I be sabi a sani ya?
Fa den siton di sama fende aini Babilon anga a fasi fa den siton ya meke e soi taki Beibel nai lei?
SABIMAN fende tyaipi siton di sama be koboloiki fu meke a foto Babilon. Wan sabiman den e kai Robert Koldewey taki aini onfuu di be de a doose fu a foto den be e baka den siton ya. Tokotoko anga udu be lai a pe den be e baka den.
Wan gaandi buku e soi tu taki den heiheiman fu Babilon be e koboloiki den onfuu ya fu du ogii-ati sani. Paul-Alain Beaulieu a wan professor di e ondoosuku fositen sani. Ai ondoosuku a fositen Asiriyatongo na a universiteit fu Toronto. A taki: ‘Den sani di sama sikiifi fu Babilon, e soi taki den kownu be e meke sama iti sama go aini den onfuu ya te den á be aliki den. Den be e du a sani ya tu te a sama á be soi lesipeki gi sani di santa.’ Wan sani di sama be sikiifi na a ten fu Kownu Nebukadnesar e taki: ‘Kii den, boon den, losi den aini a onfuu fu a boli man. Meke a somoko fu den opo go a tapu, meke den dede aini faya.’
A sani ya meke sama di e leisi Beibel pakisei san sikiifi a Daniyeli kapitel 3. A kapitel ya e soi taki Nebukadnesar be meke wan gaan gowtu pobiki na a saka peesi fu Dura a doose fu Babilon. Di den dii Hebrew boi Sadrak, meisak, anga Abedneikow be taki den naw boigi gi a pobiki, ná pikin boon Nebukadnesar ati boon. A meke sama faya onfuu ‘seibin toon moo enke san den be gwenti’. Bakadati a taigi den fu den ‘iti den [dii boi ya] go aini a onfuu.’ Ma wan taanga engel kibii den, neen meke den á dede.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Wan siton pe Nebukadnesar nen sikiifi neen tapu
Den siton di sama fende aini Babilon e soi tu taki Beibel nai lei. Sani sikiifi a omen fu den siton ya di e gafa a kownu. Den sikiifi a wan fu den siton ya taki: ‘Nebukadnesar, Kownu fu Babilon. A kownu-osu di mi, a makiti Kownu meke. Meke den bakapikin fu mi tii fu alaten.’ Den wowtu ya e gei a sani di sikiifi a Daniyeli 4:30 pe Nebukadnesar be e meke bigi taki: ‘A ná a Gaan Babilon di miseefi meke de ya noh? A foto di mi meke anga mi eigi kaakiti, a osu fu a kownu. A mi den mu gafa, a mi mu fende a gaandi.’