Den sani di Mateyesi sikiifi

25 A Kownukondee fu hemel de enke tin yonkuu-uman* di teke den abeni fu go miti wan man di be o toow. 2 Feifi fu den be don, feifi be koni. 3 Den donwan be tyai den abeni, ma den á be tyai taa oli boiti di be de aini a abeni fu den. 4 Ma den koniwan be tyai oli aini wan bataa, boiti a oli di be de aini den abeni. 5 A man di be o toow á be doo ete, neen meke ala den bigin dyonko te neen den siibi gwe. 6 Mindiineti den yee wan sama bali taki: “A toowman e kon! U go miti en.” 7 Neen den tin yonkuu-uman opo seeka den abeni fu den. 8 Den donwan taigi den koniwan taki: “U gi u pikinso oli baa, bika a faya fu den abeni fu we dede.” 9 Ma den koniwan piki den taki: “Efu u gi u, di o fika naw sai u. U gwa den sama di e seli sani, daw bai wi oli.” 10 Di den donwan gwe fu go bai a oli, neen a toowman doo. Den uman di be de seekaseeka go anga en na a toowfesa, neen a doo tapu. 11 Bakadati den taa feifi uman kon, neen den taki: “Masaa, Masaa, opo a doo gi u baa.” 12 Ma a piki den taki: “Mia sabi u.”

13 Neen meke u mu de na ain, bika wa sabi a dei anga a yuu.

14 A Kownukondee fu hemel de enke wan man di be de fu gwa taa kondee. A kai den saafu fi en, neen a fika den gudu fi en gi den fu luku. 15 A gi wan fu den saafu feifi saka anga moni, du fu tu a gi tu saka, du fu dii a gi wan saka, bika a be sabi san ibiiwan fu den be poi du. Bakadati, a gwa taa kondee. 16 Faisi a gwe, a so a saafu di a be gi den feifi saka bigin wooko anga den, neen a fende ete feifi saka. 17 A saafu di a be gi den tu saka seefi wooko anga den, neen a fende ete tu. 18 Ma a saafu di be fende wan saka, go diki wan olo neen a beli a moni fi en masaa.

19 Baka wan pisiten, a masaa fu den saafu daai kon baka fu luku san den du anga a moni di a gi den. 20 A saafu di a be gi den feifi saka moni kon, neen a taigi en taki: “Masaa, i be gi mi feifi saka moni. Mi wooko anga den neen mi fende ete feifi saka.” 21 En masaa taigi en taki: “Moin so! Ya wan bun saafu di mi sa fitoow! I wooko bun anga den sani di mi gii. Mio gii moo sani fu luku. Kon poolo anga i masaa.” 22 A saafu di a be gi den tu saka moni kon, neen a taigi en taki: “Masaa, i be gi mi tu saka moni. Mi wooko anga den neen mi fende ete tu saka.” 23 En masaa taigi en taki: “Moin so! Ya wan bun saafu di mi sa fitoow! I wooko bun anga den sani di mi gii. Mio gii moo sani fu luku. Kon poolo anga i masaa.”

24 Bakadati a saafu di a be gi wan saka moni kon, neen a taigi en taki: “Masaa mi sabi taki ya wan kaakeli man. Ye koti nyanyan a taa sama goon, ye teke alisi di taa sama paandi. 25 Da di mi sabi so fii kaba, mi feele, neen mi beli a moni fii a ondoo doti. Luku i moni ya.” 26 Neen a masaa piki en taki: “I lesi takuu-ati saafu yu, a so i be sabi taki mi e koti nyanyan a pe mia paandi, efuso taki mi e teke alisi di taa sama wooko, 27 neen ya poti a moni fu mi a banku? Da te mi be kon baka, mi be o fende wan sani a tapu.

28 U teke a saka moni puu neen ana, daw gi a saafu di abi den tin saka en. 29 A sama di abi, o fende moo, aw fende tyaipi. Ma a sama di naabi, a pikinso di a abi seefi den o puu neen ana. 30 U towe a wisiwasi saafu ya gwa doose aini a dunguu. Aw kee, da a kaw tifi te a de ape.”

31 Te a Manpikin fu libisama o kon anga en kaakiti, anga ala den engel fi en, da aw sidon na a gendee kownusutuu fi en. 32 Ala den foluku fu goontapu o kon neen fesi, da aw paati den aini tu kulu, leti enke fa wan sikapuman e puu den sikapu a den kaabita mindii. 33 Aw poti den sikapu neen leti-ana, ma den kaabita aw poti neen kukutu-ana.

34 Da a Kownu o taigi den sama di de neen leti-ana taki: “Den sama di Nda belesi, u kon, daw go aini a Kownukondee di a seeka gi u senten di goontapu sete. 35 Bika di angii be e kii mi, u gi mi sani fu nyan. Di wataa be e kii mi, u gi mi sani fu diingi. Di mia be abi peesi fu tan, u teke mi poti a wi osu, winsi fa wa be sabi mi. 36 Di mia be abi sani fu wei*, u gi mi koosi. Di mi be siki, u solugu mi. Di mi be de a sitaafu-osu, u kon luku mi.” 37 Da den sama di e libi enke fa Gadu wani o akisi en taki: “Masaa, on ten u si taki angii kii i neen u gii sani fu nyan? On ten u si taki wataa kii i neen u gii sani fu diingi? 38 On ten u teke i poti a wi osu sondee fu u sabi i? On ten u si taki ya be abi sani fu wei, neen u gii koosi? 39 On ten u si taki i siki efuso taki i be de a sitaafu-osu neen u kon luku i?” 40 Da a Kownu o piki den taki: “Biibi mi, efu u du en gi wan fu den moo pooti baala fu mi, da a mi u du en gi tu.”

41 Ma aw taigi den sama di de neen kukutu-ana taki: “U komoto ya, bika Gadu fuuku u. Wo boon aini a teego faya di seeka gi Didibii anga den takuu yeye fi en. 42 Bika di angii be e kii mi, wa gi mi nawan sani fu nyan. Di wataa be e kii mi, wa gi mi sani fu diingi. 43 Di mi be de enke wan taa kondee sama di á be abi peesi fu tan, wa teke mi poti a wi osu. Di mia be abi sani fu wei, wa gi mi koosi. Di mi be siki, wa solugu mi. Di mi be de a sitaafu-osu, wa kon luku mi.” 44 Da denseefi o akisi en taki: “Masaa, on ten u si taki angii efuso wataa kii i? On ten u si taki i be de enke wan taa kondee sama? On ten u si taki ya be abi sani fu wei? On ten u si taki i siki efuso taki i be de a sitaafu-osu? On ten u si ala den sani ya neen wa yeepi i?” 45 Da aw piki den taki: “Biibi mi, efu wa du en gi wan fu den moo pooti baala fu mi, da wa du en gi mi tu.” 46 Den sama ya o dede fu teego, ma den sama di e libi enke fa Gadu wani o libi fu teego.’