Ai switi te wi anga den baala anga sisa fu we libi na a wan

1-2. San pelensipali gi Yehofa? San a wani u du?

WAN fu den moo pelensipali sani gi Yehofa, na a fasi fa we libi anga taawan. Yesesi be leli u taki u mu lobi taawan enke faw lobi useefi (Mat. 22:37-39). Dati wani taki u mu lobi den sama di nai dini Yehofa tu. Efu we soi switifasi gi den, da we waka a Yehofa baka, bika ‘ai meke alen kai gi den sama di e libi a wan letifasi anga den sama di nai libi a wan letifasi.’​—Mat. 5:45.

² Yehofa lobi ala sama, ma a moo lobi den sama di e du san bun (Yoh. 14:21). A wani u lobi sama enke fa a lobi den. A taki u mu ‘lobi useefi anga u hii ati’. Boiti dati, ‘u mu lobi useefi enke fa baala lobi denseefi’ (1 Peit. 4:8; Rom. 12:10). Te u luku san Yehofa taki ya, we pakisei fa we fii te u lobi wan famii efuso wan mati fu u.

3. Faw mu si a lobi di u mu lobi taawan?

³ Lobi de enke wan boomiki di u paandi. Wi abi fu solugu en fu a mu goo bun. Apostel Pawlesi be gi Kelesten a taanga-sikin ya: ‘Tan lobi useefi enke fa baala lobi denseefi’ (Heb. 13:1). Leti enke fa wan sama e poti pakisei a den boomiki fi en, a so Yehofa wani u poti pakisei na a lobi di u mu lobi den baala anga sisa fu u. Aini a artikel ya, wo luku saide a de fanowdu fu toon bun mati anga den baala anga sisa fu u, anga saw mu e du ala yuu fu toon bun mati anga den.

SAIDE U MU TOON MATI ANGA DEN BAALA ANGA SISA FU U

4. Enke fa Psalm 133:1 e soi, da faw sa soi taki we teke en fu bigi taki u de aini wan olikanisâsi, pe wi anga den baala anga sisa fu we libi na a wan? (Luku den fowtow tu.)

⁴ Leisi Psalm 133:1. We biibi a sani di a psalm singiman be taki. A be taki ‘a bun’, ‘a switi’, te baala anga sisa e libi enke mati anga denseefi. Te we si wan moin bon ala dei, baka wan pisiten a nai moin gi u moo. A letiso a sa pasa anga u taki te we si den baala anga sisa fu wi omen leisi wan wiki, da kande u nai teke en fu bigi moo taki wi anga den de aini wan olikanisâsi pe we libi na a wan. Saw yeepi u fu tan lobi den? Wo moo lobi den baala anga sisa fu u, efu we teke ten pakisei saide ibiiwan fu den pelensipali aini a kemeente anga saide ibiiwan fu den pelensipali gi u.

5. San son sama e du te den si fa den Yehofa Kotoigi e libi anga denseefi?

⁵ Te son sama kon a den komakandaa fu wi a fosi leisi, den e si taki u lobi useefi. A sani ya e meke den fusutan taki na a tuu biibi de ya. Yesesi be taki: ‘A so ala sama o sabi taki wi a mi bakaman, te u lobi useefi (Yoh. 13:35). Meke u luku a toli fu Chaithra. A uman ya be de a universiteit. A be e sutudeli Beibel anga Yehofa Kotoigi tu. A be kon a wan konkelesi di den Kotoigi be kai en. Di a kon a fosi dei, neen a taigi a sisa di be e sutudeli anga en taki: ‘Noiti mma anga nda baasa mi. Ma di mi kon a fosi dei, a 52 sama baasa mi. Mi be fii taki Yehofa lobi mi tuutuu. Mi wani toon wan Kotoigi tu, we libi enke famii anga useefi.’ Chaithra be e go a fesi anga a sutudi. A dopu aini 2024. Sama e si den bun sani di we du, den e si fa we libi anga useefi, den e si faw lobi useefi tu. Den sani ya e yeepi den fu kon dini Yehofa.​—Mat. 5:16.

6. Fa a de di wi anga den baala anga sisa de mati e kibii u?

⁶ Efu wi anga den baala anga sisa a mati, a sani ya o kibii u. Pawlesi be taigi den Kelesten fu a ten fi en taki: ‘Meke wi e gi makandaa taanga-sikin ala dei, da sondu naw fende u koli fu di a meke wi ati kon taanga’ (Heb. 3:13). Te we fii booko-saka, u sa komoto na a pasi fu Yehofa. Ma son yuu Yehofa sa meke wan baala efuso wan sisa poti pakisei a wi, fu di a si taki wi abi yeepi fanowdu (Ps. 73:2, 17, 23). A taanga-sikin di aw gi u, e yeepi u fu kisi useefi baka.

