Du fu tu biifi gi den Tesalonikasama

1 Mi Pawlesi, Silfanus anga Timotiyesi e sende a biifi ya gi a kemeente a Tesalonika, di de wan anga u Dda di de a hemel anga u Masaa Yesesi Kelestesi.

2 Meke a bun-ati anga a freide fu u Dda di de a hemel anga Masaa Yesesi Kelestesi de anga u.

3 Den baala fu mi, wi abi fu gi Gadu daa ala yuu fu wi ede. A fiti fu u du a sani ya, bika u biibi e kon moo taanga. Dei fu dei we moo lobi useefi tu. 4 We gafa wi aini den kemeente fu Gadu, bika we holidoo, we soi taki u biibi taanga winsi fa sama e tesi u efuso e pina u. 5 A sani ya e soi taki Gadu e kuutu sani a wan letifasi. Ai soi tu taki u fiti fu go aini a Kownukondee fu Gadu. A fu a Kownukondee ya ede we nyan pina.

6 Fu di Gadu e du sani a wan letifasi, meke aw sitaafu den sama di e pina u. 7 Ma wi di e nyan pina, naw pina moo te Masaa Yesesi o soi enseefi. Aw komoto a hemel anga den taanga engel fi en 8 aini wan gaan faya. Aw sitaafu den sama di á sabi Gadu anga den sama di nai aliki a bun nyunsu di e taki fu u Masaa Yesesi. 9 A sitaafu di den sama ya o fende, na a puu di Masaa o puu den a pasi fu teego. Den naw de neen fesi moo, den naw si a kaakiti fi en moo. 10 Te Masaa o kon anga a gendee fi en makandaa anga ala den santawan fi en, da ala den sama di e biibi en o foondoo. Fu di we biibi den sani di u taigi u meke wo de makandaa anga den.

11 Neen meke we begi gi wi ala yuu, we akisi Gadu fu si wi enke sama di fiti a kai di a gi u. We begi en tu fu a sa koboloiki a kaakiti fi en fu du ala den bun sani di a wani du. A mu meke ala den sani di we du fu soi taki we biibi waka bun. 12 Da a so den sani di we du o meke a nen fu u Masaa Yesesi fende gaandi. Useefi o fende gaandi fi en ede.