Toli fu den Apostel

16 Pawlesi gwa Derbe, bakadati a gwa Listra. Wan bakaman fu Yesesi be de ape den e kai Timotiyesi. En mma a be wan Dyu, ma en dda a be Giikisama. 2 Den baala fu Listra anga Ikoniyum be e gafa en. 3 Pawlesi taigi den baala taki a be wani Timotiyesi go anga en a den peesi pe a be e go. Fosi Timotiyesi go anga en a besnei* en. A du a sani ya fu den Dyu ede, bika den Dyu fu a pisi wataa de be sabi taki en dda a wan Giikisama. 4 Te den be gwa den foto, den be e gi den baala anga sisa taanga-sikin fu wooko anga san den apostel anga den owluman a Yelusalem be fende di den miti ede kon a wan. 5 A sani ya taanga a biibi fu den kemeente. Dei fu dei moo sama be e toon Yesesi bakaman.

6 Den be pasa aini Frigiya anga Galasiya, bika a santa yeye á be wani den paati a wowtu fu Gadu na a pisi wataa fu Asiya. 7 Di den doo Misiya, den be wani gwa Bitiniya, ma Yesesi meke a yeye tapu den fu go ape. 8 Neen meke den pasa Misiya neen den gwa Trowas. 9 A neti de Pawlesi si wan fisyun. A si wan man fu Masadoniya taampu neen fesi e begi en taki: ‘Abaa kon a Masadoniya kon yeepi u baa.’ 10 Di a si a fisyun, u meke moiti fu gwa Masadoniya wanten. Bika u be fusutan taki Gadu be wani u go paati a bun nyunsu gi den sama ape.

11 Neen meke u teke boto komoto a Trowas, neen u go langalanga a Samotrasa. A taa dei fi en u gwa Neyapolis. 12 Di u komoto ape, u gwa Filipi. Filipi a be wan fu den moo pelensipali foto fu Masadoniya. U tan wantu dei aini a foto ya. 13 Di a Sabadei doo, u gwa doose fu a foto neen u go na a se fu a liba, bika u be yee taki wan peesi be de ape pe sama e go begi. Di u doo, u sidon neen u bigin peleiki gi den uman di be kon ape. 14 Wan uman den e kai Lidiya fu a foto Tiyatira be e aliki u. A uman ya be e seli dii koosi. En a be wan uman di be e lesipeki Gadu. Yehofa* be yeepi en fu poti ala en pakisei a den sani di Pawlesi be e taki. 15 Di en anga en osufamii dopu, a taigi u taki: ‘Efu u si enke mi a wan sama di e du sani enke fa Yehofa* wani, daw kon tan a mi osu baa.’ A so a de aw baka fu te enke u go.

16 Wan dei di u be e gwa pe sama e go begi, wan meisyo di be abi wan takuu yeye neen tapu kon a wi. A meisyo ya be e du lukuman wooko. A be e meke tyaipi moni gi den basi fi en, bika a be e taigi sama san be o pasa anga den. 17 A meisyo ya be e waka aw baka naamo, da ai bali taki: ‘Den man ya a futuboi fu a Moo Gaan Gadu. Den e taigi u fa Gadu o fii wi.’ 18 A omen dei langa a meisyo ya du a sani ya. Pawlesi be kon weli fu yee a sani ya, neen meke a daai neen a taigi a takuu yeye taki: ‘Mi e taigi i aini a nen fu Yesesi Kelestesi fu komoto na a meisyo tapu.’ Faisi a taki a sani ya, a yeye komoto na a meisyo tapu.

19 Di den basi fu a meisyo si taki den á poi meke moni anga en moo, den kisi Pawlesi anga Silas neen den hali den tyai gwa wowoyo a den tiiman. 20 Di den tyai den gwa den tiiman, den taki: ‘Den Dyu ya e tyai buuya kon aini a foto. 21 Den e leli u sani di den weiti fu u nai gi u pasi fu du, bika wi a Romesama.’ 22 Ala den sama di be de ape bigin ligei anga den. Neen den tiiman sende sama fu piiti den koosi fu den apostel puu a den sikin, da den fon den anga tiki. 23 Di den fon den te a fon, den poti den a sitaafu-osu neen den taigi a wakitiman fu a sitaafu-osu taki a mu luku den bun fu den á lowe. 24 Neen meke a poti den te a baka fu a sitaafu-osu, neen a fasi den futu aini wan sani di meke anga udu.

25 Ma wan pisiten fu mindiineti Pawlesi anga Silas be e begi, den be e singi gafa Gadu. Den taa sitaafuman be e aliki den tu. 26 Neen wanboowanboo a doti seke, a hii sitaafu-osu be seke. Bakadati ala den doo opo, den bui fu ala den sitaafuman seefi losi. 27 Di a wakitiman fu a sitaafu-osu weki, a si taki ala den doo be de opo-opo. Neen a hali en fetihow fu kii enseefi, bika a be denki taki den sitaafuman lowe. 28 Ma Pawlesi bali taigi en taki: ‘Ná kii iseefi, ala u de ya!’ 29 Anga ala dansi sikin a wakitiman akisi sama fu den tyai faya kon gi en. A lon go aini a kambaa pe Pawlesi anga Silas be de, neen a kai anga kini a doti a den fesi. 30 A tyai den gwa doose, neen a akisi den taki: ‘San mi mu du fu Gadu fii mi?’ 31 Den taigi en taki: ‘Efii wani Gadu fii yu anga yu osufamii, i mu biibi Masaa Yesesi.’ 32 Bakadati den paati a wowtu fu Yehofa* gi en anga ala den sama fi en osu. 33 Aseefi neti de, a wakitiman tyai Pawlesi anga Silas gwa wan peesi pe a be sa deesi den soo fu den. Bakadati en anga ala den sama aini en osu dopu. 34 A tyai Pawlesi anga Silas go neen osu, neen a sete tafaa gi den. Ná pikin poolo en anga den sama fi en osu be e poolo di den bigin dini Gadu.

35 Di peesi kiin, den tiiman fu a foto sende kai den sikowtu fu go taigi a wakitiman taki: ‘Losi den man meke den gwe.’ 36 Neen a wakitiman gi Pawlesi a bosikopu. A taigi en taki: ‘Den tiiman fu a foto sende piki mi taki mi mu losi u. U sa go, meke sani waka bun anga u.’ 37 Ma Pawlesi taigi den taki: ‘Den fon u na ala sama fesi sondee den tyai u gwa kuutu. Den poti wi a sitaafu-osu anga ala fa wi a Romesama. Neen den wani puu wi a sitaafu-osu kibiikibii? Noiti a sani ya naw pasa! Meke denseefi kon puu wi ya.’ 38 Den sikowtu go taigi den tiiman san Pawlesi taki. Di den tiiman yee taki den man a be Romesama, den feele te. 39 Neen meke den kon begi den fu wai ede gi den. Baka di den tyai den gwa doose, den akisi den fu komoto aini a foto. 40 Di den komoto aini a sitaafu-osu den go na a osu fu Lidiya. Di den go ape den si den baala. Baka di den gi den taanga-sikin, den komoto aini a foto.