Wakititolen LIBRARY A INTERNET
Wakititolen
LIBRARY A INTERNET
Okanisitongo
  • BEIBEL
  • DEN BUKU ANGA TAA SANI DI I SA FENDE
  • KOMAKANDAA
  • wp21 no. 1 bladzijde 10-13
  • San i mu du efi i wani Gadu aliki den begi fi i?

Felon á de na a pisi ya.

Piimisi, wan sani pasa anga a felon.

  • San i mu du efi i wani Gadu aliki den begi fi i?
  • A Wakititolen—Ai bali basiya gi Yehofa Kownukondee (Gi a peleikiwooko—2021
  • Den pisi aini a artikel ya
  • Toli di gei a wan ya
  • BEGI YEHOFA AINI A NEN FU YESESI
  • TAKI SAN DE A YU ATI
  • DEN BEGI FU U MU E KAI ANGA SAN GADU WANI
  • SAN I SA AKISI GADU?
  • NÁ WELI FU BEGI
  • Begi o yeepi i fu toon Gadu mati
    I sa piisii fu teego!—Wan buku fu sutudeli Beibel
  • I mu e teke en fu bigi taki i poi begi Yehofa
    A Wakititolen—Ai bali basiya gi Yehofa Kownukondee (Sutudi-Wakititolen)—2022
  • Yehofa e aliki wi?
    Aliki Gadu da yu o libi fu tego
A Wakititolen—Ai bali basiya gi Yehofa Kownukondee (Gi a peleikiwooko—2021
wp21 no. 1 bladzijde 10-13

San i mu du efi i wani Gadu aliki den begi fi i?

A Yehofa na ‘a Sama di e aliki begi’ (Psalm 65:2). Na ala yuu u sa begi en, winsi pe u de. U sa begi taanga, ma u sa begi aini wi ati tu. Yehofa wani u kai en u ‘Dda’. Neen na a moo bun Dda di u sa abi (Mateyesi 6:9). Yehofa lobi u, neen meke ai soi u san u mu du efu u wani a aliki den begi fu u.

BEGI YEHOFA AINI A NEN FU YESESI

‘A Dda o gi wi ala san wi akisi en aini mi nen.’​—Yohanisi 16:23.

A sani di Yesesi taki ya e soi kiin taki Yehofa á wani u koboloiki fowtow efuso pobiki te wi e begi en. A á wani u begi den engel, sama di be e dini en a fositen, efuso den afo fu u tu. Ma a wani u begi en aini a nen fu Yesesi Kelestesi. Te wi e begi Gadu aini a nen fu Yesesi, da wi e soi taki wi e fusutan taki a fu di Yesesi kon dede gi u meke u poi taki anga Gadu. Yesesi seefi be taki: ‘Sondee mi, nawan sama poi doo na a Dda.’​—Yohanisi 14:6.

TAKI SAN DE A YU ATI

‘Puu ala san de a yu ati taigi en.’​—Psalm 62:8.

Te wi e begi Yehofa, u mu taki anga en enke fa u be o taki anga wan dda di lobi en pikin. Wi á mu e leisi den begi fu wi aini buku. Wi á mu e leli begi a ede tu. Te wi e taki anga Yehofa, u mu taki san de a wi ati. A fasi fa wi e taki anga en mu soi tu taki wi e lesipeki en.

DEN BEGI FU U MU E KAI ANGA SAN GADU WANI

‘Awinsi san wi e akisi en, a o aliki u, solanga ai kai anga san a wani.”​—1 Yohanisi 5:14.

Yehofa taigi wi aini Beibel san a o du gi u, a taigi u san a wani u du tu. Efu u wani Yehofa aliki den begi fu u, den begi fu u ‘mu e kai anga a wani fi en’. Efu wi e sutudeli Beibel, wi o kon sabi Yehofa moo bun. A so wi o sabi fa u mu begi efu u wani a aliki u.

SAN I SA AKISI GADU?

Wan osufamii e begi fosi den nyan.

Den sani di yu abi fanowdu fu tan a libi. U sa begi Gadu fu a gi u nyanyan, koosi, anga wan peesi fu tan. U sa begi Gadu fu a yeepi u fu du sani anga koni. U sa begi en fu a gi u kaakiti fu holidoo te tesi e miti u. U sa begi en fu a yeepi u fu u biibi taanga. U sa begi en tu fu a gi u paadon fu den fowtu di wi e meke.​—Lukasi 11:3, 4, 13; Yakowbesi 1:5, 17.

Wan man e begi anga en uman di didon na ati-osu.

Begi gi taawan. Dda anga mma di lobi den pikin fu den e piisii te den si fa den lobi denseefi. Yehofa a u Dda, neen meke ai piisii tu te a si taki u lobi useefi. U sa begi gi u toowpaa, den famii fu u, den pikin fu u, anga den mati fu u. Apostel Yakowbesi be taki: ‘U mu e begi gi useefi.’​—Yakowbesi 5:16.

Wan man e koi aini wan goon a wan bakadina.

Gi Yehofa daa. Beibel e taki fu a Sama di meke u taki: ‘Ai meke alen kai komoto a hemel gi u. A poti wan ten, pe nyanyan e de pasa maiki. Neen meke wi e piisii’ (Toli fu den apostel 14:17). Te wi e sidon pakisei ala den sani di Yehofa e du gi u, wi o wani gi en daa fu ala den sani ya. A fasi fa wi e libi mu soi tu taki wi e teke den sani di Gadu e du gi u fu bigi.​—Kolosesama 3:15.

