Wan biifi gi den Galasiyasama

5 A Kelestesi meke u fii na a fasi ya. Neen meke u mu taampu gingin. Wa mu poti useefi fu toon saafu baka.

2 A mi Pawlesi e taigi u a sani ya, efu u besnei*, u naw fende wini fu a sani di Kelestesi du. 3 Mi wani membee u ete wan leisi taki iniiwan man di besnei*, mu du ala den sani di sikiifi aini a Weiti. 4 Efu we du san a Weiti e taki fu di we si enke a sani ya o meke Gadu si wi enke leti-ati sama, da wa de wan anga Kelestesi moo. U naw fende a bun-ati fi en tu. 5 A yeye e yeepi u fu wakiti te enke u fende a sani di Gadu o gi den sama di e libi a wan letifasi fu di den e biibi. 6 Te wan sama a wan bakaman fu Masaa, a naabi toobi efu a besnei*. A sani di pelensipali a te ai soi lobi fu di ai biibi.

7 Fosi u be e tyai useefi bun, da sama tapu u fu wooko anga a tuu leli? 8 A ná a Gadu di kai u tapu u fu wooko anga a tuu leli. 9 A wan pikinso sowda namo e soopu a hii bolon. 10 Mi sabi taki wi di de bakaman fu Masaa Yesesi e denki go na a wanse anga mi. Ma a sama di e tyai buuya kon o fende en sitaafu, a naabi toobi sama neen. 11 Den baala fu mi, efu mi be e leli sama taki den mu besnei* da saide sama e suku fu du ogii anga mi ete? A leli di mi e leli sama taki Yesesi dede a wan pina ponsu á be o meke sama dyakata. 12 Mi e winsi taki den man di e sende u fu besnei* koti den senpeesi puu.

13 Den baala fu mi, nownow u fii. Ma wa mu meke a fii di u fii meke u du san a sondu sikin wani. U mu yeepi makandaa fu di u lobi useefi. 14 U sa fende a hii Weiti aini wan kodo weiti. A Weiti ya na: ‘U mu lobi taawan enke faw lobi useefi.’ 15 Efu we du ogii anga useefi efuso e feti anga useefi daw mu luku bun fu wa kii useefi.

16 Neen meke mi e taigi u taki u mu tan du san a yeye wani, daw naw du san a sondu sikin wani. 17 A yeye anga a sondu sikin nai koti, den tu man ya a feyanti. Neen meke u nai poi du den sani di u wani du. 18 Efu na a yeye fu Gadu e tii u, da wa de na a Weiti ondoo moo.

19 Den sani di a sondu sikin e du de kiin fu si. Den sani ya na, hululibi, tyobo sowtu fasi fu libi, ogii di sama e du sondee sen, 20 a dini di sama e dini falisi gadu, bonu, feyanti fasi, kwali, dyalusu, takuu atiboon, toobi, paatifasi, falisi leli, 21 hebi dyalusu, diingi duungu, fesa pe den e du ala sowtu sani, anga taa sowtu sani enke den wan ya. Mi e wasikoi u fu den sani ya, leti enke fa mi be wasikoi u kaba taki den sama di e du den sowtu sani ya naw go aini Gadu Kownukondee.

22 Ma den manii di a yeye e meke sama abi a lobi, piisii, freide, pasensi, switifasi, bunfasi, biibi, 23 safu-ati, anga dwengi iseefi. Weiti á de di e kuutu den sani ya. 24 Di den bakaman fu Kelestesi sipikii a sondu sikin fu den na a ponsu, den sipikii den fii anga den losutu fu den na a ponsu tu.

25 Efu na a yeye e tii wi, da meke u tan du sani enke fa a yeye wani. 26 Wa mu e fii useefi, wa mu e sitee anga taawan, wa mu e dyalusu anga taawan tu.