Mi naw kuutu a sama de, bika a de enke wan man di be dede ma a kon a libi baka.

25 Biibi mi, a yuu o doo, a doo kaba, di den dedesama o yee a siten fu a Manpikin fu Gadu, da den sama di poti pakisei a san den yee, o fende a libi. 26 Leti enke fa a Dda abi a makiti fu gi libi, a so a Manpikin abi a makiti fu gi libi tu. 27 A Dda gi en a makiti fu kuutu sama bika neen na a Manpikin fu libisama. 28 Wa mu foondoo fu den sani di mi taki ya, bika a yuu o doo di ala den sama di de aini geebi* o yee a siten fu a manpikin fu Gadu, 29 da den o komoto ape. Den sama di du bun sani o weki baka fu fende a libi, ma den sama di du ogii, o weki baka fu fende kuutu. 30 A ná san miseefi wani mi e du. Te mi e kuutu sama, mi e wooko anga san Nda taigi mi. Neen meke mi e kuutu sani a wan letifasi, bika a ná san miseefi wani mi e du, ma mi e du sani enke fa a Dda di sende mi wani.

31 Efu a miseefi e taigi taawan sama a mi, den naw biibi mi. 32 Ma wan taa sama de di e taigi taawan sama a mi. Mi sabi taki den sani di ai taki fu mi a tuu. 33 U be sende sama gwa Yohanisi, neen a taigi den sama a mi. 34 Mi naabi libisama fanowdu fu taigi taawan sama a mi, ma mi e taki den sani ya fu u sa fende a libi. 35 Yohanisi be de enke wan letileti abeni di e kiin peesi. U be e piisii taki a be e kiin peesi gi u fu wan pisiten. 36 Yohanisi be e taigi sama taki na a Dda sende mi. Ma mi dati a den sani di mi e du e soi taki neen sende mi tuu, bika mi e du den sani di a sende mi fu kon du. 37 A Dda di sende mi seefi taigi sama taki mi neen Manpikin. Noiti wan dei u yee en siten efuso si fa a meke. 38 A wowtu fi en á de aini wi ati, bika u nai biibi a sama di a sende.

39 We ondoosuku Gadu buku bika u denki taki na a sani ya o gi u teego libi. Ma Gadu buku seefi e taki fu mi. 40 Toku wa wani kon a mi fu u fende a teego libi. 41 Mia wani libisama gi mi gaandi, 42 ma mi sabi taki faw de ya, wa lobi Gadu. 43 A Nda sende mi, toku u nai biibi mi. Ma efu wan taa sama be kon aini en eigi nen, u be o biibi a sama de. 44 U naw poi biibi mi, bika a libisama we suku fu gafa u, ma u nai meke moiti fu Gadu gafa u. 45 Wa mu denki taki mio go kuutu u gi a Dda. Ma a den sani di Mosesi sikiifi seefi o kuutu u, di na u taki neen we fitoow. 46 Efu u be e biibi Mosesi daw be o biibi mi, bika enseefi be sikiifi den sani di mi be o du. 47 Ma efu u nai biibi den sani di a sikiifi, da fa wo biibi den sani di mi e taki?’