Den sani di Malikisi sikiifi
5 Den doo na a taase fu a ze, na a pisi fu den Gerasa-sama. 2 Faisi Yesesi komoto aini a boto, a miti wan man di be abi wan takuu yeye neen tapu. A man ya be komoto a den geebi* mindii. 3 A den geebi mindii a be e tan. Nawan sama á be poi tei en fika a wan peesi, keti seefi á be poi holi en. 4 A omen leisi sama keti en ana anga en futu, ma a be e hali den keti koti. A be taanga te nawan sama á be poi holi en. 5 Neti anga dei a be e waka e lontu den geebi anga den mongo. A be e bali e ligei dai koti enseefi anga siton. 6 Ma di a si Yesesi e kon a faawe, a lon go sutu kini a doti neen fesi. 7 Neen a bali taanga taki: ‘Yesesi, Manpikin fu a Moo Gaan Gadu, saide i kon ya? Sweli* aini a nen fu Gadu taki i naw du ogii anga mi.’ 8 A takuu yeye be taki a sani ya fu di Yesesi be taigi en taki: ‘Komoto na a man tapu.’ 9 Ma Yesesi akisi a takuu yeye taki: ‘Fa den e kai i nen?’ A piki en taki: ‘A mi den e kai Tyaipi, bika a omen u de.’ 10 Den takuu yeye begi Yesesi omen leisi fu aa yaki den puu aini a kondee.
11 Wan gaan kulu agu be de na a mongo e nyan. 12 Neen den takuu yeye begi en taki: ‘Gaantangi sende u go aini den agu baa.’ 13 Di a piki den taki den sa go, den takuu yeye komoto na a man tapu neen den go aini den agu. Bakadati den agu lon na a mongo mofu go kai aini a ze. A wan sani fu 2000 agu dede aini a ze. 14 Den sama di be e luku den agu lon go taigi den sama aini a foto anga den sama di be e tan a doose fu a foto san den si, neen den sama booko kon luku san pasa. 15 Di den doo Yesesi, den si a man di den takuu yeye be de neen tapu. A be de sidonsidon, a be wei koosi, a be de anga kiinkiin fusutan tu. Den sama feele te di den si a sani ya. 16 Den sama di be si den sani ya, taigi taa sama san pasa anga den agu anga a man di be abi den takuu yeye neen tapu. 17 Neen meke den begi Yesesi fu a komoto na a pisi kondee fu den.
18 Di Yesesi e go aini a boto, a man di be abi den takuu yeye neen tapu begi en fu a sa go anga en a pe ai go. 19 Ma aa be wani. A taigi en taki: ‘Gwa den famii fii dai taigi den san Yehofa du gii anga fa a soi tyali-ati gii.’ 20 A man gwe neen a bigin taigi den sama aini den tin foto di den e kai Dekapolis*, san Yesesi du gi en. Ala den sama di yee a sani ya be e foondoo.
21 Baka di Yesesi teke boto go na abaase baka, wan gaan kulu sama be de na a lanpeesi e wakiti en. 22 Wan fu den fesiman fu a snoga di den e kai Yairus kon a Yesesi. Di a si en, a sutu kini a doti neen fesi. 23 A begi Yesesi omen leisi taki: ‘Mi umanpikin siki, a de fu dede. Gaantangi kon poti yu ana neen tapu baa fu a sa betee.’ 24 Neen Yesesi go anga en. Wan gaan kulu sama be e waka neen baka, den sama be e toto kon neen tapu.
25 Wan uman di be e lasi buulu 12 yali langa be de aini den sama ya. 26 A uman ya go suku yeepi a omen dataa. Ná pikin pina den dataa ya pina en. Winsi fa a pai ala a moni di a be abi, toku a siki fi en be e kon moo ogii. 27 Di a yee den sani di Yesesi be e du, a waka aini den somen sama kon a Yesesi baka, neen a holi a koosi fi en. 28 Bika a be e taki aini enseefi taki: ‘Winsi na a koosi fi en namo mi holi, mio betee.’ 29 Faisi a uman holi a koosi fu Yesesi, aa be e lasi buulu moo. A be fii aini en sikin taki a betee. Aa be abi a takuu siki ya moo.
30 Yesesi fii wanten taki kaakiti komoto aini en sikin, neen meke a daai luku den sama neen a akisi den taki: ‘Sama holi mi koosi?’ 31 Ma den bakaman fi en taigi en taki: ‘Luku den somen sama di e toto kon ai tapu bgullu ya, neen toku ye akisi sama holi i?’ 32 Ma Yesesi be e daai ede luku efu a be o si a sama di holi en. 33 A uman di be betee feele te neen ala en sikin e dansi. A waka kon a Yesesi, a sutu kini a doti, neen a taigi en ala san pasa. 34 Yesesi taigi en taki: ‘Mi umanpikin, na a biibi fii meke i kon betee. I naabi a takuu siki ya moo. Meke sani waka bun anga i.’
35 Aa kaba taki seefi neen wantu man di be e wooko gi Yairus kon taigi en taki: ‘Ná fuufeli a Leliman moo, bika a meisyo fii dede kaba.’ 36 Ma di Yesesi yee san den taki, a taigi Yairus taki: ‘Ná feele, a biibi namo i mu biibi.’ 37 Di Yesesi e go na a osu fu Yairus, aa tyai nawan taa sama neen baka boiti Peitilisi, Yakowbesi, anga en baala Yohanisi.
38 Di den doo na a osu fu Yairus, Yesesi si fa den sama buuya, den be e bali e kee. 39 Di a go aini a osu a taigi den sama taki: ‘Saide we bali e ligei so? A pikin á dede, a siibi ai siibi.’ 40 Di a taki a sani ya, den kii en anga lafu. Baka di a sende ala den gwa doose, en anga a mma anga a dda fu a pikin, anga den bakaman fi en gwa pe a pikin be didon. 41 A holi a pikin ana neen a taki: ‘Talita kumi.’ Dati wani taki: ‘Meisyo mi taki opo!’ 42 A meisyo di be abi 12 yali opo wanten neen a bigin waka. Ná pikin poolo a mma anga a dda poolo di den si a sani ya. 43 Ma Yesesi taigi* den omen leisi taki den á mu taigi sama san pasa. A taigi den tu taki den mu gi a pikin wan sani fu a nyan.