NÁ WELI FU BEGI

Kande wi e lasi-ati son yuu fu di Gadu á piki a begi fu u wantenwanten. Ma dati wani taki Gadu nai booko en ede anga u? Nono! Den ondoofenitoli di e kon o soi taki u mu tan begi winsi san e pasa.

Steve di u be taki fi en aini a fosi artikel taki: ‘Efu a ná be begi, kande mi be gi abaa ná a tide.’ San yeepi en fu si taki begi pelensipali? Di Steve bigin sutudeli Beibel a leli taki a mu e begi naamo. A taki: ‘Te mi e begi Gadu, mi e gi en daa fu a fasi fa a meke den mati fu mi yeepi mi. Nownow mi e moo piisii.’

Jenny di be e fii enke a á bun fu taki anga Gadu taki: ‘Wan leisi di mi be e fii enke mi á bun seefiseefi, mi begi Gadu, neen mi akisi en saide mi e fii so.’ A fende wini fu a begi di a begi? A taki: ‘Begi yeepi mi fu si miseefi enke fa Gadu e si mi. Mi kon si taki winsi mi ati e kuutu mi, tokuso a ná so Gadu e si mi. Begi yeepi mi tu fu mi á gi abaa. Nownow mi e si Yehofa enke wan tuutuu sama di e booko en ede anga mi. Mi e si en enke mi Gadu, Nda, anga mi Mati di e holibaka gi mi ala yuu, solanga mi e tan meke moiti fu du sani enke fa a wani.’

Isabel anga en man anga a boi fu den.

Di Isabel si fa a boi fi en e piisii winsi fa a á poi du son sani a taki: ‘Te mi e luku a boi fu mi, mi e si tuutuu taki Yehofa piki den begi fu mi.’

Luku a toli fu Isabel. Di a be de anga bee, den dataa taigi en taki a pikin di a o meke o malengii. A sani ya du en ogii te. Wantu fu den dataa taigi en taki a be o moo bun efu a puu a bee. Isabel taki: ‘Ná pikin du a sani ya du mi ogii a mi ati. Mi be e fii enke mi be o dede.’ San a du? A taki: ‘Mi be e begi Gadu naamo fu a yeepi mi.’ Di a meke a pikin a be malengii tuu. A kai en Gerard. Winsi fa a sani ya pasa, Isabel e fii taki Gadu piki den begi fi en. A taki: ‘Nownow a 14 yali a boi fu mi abi. Winsi fa a á poi du son sani, tokuso ai piisii. Neen na a moo gaan kado di Yehofa gi mi. Te mi e luku a boi fu mi, mi e si tuutuu taki Yehofa piki den begi fu mi.’

Den sowtu toli ya e meke u pakisei a sani di a psalm sikiifiman be taki. A be taki: ‘Yehofa mi sabi taki yu e aliki den sama di ati safu te den e begi. Yu e yeepi den fu abi deki-ati, yu e poti pakisei a den’ (Psalm 10:17). A sani ya e soi kiin taki wi á mu e weli fu begi, ma u mu e begi Gadu ala yuu.

A omen fu den begi fu Yesesi sikiifi aini Beibel. A wan di gaanse sama sabi, na a begi di a be leli den bakaman fi en. San u sa leli fu a begi ya?

Yesesi leli u fa u mu begi

Wan gaan kulu sama e aliki Yesesi te ai holi wan lezing a wan mongo.

Di Yesesi be e holi a lezing na a mongo, a leli den disipel fi en fa den mu begi. Gaanse sama sabi a begi ya enke a ‘Wi Tata begi’ (Mateyesi 6:9-13; luku Lukasi 11:2-4 tu.) A omen sama sabi a begi ya, taawan leli en a ede. Ma Yesesi be wani sama leli a begi ya a ede fu e taki naamo ala leisi te den e begi? Nono, bika neen seefi be taigi den disipel fi en taki den á mu e taki denseefi sani ala yuu te den e begi (Mateyesi 6:7). Di Yesesi leli den bakaman fi en a begi ya, a soi a be wani soi den fa denseefi sa begi, anga san den sa akisi Gadu te den e begi. Meke u luku san u sa leli fu a begi ya.

‘U Dda di de a hemel’

  • A Gadu u mu begi.

‘I nen mu santa’

  • Sama mu si a nen fu Gadu, di den e kai Yehofa enke wan santa nen. Den mu gi en gaandi tu.

‘Meke i Kownukondee kon’

  • A Kownukondee fu Gadu a wan tiimakiti di de a hemel. A Yesesi na a Kownu fu a Kownukondee ya. Dyonson a o bigin tii a goontapu.

‘Meke sani waka enke fa i wani a goontapu ya, leti enke fa sani e waka a hemel’

  • Gadu wani u libi fu teego a goontapu aini wan paladeisi sondee booko-ede.

‘Gi wi a beele di wi abi fanowdu tide’

  • A Yehofa e gi u den sani di wi abi fanowdu fu tan a libi.

‘Gi u paadon fu u sondu’

  • Ala wi e meke fowtu, neen meke u mu e begi Gadu fu a gi u paadon.

Te wi e holi den sani ya a pakisei, wi o sabi san u mu taki te wi e begi.

    Okanisi buku (2011-2025)
    Log Out
    Log In
    • Okanisitongo
    • Sende en gi wan sama
    • Settings
    • Copyright © 2025 Watch Tower Bible and Tract Society of Pennsylvania
    • Gebruiksvoorwaarden
    • Privacybeleid
    • Privacy Settings
    • JW.ORG
    • Log In
    Sende en gi wan sama