Wan biifi gi den Romesama
2 Neen meke winsi sama a yu, i naabi leti fu kuutu wan taawan efu ye du denseefi sani di ai du. Bika a iseefi ye kuutu te ye kuutu en. 2 Ma u sabi taki te Gadu e kuutu den sama di e du den sani ya, ai kuutu den a wan letifasi.
3 Mi baala, efi ye kuutu den sama di e du denseefi sani di ye du, dai si enke yo poi kibii gi Gadu na a dei di aw kuutu sama? 4 A si we si a bun-ati fu Gadu anga a boo di a abi anga u fu wan soso sani? U nai si taki a di Gadu abi bun-ati meke a wani yeepi u fu daai u libi noh? 5 Ma ya wani teke taki, ya wani daai i libi, neen meke Gadu o sitaafu i na a atiboon dei fi en te aw kuutu sama a wan letifasi. 6 Aw pai ibiiwan sama gi san a du. 7 Den sama di e du bun sani ala yuu o fende teego libi, bika den e suku gafa, gaandi anga wan libi di e tan fu teego. 8 Na a taase Gadu o puu atiboon a den sama tapu di lobi suku toobi, anga den sama di á wani libi enke fa a tuu leli e soi. 9 Sani o miti iniiwan sama di e du sani di á bun, winsi en a wan Dyu efuso wan Giikisama. 10 Ala sama di e du san bun o fende gafa, gaandi anga freide. Den Dyu fosi fende den sani ya, bakadati den Giikisama fende den tu. 11 Bika Gadu nai paatibee.
12 Den sama di sondu fu di den á be sabi a Weiti, o dede sondee fu a Weiti kuutu den. Ma efu wan sama be sabi a Weiti neen a sondu, da na a Weiti o kuutu en. 13 A ná te wan sama sabi a Weiti da Gadu e si en enke wan leti-ati sama. Ma a den sama di e libi enke fa a Weiti e taki, ai si enke leti-ati sama. 14 Winsi fa den taa kondee sama á sabi den weiti fu Gadu, toku den e du san den weiti e taki. A sani ya e soi taki den weiti ya de aini den ati, winsi fa den á sabi den. 15 Den sama ya e soi taki den sani di a Weiti e leli sama sikiifi aini den ati. A fasi fa den kosensi e wooko e soi taki a Weiti sikiifi aini den ati. Den pakisei fu den e soi den te den fowtu anga te den á fowtu. 16 A so aw de tu na a dei di Gadu o meke Kelestesi Yesesi kuutu libisama fu den sani di den du kibiikibii. Disi a wan pisi fu a bun nyunsu di mi e paati.
17 Son wan fu we kai useefi Dyu, we wooko anga weiti, we gafa taki wi a Gadu foluku, 18 u sabi san Gadu wani, u sabi san a den moo pelensipali sani tu, bika sama leli wi a Weiti. 19 We biibi taki u poi tii den sama di beendi, we biibi taki u poi puu sama a dunguu tyai kon na a kiin. 20 We biibi taki aw mu poti den sama a pasi di nai koboloiki den fusutan bun, we biibi taki aw mu leli den yonkuu pikin, we biibi taki u sabi den moo pelensipali sani anga den tuu toli fu a Weiti. 21 We leli taawan, ma useefi nai du san we leli den. We taigi taawan taki: ‘Ya mu fufuu’, ma useefi e fufuu. 22 We taigi taawan taki: ‘Ya mu hulu’, ma we libi wan hululibi. Efu we buuse falisi gadu, da saide we fufuu sani aini den osu fu den falisi gadu? 23 We gafa taki u sabi a Weiti, ma we wisiwasi Gadu bika u nai du san a Weiti e taki. 24 Gadu buku taki, ‘na a fasi fa we tyai useefi meke den taa kondee sama e taki ogii fu a nen fu Gadu’.
25 Fu taki en kiin, a te ye du san a Weiti e taki da ye teli fu wan sama di besnei*. Ma winsi i besnei seefi neen i nai du san a Weiti taki, da ye teli fu wan sama di á besnei. 26 Efu wan sama di á besnei* e wooko anga den sani di sikiifi aini a Weiti, da Gadu o teli en fu wan sama di besnei, na so noh? 27 I sabi a Weiti, anga ala i besnei*, toku i nai du san a Weiti e taki. Neen meke efu wan sama di á besnei e libi enke fa a Weiti e taki, da ai kuutu yu anga a fasi fa ai libi. 28 A ná tei mma anga i dda a wan Dyu, da ye teli fu wan tuutuu Dyu. Winsi wan maiki de ai sikin di e soi taki i besnei*, dati wawan á sai. 29 Na a fasi fa wan sama de aini en ati e soi taki en a wan tuutuu Dyu. A ná a Weiti e besnei* wan sama ati, ma na a yeye fu Gadu. A ná libisama e gafa a sama ya, ma a Gadu seefi e gafa en.