Wan biifi gi den Romesama
5 Nownow Gadu e si wi enke sama di e libi a wan letifasi fu di we biibi, neen meke u mu meke moiti fu wi anga Gadu de bun ala yuu fu Masaa Yesesi ede. 2 A di we biibi Yesesi meke u poi kon koosube a Gadu. Na a sani ya meke Gadu e soi bun-ati gi u. We piisii, bika we biibi taki Gadu o gi u wan gaandi. 3 Ma a ná a sani de wawan, u mu e piisii te tesi e miti u bika u sabi taki tesi e yeepi u fu holidoo. 4 Te we holidoo, da Gadu o fende u bun. Te Gadu fende u bun, da wo abi howpu. 5 A howpu ya naw gi u sen, bika Gadu poti a lobi fi en aini wi ati di a gi wi a santa yeye.
6 Di a yuu fu Gadu doo, neen Kelestesi kon dede gi sondu sama di á be poi yeepi denseefi. 7 A taanga fu fende wan sama di be o wani dede gi wan sama di e du sani a wan letifasi. Ma kande wan sama be sa wani dede gi wan bun sama. 8 Ma Gadu soi taki a lobi u, bika a meke Kelestesi kon dede gi u winsi faw be abi sondu ete. 9 Na a buulu fu Yesesi meke Gadu e si wi enke sama di e libi a wan letifasi. A fu a sani ye ede meke u sabi taki wo fii te a atiboon dei fu Gadu doo. 10 Winsi fa wi anga Gadu a be feyanti, tokuso u toon en mati di en Manpikin kon dede gi u. Neen meke u sa biibi taki a dede fi en Manpikin o fii wi, bika wi anga Gadu toon mati*. 11 We piisii fu a sani di Gadu meke Masaa Yesesi Kelestesi du gi u, bika a fu Yesesi ede meke wi anga Gadu a mati baka.
12 A wan man meke sondu kon a goontapu, neen sondu tyai dede kon. Neen meke ala sama e dede, bika ala den abi sondu. 13 Sondu be de a goontapu kaba fosi a Weiti kon, ma efu weiti á de den á poi kuutu wan sama fu wan sondu di a du. 14 . Dede tii enke kownu fanafu a ten fu Adan te doo a ten fu Mosesi. Winsi wan sama á du aseefi sondu di Adan du, tokuso dede e tii en. Adan be de enke a sama di be mu kon.
15 Ma a kado di Gadu gi wi á de enke a sondu fu Adan. Leti enke fa omen sama dede fu di wan man sondu, a letiso a bun-ati fu Yesesi Kelestesi meke omen sama fende a bun-ati fu Gadu anga a kado di Gadu e gi sama fu soso. 16 Den bakapisi di a sondu fu wan man tyai gi u anga a kado di Gadu gi wi a ná aseefi. Bika a wan sondu tyai takuu bakapisi gi ala sama. Ma baka di libisama du omen sondu neen Gadu gi libisama wan kado. A kado ya meke Gadu e si omen sama enke sama di e libi a wan letifasi. 17 Na a sondu fu wan man meke dede e tii enke kownu. Ma a bun-ati fu Gadu anga a kado di a gi u fu meke u toon leti-ati sama bigi moo iniiwan sani. Den sama di fende a sani ya o libi fu Yesesi Kelestesi ede, den o tii enke kownu tu.
18 Leti enke fa wan sondu namo meke ala sowtu sama fende sitaafu, a letiso wan kodo bun sani di wan man du meke Gadu e si ala sowtu sama enke leti-ati sama di fiti fu fende a libi. 19 Bika leti enke fa omen sama toon sondu sama fu di wan man taangayesi Gadu, a letiso omen sama toon leti-ati sama di wan man aliki Gadu. 20 A Weiti be kon fu soi taki sama e du omen sondu. Ma o moo sama be e du sondu, o moo Gadu be e soi libisama bun-ati. 21 Fu saide? We, leti enke fa sondu anga dede e tii enke kownu, a so a bun-ati fu Gadu o tii enke kownu, fu sama sa toon leti-ati sama. Da a so den o fende teego libi fu Masaa Yesesi Kelestesi ede.