7. Saide u sa taki a libi di we libi na a wan anga a lobi di u lobi useefi na aseefi? (Kolosesama 3:13, 14)

⁷ U de aini wan olikanisâsi pe ala sama e meke moiti fu lobi denseefi. Neen meke we fende omen belesi (1 Yoh. 4:11). A lobi e meke wi ‘abi boo anga taawan’, a sani ya e yeepi u fu libi na a wan. (Leisi Kolosesama 3:13, 14; Efe. 4:2-6) Neen meke te u de a den komakandaa, we man fii a lobi di wa poi fende a nawan taa peesi, bika nawan taa kulu sama lobi denseefi so.

U MU E LESIPEKI USEEFI

8. Fa Yehofa e yeepi u fu libi na a wan?

⁸ A fasi fa Yehofa e yeepi a foluku fi en fu libi na a wan aini a ten ya, a wan wonduu. Bika winsi fa wi abi sondu, toku u poi libi na a wan (1 Kor. 12:25). Beibel taki a ‘Gadu seefi soi u taki u mu lobi useefi’ (1 Tes. 4:9) Anga taa wowtu Yehofa e soi wi aini Beibel saw mu du fu libi bun anga taawan. Efu u wani ‘Gadu soi u’ faw mu libi na a wan, daw mu e ondoosuku a wowtu fi en, daw du san a taki (Heb. 4:12; Yak. 1:25). Na a sani ya wi enke Yehofa Kotoigi e meke moiti fu du.

9. Enke fa a tekisi fu Romesama 12:9-13 e soi, da san we leli fu a lesipeki di u mu e lesipeki taawan?

⁹ Fa a Wowtu fu Gadu e leli u fu toon mati anga u baala anga sisa? Meke u poti pakisei a den sani di Pawlesi be taki fu a toli ya enke fa a sikiifi a Romesama 12:9-13. (Leisi en.) Wo moo poti pakisei na a pisi pe a taki, ‘a yu mu de a fosiwan di e soi lesipeki gi taawan’. San a be wani taki anga a sani ya? U mu du ala saw poi fu soi ‘tyali-ati gi taawan’. We du a sani ya te we gi taawan paadon anga u hii ati anga te we bali wadaa gi den. Boiti dati, u mu lobi paati san wi abi anga taawan (Efe. 4:32). Wa mu si enke a den baala anga sisa fu u fosi mu kon meke mati anga u. Ma ‘u mu de a fosiwan di e soi lesipeki gi taawan’. Iseefi o si taki a sani di Yesesi be taki a tuu. A be taki: ‘Te wan sama e gi taawan sani, ai de koloku moo enke te taawan e gi en sani.’​—Toli 20:35.

10. Faw sa soi taki u de ‘a fosiwan di e soi taawan lesipeki’? (Luku a fowtow tu.)

¹⁰ Baka di Pawlesi be taki u mu de a fosiwan di e soi taawan lesipeki, a be taki: ‘U mu e wooko taanga, wa mu lesi.’ Wan sama di e wooko taanga á lesi. Te a fende wan wooko fu du, ai du en bun. Odo 3:27, 28 e taki: ‘Efii si taki i poi yeepi den sama di de a nowtu, ya mu taki i naw yeepi den.’ Neen meke te u si wan taawan de a nowtu, we du ala saw poi fu yeepi en, u nai daaidaai. U nai luku tu taki a wan taa sama mu yeepi en.​—1 Yoh. 3:17, 18.

11. Saw yeepi u fu toon mati anga taawan?

¹¹ Wan taa fasi faw sa soi lesipeki gi taawan, a te we gi den paadon te den du wan hati sani anga u. Efeisesama 4:26 e taki: ‘Wa mu meke a san saka da wi ati de boonboon ete.’ Saide wa mu du a sani ya? Bika efu u meke a san saka, da vers 27 e taki we ‘gi Didibii pasi fu meke u du sani di á bun’. Ala yuu Yehofa e taigi wi aini en Wowtu taki u mu e gi taawan paadon. Kolosesama 3:13 e gi u taanga-sikin fu wi ‘abi boo anga taawan. U mu e gi taawan paadon anga u hii ati te den du wan hati sani anga u’. Te we gi taawan paadon te den du wan hati sani anga u, we soi taki u wani de mati anga den. Te we du a sani ya, we ‘du ala saw poi fu tan libi na a wan enke fa a santa yeye e yeepi u fu du’ (Efe. 4:3). A de kiin fu si taki te we gi taawan paadon, we yeepi a foluku fu Gadu fu libi na a wan.

12. Fa Yehofa e yeepi u fu gi taawan paadon?

¹² A tuu taki a sa taanga gi u fu gi wan sama paadon te a du wan hati sani anga u. Ma a santa yeye fu Gadu poi yeepi u fu gi en paadon. Baka di a tekisi soi u taki ‘u mu lobi useefi enke fa baala lobi denseefi’, a soi u tu taki ‘u mu e wooko taanga’. Beibel taki: ‘U mu meke a santa yeye yeepi u fu de fayafaya.’ Wan sama di a ‘santa yeye e yeepi’, e de fayafaya ala yuu (Rom. 12:11). A santa yeye fu Gadu poi yeepi u fu lobi useefi enke fa baala lobi denseefi. A sani ya o yeepi u fu we gi useefi paadon tu. Neen meke na ala yuu u mu e begi Yehofa fu a yeepi u.​—Luk. 11:13.

‘WA MU LOBI WAN SAMA MOO A TAAWAN’

13. San sa meke u lobi wan sama moo a taawan?

¹³ Na ‘ala sowtu sama’ e kon a den komakandaa fu u. Nawan fu wa kiya na aseefi fasi (1 Tim. 2:3, 4). Neen meke efu wa luku bun, den sani ya sa meke a taanga gi u fu libi na a wan. Fu di kande wo bigin poti pakisei na a fasi fa a taawan de, fa ai du sani, fa ai wei koosi, fa ai du sani fu tan gusontu, efuso san ai du fu meke piisii (Rom. 14:4; 1 Kor. 1:10). Fu di ‘Gadu seefi soi u taki u mu lobi useefi’, meke u mu luku bun fu u nai si enke a fasi fa we si sani bun moo du fu taawan.​—Filip. 2:3.

14. Saw mu meke moiti fu du ala yuu? Saide u mu du a sani ya?

¹⁴ Wan fasi faw sa yeepi a kemeente fu libi na a wan, a te we meke moiti ala yuu fu e gi taawan taanga-sikin (1 Tes. 5:11). Den ten di pasa, a omen sama di á be e kon a komakandaa moo bigin kon baka. Sama di den baala be puu aini a kemeente seefi bigin dini Yehofa baka. Ná pikin poolo u poolo di den kon baka. We bali wadaa gi den (2 Kor. 2:8). Meke u luku a toli fu wan sisa di be bigin kon a den komakandaa baka. A tin yali langa aa be e peleiki moo. A sisa ya taki: ‘Ala sama be e booko lafu gi mi, den be e seke mi ana (Toli 3:19). Fa a fii di den baala anga sisa soi switifasi gi en? A taki: ‘Mi be e fii taki Yehofa be e yeepi mi fu piisii baka.’ Efu we meke moiti fu gi taawan taanga-sikin, Kelestesi o meke u yeepi ‘den sama di e tyotyo fu di den e sow ibi lai’.​—Mat. 11:28, 29.

15. San a wan taa fasi faw sa yeepi a kemeente fu libi na a wan? (Luku a fowtow tu.)

¹⁵ Wan taa fasi faw sa yeepi a kemeente fu libi na a wan, a te we luku bun san we taki. Yopu 12:11 e taki: ‘Yesi meke fu yee sani, leti enke fa tongo meke fu tesi sani.’ Leti enke fa wan sama di sabi boli e tesi a nyanyan fi en efu a bun fosi a paati en gi taawan, a letiso u mu e denki bun fosi u taki wani sani (Ps. 141:3). Ala yuu u wani taki sani di e gi taawan taanga-sikin, ‘sani di e tyai wini gi den’.​—Efe. 4:29.

16. Sama a den sama di mu e meke moiti fu taki sani di e gi taawan taanga-sikin?

¹⁶ Wan man di toow mu e taki sani di e meke en uman fii bun. Mma anga dda mu e meke moiti fu e gi den pikin fu den taanga-sikin (Kol. 3:19, 21; Tit. 2:4). Owluman seefi mu e gi taawan taanga-sikin, bika Yehofa poti den fu luku den sikapu fi en. Neen meke ala yuu den mu e toosutu taawan (Yes. 32:1, 2; Gal. 6:1). Wan nongo aini Beibel e taki: ‘Ná pikin switi a switi te wan sama taki wan sani na a bun yuu.’​—Odo 15:23.

LOBI USEEFI ‘ANGA WAN KIIN ATI’

17. Faw sa soi taki u lobi den baala anga sisa fu u tuutuu?

¹⁷ Apostel Yohanisi be taki: ‘Wa mu e taki a mofu namo taki u lobi useefi, ma u mu du sani anga wan kiin ati fu soi taki u lobi useefi’ (1 Yoh. 3:18). U wani a lobi di wi abi gi den baala anga sisa fu u komoto a wi ati. Faw sa du a sani ya? Te we meke ten fu de makandaa anga den baala anga sisa fu wi a den komakandaa anga a peleikiwooko, wo moo sabi den. A sani ya o meke u moo lobi den. U sai go luku den a osu tu. Te we du den sani ya, we soi taki a ‘Gadu seefi leli u taki u mu lobi useefi’ (1 Tes. 4:9). Wo si ‘fa a bun anga fa a switi te baala e libi na a wan’.​—Ps. 133:1.